Anak Dumba mukaꞌ nam metrai
6
Udah nyaꞌ ku medaꞌ Anak Dumba nyaꞌ mukaꞌ metrai te semaru ari tujoh metrai te adai de gulong kitab nyaꞌ. Baroꞌ ku ninga sikoꞌ ari empat mahlok te semak bangku raja nyaꞌ madah ngau goꞌ te sareng munyi goꞌ guntor, jakoꞌ ya, “Boh kitoꞌ!” 2 Baroꞌ ku medaꞌ sikoꞌ kuda puteh abaꞌ te dudok de kuda nyaꞌ megai suteꞌ panah, abaꞌ ya dabreꞌ mahkuta. Ya mansang ke bumi kaꞌ ngalah kebala munsoh abaꞌ ya menang.3 Pas Anak Dumba nyaꞌ mukaꞌ metrai te kedua, ku ninga mahlok te kedua madah, “Boh kitoꞌ!” 4 Baroꞌ ku medaꞌ sikoꞌ kuda te warna mirah keluar, abaꞌ te dudok de kuda nyaꞌ dabreꞌ kuasa ngameꞌ damai ari bumi, nyaꞌ te nyuroh ensia bebunoh abaꞌ sama direꞌ. Ke ya dabreꞌ gaꞌ sebilah pedang besai.
5 Pas Anak Dumba nyaꞌ mukaꞌ metrai te ketiga, ku ninga mahlok te ketiga madah, “Boh kitoꞌ!” Baroꞌ ku medaꞌ de mua ku adai sikoꞌ kuda warna itam abaꞌ te dudok de kuda nyaꞌ megai kilu. 6 Abaꞌ ku ninga ari tengah keempat mahlok nyaꞌ adai goꞌ te madah, “Dua mok ganom te bayek rega ya kaꞌ nikeꞌ sama abaꞌ upah kreja sari, piyaꞌ gaꞌ rega enam mok ganom te nadai bayek. Uleh rega binyak saiton abaꞌ angor nadai nikeꞌ.”
7 Pas Anak Dumba nyaꞌ mukaꞌ metrai te keempat, baroꞌ ku ninga goꞌ mahlok te keempat madah, “Boh kitoꞌ!” 8 Ku medaꞌ demua ku adai sikoꞌ kuda te pucat upa urang mati. Nama te dudok de kuda nyaꞌ Pemati, ya daterudi Sebayan. Sebagi ari empat bagi bumi dabreꞌ ke sidaꞌ, isaꞌ sidaꞌ bekuasa munoh urang ngau perang, ngau rama lapar, ngau sampar, abaꞌ ngau kebala jelu te garang.
9 Pas Anak Dumba nyaꞌ mukaꞌ metrai te kelimaꞌ, baroꞌ ku medaꞌ de baroh mesbah adai kebala semengat urang te udah debunoh nema sidaꞌ setia madah pesau Tuhan Allah. 10 Kebala semengat nyaꞌ mangkes, jakoꞌ sidaꞌ, “O Tuhan te Ma kuasa, te kudos, abaꞌ kenaꞌ! Ageꞌ lamaꞌ nadai jalai Wan ngadel ensia te da bumi abaꞌ ngukom sidaꞌ te udah munoh kami?” 11 Baroꞌ sidaꞌ nyaꞌ mansen dabreꞌ slamar jubah puteh. Sidaꞌ dasuroh nungoꞌ setegal ageꞌ sampai pemayoh sidaꞌ lengkap. Nema ageꞌ adai kebala menyadeꞌ seiman te sama ngelayan Tuhan kaꞌ debunoh upa sidaꞌ.
12 Udah nyaꞌ ku medaꞌ Anak Dumba nyaꞌ mukaꞌ metrai te kenam, baroꞌ tejadi gempa bumi te betat amat abaꞌ mataari jadi itam upa kayen te warna itam, abaꞌ bulan bebaleꞌ mirah upa darah. 13 Kebala piyanau de langet bekatebot laboh ke bumi upa buah ara te rarah ageꞌ mantaꞌ dasepu ribot te betat. 14 Udah nyaꞌ langet tebelah abaꞌ tegileng upa gulong kitab, abaꞌ ugaꞌ buket abaꞌ pulau begansat ari teban sengket. 15 Baroꞌ ugaꞌ urang, kebala raja, kebala pejabat, kebala kepalaꞌ prajuret, kebala urang kaya, kebala urang te bekuasa, kebala ulon abaꞌ te ukai ulon, nyelabok direꞌ alam guwa abaꞌ daentara kebala batu te da buket. 16 Sidaꞌ madah ke kebala buket abaꞌ kebala batu nyaꞌ, “Tingang ke kami! Abaꞌ tapokkah kami ari pemedaꞌ Ya te dudok de bangku raja, abaꞌ ari ukom Anak Dumba nyaꞌ! 17 Ari toꞌ, ari besai senta Tuhan Allah abaꞌ Anak Dumba kaꞌ ngukom ugaꞌ urang. Niseꞌ urang te tauꞌ betan idop!”