Gulong kitab abaꞌ Anak Dumba
5
Baroꞌ ku medaꞌ suteꞌ gulong kitab de jari kanan Ya te dudok de bangku raja nyaꞌ. Gulong kitab nyaꞌ bong keluar abaꞌ dalam mayoh tules, abaꞌ gulong kitab nyaꞌ delem ngau tujoh uteꞌ metrai te depulah ari lilen. 2 Abaꞌ ku medaꞌ sikoꞌ mlikat te kuat becakap ngau goꞌ te sareng, jakoꞌ ya, “Sapa te patot mukaꞌ kebala metrai toꞌ abaꞌ mukaꞌ gulong kitab toꞌ?” 3 Uleh niseꞌ urang, bayek te de sruga bayek te de bumi abaꞌ de baroh bumi, niseꞌ te patot mukaꞌ abaꞌ maca gulong kitab nyaꞌ. 4 Kebaꞌ nyaꞌ nyuroh ku ruwau-ruwau nyabak nema datai ke sikoꞌ mah niseꞌ urang te deangap patot mukaꞌ abaꞌ maca gulong kitab nyaꞌ. 5 Baroꞌ sikoꞌ ari kebala pemimpen nyaꞌ madah ke ku, “Jadi meh nyabak! Pedaꞌ! Singa ari suku Yehuda, pureh Raja Daot nyaꞌ udah menang! Kebaꞌ Ya tauꞌ mukaꞌ tujoh metrai abaꞌ mukaꞌ gulong kitab nyaꞌ.”6 Baroꞌ ku medaꞌ sikoꞌ Anak Dumba diri semak bangku raja te deklileng empat mahlok abaꞌ kebala pemimpen nyaꞌ. Ku medaꞌ Anak Dumba nyaꞌ adai abi bakal udah desemeleh. Ya betanok tujoh abaꞌ bemata tujoh. Tujoh mata nyaꞌ, nyaꞌ tujoh Roh ari Tuhan Allah te deutos ke ugaꞌ dunia. 7 Anak Dumba nyaꞌ datai abaꞌ nerimaꞌ gulong kitab nyaꞌ ari jari kanan Ya te dudok de bangku raja. 8 Breta Anak Dumba nyaꞌ ngameꞌ gulong kitab nyaꞌ, empat mahlok abaꞌ dua puloh empat pemimpen nyaꞌ tesungkor nyemah Ya. Sidaꞌ mansen megai sigeꞌ kecapi abaꞌ sigeꞌ mangkok mas, te penoh uleh kemenyan. Kemenyan toꞌ pradua kebala urang te deempu Tuhan Allah. 9 Baroꞌ sidaꞌ menanyi suteꞌ lagu baru, jakoꞌ sidaꞌ,
“Wan patot nerimaꞌ gulong kitab nyaꞌ
abaꞌ mukaꞌ kebala metrai te depulah ari lilen,
nema Wan udah debunoh.
Ngau darah Wan kedireꞌ, Wan nebos kebala urang
ari ngenap suku, bansa, negara, abaꞌ baasa ngau Tuhan Allah.
10 Wan udah mulah sidaꞌ jadi warga Pemrintah Tuhan Allah,
sidaꞌ jadi kebala imam te ngelayan Tuhan Allah
abaꞌ sidaꞌ kaꞌ mrintah de bumi.”
11 Baroꞌ ku medaꞌ abaꞌ ninga goꞌ kebala mlikat te lampar mayoh nadai talah itong. Sidaꞌ ngelileng bangku raja, empat mahlok abaꞌ kebala pemimpen nyaꞌ. 12 Abaꞌ sidaꞌ madah ngau goꞌ te sareng,
“Anak Dumba te udah desemeleh nyaꞌ
patot nerimaꞌ kuasa abaꞌ pengaya,
patot nerimaꞌ pemenauꞌ abaꞌ penguat,
patot dehormat abaꞌ dejunyong tingeꞌ
abaꞌ patot depuji!”
13 Abaꞌ ku ninga ugaꞌ mahlok, bayek de sruga, bayek de bumi, bayek de baroh bumi, bayek te de laot abaꞌ ugaꞌ te de alam ya, madah,
“Ya te dudok de bangku raja abaꞌ
Anak Dumba nyaꞌ
patot depuji, dahormat, dejunyong tingeꞌ
abaꞌ bekuasa niseꞌ pemadoꞌ.”
14 Baroꞌ empat mahlok nyaꞌ madah, “Amen.” Abaꞌ kebala pemimpen nyaꞌ tesungkor nyemah Ya te dudok de bangku raja abaꞌ Anak Dumba nyaꞌ.