Pesau Isa ke jemat te adai de kuta Sardes
3
“Tules ke toꞌ ke mlikat jemat de kuta Sardes:Toꞌ mah pesau Ku te empu tujoh Roh ari Tuhan Allah abaꞌ te megai tujoh piyanau nyaꞌ. Ku tauꞌ badaꞌ apa te kitaꞌ kreja, urang miker kitaꞌ idop, bataꞌ naꞌ kitaꞌ mati! 2 Dani abaꞌ pedaꞌ! Kuat ke apa te ageꞌ adai te amper mati, nema Ku medaꞌ datai ke suteꞌ niseꞌ kreja kitaꞌ te udah de pemedaꞌ Allah Ku. 3 Kebaꞌ nyaꞌ ingat ke apa te udah deajar abaꞌ apa te udah kitaꞌ dinga ke meliyaꞌ. Tunaꞌ ke nyaꞌ abaꞌ dudi ke kebala dusa kitaꞌ! Enteꞌ kitaꞌ nadai dani, Ku kaꞌ datai upa pencuri abaꞌ kitaꞌ nitauꞌ badaꞌ kmaya Ku datai ke kitaꞌ. 4 Uleh de Sardes adai dua tiga ikoꞌ urang te ngai ngutor selawar baju direꞌ. Sidaꞌ nyaꞌ kaꞌ bejalai abaꞌ Ku ngau selawar baju puteh, nema sidaꞌ patot ngau nyaꞌ.
5 Ngenap urang te menang, sidaꞌ kaꞌ dakenaꞌ gaꞌ ke selawar baju puteh te upa nyaꞌ. Ku nadai kaꞌ ngapos nama sidaꞌ ari Kitab Kehidopan. Abaꞌ Ku kaꞌ ngakoꞌ sidaꞌ urang te daempu Ku de mua Apai Ku abaꞌ kebala mlikat Ya.
6 Sapa jaꞌ kitaꞌ te bapeneng, tinga ke apa te depadah Roh ke kebala jemat!”
Pesau Isa ke jemat te adai de kuta Piladelpia
7 “Tules kah toꞌ ke mlikat jemat de kuta Piladelpia:
Toꞌ mah pesau Ku Te Kudos, abaꞌ Te Kenaꞌ. Ku mah te megai kunci pemrintah raja Daot. Enteꞌ Ku mukaꞌ pintu, niseꞌ te tauꞌ nikop abaꞌ enteꞌ Ku nikop pintu, niseꞌ te tauꞌ mukaꞌ. 8 Ku tauꞌ badaꞌ kebala te kitaꞌ pulah. Pedaꞌ! Ku udah mukaꞌ pintu ke kitaꞌ, abaꞌ niseꞌ urang te tauꞌ nutop. Ku tauꞌ badaꞌ kitaꞌ nadai gulong kuat uleh kitaꞌ nunaꞌ apa te Ku ajar ke kitaꞌ abaꞌ kitaꞌ nadai kalaꞌ madah direꞌ nadai nglala Ku. 9 Pedaꞌ! Adai dua tiga ikoꞌ urang jemat Ibles kepalaꞌ bala sitan. Sidaꞌ nyaꞌ bulaꞌ, sidaꞌ nyaꞌ ngakoꞌ direꞌ sidaꞌ Yahudi te patoh ke Tuhan Allah uleh te pengamat nadai piyaꞌ. Ku kaꞌ nyerah sidaꞌ ke kitaꞌ. Ku kaꞌ nyuroh sidaꞌ datai tesungkor demua kaki kitaꞌ abaꞌ sidaꞌ tauꞌ badaꞌ Ku kaseh ke kitaꞌ. 10 Nema kitaꞌ udah tekon nunaꞌ te Ku printah ke kitaꞌ, kebaꞌ nyaꞌ Ku kaꞌ ngelinong kitaꞌ ari rama pemedeh te kaꞌ ngenaꞌ ugaꞌ dunia. Kebala utai nyaꞌ kaꞌ tejadi ngau nguji ugaꞌ urang de dunia. 11 Ku nyau kaꞌ datai. Kitaꞌ alah slareh pecayaꞌ ke Ku, isaꞌ niseꞌ urang te tauꞌ ngameꞌ mahkuta te kitaꞌ trimaꞌ ke ngau upah kitaꞌ menang.
12 Ngenap urang te menang kaꞌ Ku jadi ke tiang Rumah Kudos Tuhan Allah Ku, abaꞌ sidaꞌ jong diyau diyaꞌ sengabot. Nema sidaꞌ empu Ku kebaꞌ Ku kaꞌ nules nama Ku abaꞌ nama kuta Allah Ku. Kuta nyaꞌ Yerosalem baru te turon ari sruga. Abaꞌ Ku kaꞌ nules de sidaꞌ nama Ku te baru.
13 Sapa jaꞌ kitaꞌ te bapeneng, tinga ke apa te depadah Roh ke kebala jemat!”
Pesau Isa ke jemat te adai de kuta Laudikia
14 “Tules kah toꞌ ke mlikat jemat de kuta Laudikia:
Toꞌ mah pesau ari Ku te dagelar Amen nema Ku te mulah ugaꞌ danyi Tuhan Allah jadi. Ku mah saksi te setia abaꞌ kenaꞌ. Ari Ku mah Tuhan Allah mulah ugaꞌ utai. 15 Ku tauꞌ badaꞌ apa te kitaꞌ pulah: kitaꞌ nadai angat abaꞌ nadai celap. Lebeh bayek kitaꞌ angat skaleꞌ enteꞌ nadai celap! 16 Uleh nema kitaꞌ nyiloꞌ kuku, nadai angat abaꞌ nadai celap, kebaꞌ Ku ngeluwaꞌ kitaꞌ ari mulot Ku. 17 Kitaꞌ madah direꞌ, ‘Kami kaya abaꞌ serba cukop, niseꞌ te niseꞌ de kami.’ Uleh kitaꞌ nadai tauꞌ badaꞌ enteꞌ idop kitaꞌ lampar merinsaꞌ abaꞌ pedeh! Kitaꞌ misken, telanyang, abaꞌ butaꞌ. 18 Kebaꞌ nyaꞌ nyuroh Ku ngajar kitaꞌ, beli ke ari Ku mas te udah dabreseh alam api, isaꞌ kitaꞌ jadi kaya. Beli ke selawar baju puteh ari Ku abaꞌ ngau ke nyaꞌ isaꞌ kitaꞌ nadai telanyang abaꞌ malu. Abaꞌ beli kah ubat ngau ngunsot mata kitaꞌ isaꞌ kitaꞌ tauꞌ medaꞌ. 19 Ngenap urang te Ku kaseh, Ku rara abaꞌ Ku ukom, kebaꞌ nyaꞌ kitaꞌ alah slareh ransak abaꞌ nudi kebala dusa kitaꞌ.
20 Pedaꞌ! Ku diri de mua pintu abaꞌ ngumai. Enteꞌ adai urang ninga goꞌ Ku abaꞌ nukang pintu, Ku kaꞌ tamaꞌ ngusong ya, abaꞌ kami kaꞌ brama makai.
21 Ngenap urang te menang, kaꞌ Ku suroh ke dudok abaꞌ Ku de bangku raja teban Ku dudok, sama upa medaꞌ Ku udah menang abaꞌ dudok abaꞌ Apai Ku de bangku raja teban penudok Ya.
22 Sapa jaꞌ kitaꞌ te bapeneng, tinga ke apa depadah Roh ke kebala jemat!”