Yohanes medaꞌ Tuhan Allah dasemah empat mahlok abaꞌ dua puloh empat pemimpen
4
Udah nyaꞌ ku medaꞌ adai suteꞌ pintu tebukaꞌ da sruga abaꞌ ku ninga goꞌ urang te udah ku dinga kah dulau teh sareng munyi goꞌ trumpet. Jakoꞌ ya, “Nikeꞌ ke kitoꞌ abaꞌ Ku kaꞌ nunyok ke meh apa te alah tejadi udah toꞌ lah.” 2 Tengan nyaꞌ mah gaꞌ Roh Kudos turon ke ku, baroꞌ ku medaꞌ da sruga adai suteꞌ bangku raja, abaꞌ adai sikoꞌ urang dudok de bangku nyaꞌ. 3 Urang te dudok de bangku nyaꞌ upa kebala batu permata te engkilat warna ijau abaꞌ mirah. Abaꞌ bangku nyaꞌ da kelileng neraja te engkilat upa batu permata te warna ijau. 4 Bangku raja nyaꞌ da kelileng dua puloh empat bangku raja te kebukai te dedudok dua puloh empat pemimpen. Sidaꞌ ngau slawar baju puteh abaꞌ ngau mahkuta mas. 5 Ari bangku raja nyaꞌ kluar kilat abaꞌ goꞌ guntor te lampar sareng, abaꞌ de mua bangku nyaꞌ adai tujoh pawai te idop. Tujoh pawai nyaꞌ, nyaꞌ mah tujoh Roh ari Tuhan Allah. 6 De mua bangku raja nyaꞌ adai utai te upa laot, uleh nyaꞌ ukai aiꞌ. Nyaꞌ kaca te puteh rantas de pedaꞌ. De tengah abaꞌ kelileng bangku raja nyaꞌ adai empat mahlok te mua belakang penoh mata. 7 Mahlok te semaru upa singa, mahlok te kedua upa sapi laki, mahlok te ketiga mua ya upa mua ensia, abaꞌ mahlok te keempat upa burong lang te tengan terbai. 8 Empat mahlok nyaꞌ mansen besayap nam, ugaꞌ tuboh datai ke sayap te bong ke dalam penoh mata. Betawas malam empat makhlok nyaꞌ nadai blepa madah,“Kudos, kudos, kudos mah Tuhan Allah te Ma kuasa.
Ya te udah adai, te adai, abaꞌ te kaꞌ datai.”
9 Empat mahlok nyaꞌ muji, mreꞌ hormat, abaꞌ besukor ke Ya, te dudok de bangku raja nyaꞌ abaꞌ te idop sengabot. Ngenap kaleꞌ kebala mahlok nyaꞌ mulah piyaꞌ, 10 dua puloh empat pemimpen nyaꞌ tesungkor demua Ya te dudok de bangku raja, abaꞌ sidaꞌ nyemah Ya te idop sengabot. Sidaꞌ nepoꞌ kebala mahkuta te dengau sidaꞌ ke mua bangku nyaꞌ abaꞌ madah,
11 “O Tuhan, Allah kami!
Wan te patot nrimaꞌ puji, hormat, abaꞌ kuasa.
Nema Wan te udah mulah ugaꞌ utai.
abaꞌ tegal penekaꞌ Wan ugaꞌ nyaꞌ adai abaꞌ dapulah.”