Pesau Isa ke jemat te adai de kuta Episos
2
Baroꞌ Isa madah ke ku, “Tules ke mlikat jemat te adai de kuta Episos:Toꞌ mah pesau ari Ku, te megai tujoh piyanau de jari kanan Ku, abaꞌ te bejalai de entara tujoh tiang kelita te depulah ari mas. 2 Ku tauꞌ badaꞌ apa te kitaꞌ pulah, kati kitaꞌ brunteꞌ kreja abaꞌ kati kitaꞌ tan ngasa pemedeh nema kitaꞌ pecayaꞌ ke Ku. Ku tauꞌ badaꞌ gaꞌ kitaꞌ nadai ngengaꞌ kebala urang te jat. Kitaꞌ udah nguji sidaꞌ te madah direꞌ rasol, uleh te pengamat sidaꞌ ukai rasol. Kitaꞌ udah nemu bukti enteꞌ sidaꞌ nyaꞌ kebala urang te mangah ngemulaꞌ. 3 Kitaꞌ selareh sabar ngasa pemedeh tegal nama Ku, abaꞌ kitaꞌ nadai kalaꞌ nyerah. 4 Uleh amat piyaꞌ, Ku mejah kitaꞌ, nema kitaꞌ udah nudi kaseh kitaꞌ te semaru. 5 Kebaꞌ nyaꞌ ingat ke pemesai kaseh kitaꞌ meliyaꞌ ke Ku! Dudi kebala dusa kitaꞌ abaꞌ pulah ke ageꞌ apa te meliyaꞌ udah kitaꞌ pulah. Enteꞌ kitaꞌ ngai nudi kebala dusa kitaꞌ, Ku kaꞌ datai ngameꞌ tiang kelita mas kitaꞌ ari peniyau ya. 6 Uleh Ku muji kitaꞌ nema kitaꞌ areh ke apa te depulah kebala muret Nikulawos, te dekareh Ku gaꞌ. 7 Sapa jaꞌ kitaꞌ te bapeneng, tinga ke apa te depadah Roh ke kebala jemat!
Ngenap urang te menang, sidaꞌ kaꞌ Ku bereꞌ makai ari buah pon kehidopan te adai de kebon Tuhan Allah.”
Pesau Isa ke jemat te adai de kuta Smerna
8 “Abaꞌ tules ke mlikat jemat te adai de kuta Smerna:
Toꞌ mah pesau ari Ku, Ku mah Te Semaru abaꞌ Te Pemadoꞌ, te udah mati abaꞌ idop ageꞌ. 9 Ku tauꞌ badaꞌ kebala pemedeh te kitaꞌ asa, abaꞌ Ku tauꞌ badaꞌ kitaꞌ mesken, uleh kitaꞌ kaya! Ku tauꞌ badaꞌ adai urang te gah mejaiꞌ kitaꞌ. Sidaꞌ nyaꞌ ngakoꞌ direꞌ sidaꞌ Yahudi te patoh ke Tuhan Allah, uleh te pengamat nadai piyaꞌ. Sidaꞌ nyaꞌ jemat Ibles, kepalaꞌ kebala sitan. 10 Nang takot ke pemedeh te alah kitaꞌ asa. Dinga kah! Ibles kaꞌ majak dua tiga ikoꞌ urang te adai de entara kitaꞌ ke alam penyara ngau encuba kitaꞌ, abaꞌ kitaꞌ kaꞌ ngasa pemedeh selamaꞌ sepuloh ari. Kitaꞌ alah setia ke Ku datai ke mati, abaꞌ Ku kaꞌ mereꞌ mahkuta kehidopan. 11 Sapa jaꞌ kitaꞌ te bepeneng, tinga ke apa te depadah Roh ke kebala jemat!
Ngenap urang te menang, sidaꞌ nadai ngasa pemati te kedua.”a
Pesau Isa ke jemat te adai de kuta Pergamos
12 “Abaꞌ tules ke mlikat jemat te adai de kuta Pergamos:
Toꞌ mah pesau Ku, te empu pedang tajam te bemata dua. 13 Ku tauꞌ badaꞌ enteꞌ kitaꞌ diyau de teban Ibles kepalaꞌ kebala sitan mrintah, uleh kitaꞌ selareh setia ke Ku. Kitaꞌ nadai kalaꞌ madah direꞌ nadai pecayaꞌ ke Ku. Amat mah kitaꞌ medaꞌ Antipas debunoh de kuta kitaꞌ, teban Ibles mrintah kitaꞌ uleh kitaꞌ selareh tegoh. Antipas toꞌ saksi Ku te setia ke Ku. 14 Uleh amat piyaꞌ adai dua tiga uteꞌ te Ku pejah ke kitaꞌ. Ku medaꞌ adai de entara kitaꞌ te nunaꞌ pengajar Beliam. Meliyaꞌ Beliam toꞌ urang te ngajar Balak kati nyuroh sidaꞌ Israel mulah dusa. Sidaꞌ dusa nema sidaꞌ udah makai pesemah te udah depesemah ke pentek abaꞌ gah bekamoh tinok abaꞌ urang te ukai laki bini direꞌ. 15 Piyaꞌ gaꞌ adai de entara kitaꞌ te bapegai ke pengajar kebala muret Nikulawos. 16 Kebaꞌ nyaꞌ dudi kebala dusa kitaꞌ! Enteꞌ kitaꞌ nadai mulah piyaꞌ, Ku kaꞌ sintak datai ke kitaꞌ abaꞌ merang sidaꞌ nyaꞌ ngau pedang te adai de mulot Ku toꞌ. 17 Sapa jaꞌ kitaꞌ te bepeneng, tinga ke apa te depadah Roh ke kebala jemat!
Ngenap urang te menang, kaꞌ Ku bereꞌ manna te detapok, abaꞌ kaꞌ Ku bereꞌ ke batu puteh. De atau batu nyaꞌ detules nama baru, te nadai deketauꞌ urang, bukai ari te nerimaꞌ batu nyaꞌ.”
Pesau Isa ke jemat te adai de kuta Tiatira
18 “Tules ke mlikat jemat te adai de kuta Tiatira:
Toꞌ mah pesau Ku Anak Tuhan Allah, te empu mata upa jelar api abaꞌ kaki Ku upa temaga te engkilat. 19 Ku tauꞌ badaꞌ ugaꞌ te kitaꞌ pulah. Ku tauꞌ badaꞌ kitaꞌ kaseh ke pangan, kitaꞌ pecayaꞌ, kitaꞌ setia ngelayan Ku, abaꞌ kitaꞌ tan ngasa pemedeh. Ku tauꞌ badaꞌ entoꞌ kitaꞌ lebeh mayoh kreja debaneng ke dulau jalai semaru kitaꞌ pecayaꞌ. 20 Uleh Ku mejah kitaꞌ nema kitaꞌ ngengaꞌ Isabel, inoꞌ te ngakoꞌ direꞌ nabi nyaꞌ, nesat kebala pelayan Ku. Ya ngajar sidaꞌ bekamoh tinok abaꞌ urang te ukai laki bini direꞌ abaꞌ makai kebala utai te depesemah ke pentek. 21 Ku udah mereꞌ waktu ngau ya nudi kebala dusa, uleh ya ngai badoꞌ bekamoh tinok abaꞌ urang te ukai laki bini direꞌ. 22 Ku kaꞌ ngasoh inoꞌ nyaꞌ galer kegaler pedeh de atau peninok ya, abaꞌ Ku kaꞌ ngasoh urang te baraꞌ abaꞌ ya lampar berat ngasa pemedeh enteꞌ sidaꞌ ngai nudi dusa sidaꞌ te upa dusa inoꞌ nyaꞌ. 23 Kebala muret ya kaꞌ Ku bunoh gaꞌ isaꞌ kebala jemat tauꞌ badaꞌ enteꞌ Ku toꞌ Ya te tauꞌ badaꞌ pemiker abaꞌ ati ensia. Ngenap kitaꞌ kaꞌ Ku balas ke nunaꞌ apa te kitaꞌ pulah. 24 Uleh kitaꞌ te kebukai te de Tiatira nadai nunaꞌ pengajar inoꞌ nyaꞌ. Kitaꞌ nadai belajar pengajar te depadah sidaꞌ ilmu Ibles, kepalaꞌ kebala sitan. Ku madah ke kitaꞌ, Ku nadai kaꞌ ngemerat kitaꞌ ngau kreja te kebukai. 25 Uleh apa te adai de kitaꞌ, pegai amat ke nyaꞌ sampai ke Ku datai.
26 Ngenap urang te menang abaꞌ te selareh mulah apa te dekedekaꞌ Ku datai ke pemadoꞌ, kaꞌ Ku bereꞌ ke kuasa ngau mrintah kebala bansa. 27 Sidaꞌ kaꞌ mrintah kebala bansa ngau tungkat besi abaꞌ ngerepau kebala bansa upa ngerepau sampau te depulah ari tanah.b 28 Sidaꞌ kaꞌ nerimaꞌ kuasa te ngau mrintah upa te udah Ku trimaꞌ ke ari Apai Ku. Abaꞌ Ku kaꞌ mereꞌ sidaꞌ piyanau timor.
29 Sapa jaꞌ kitaꞌ te bepeneng, tinga ke apa te depadah Roh ke kebala jemat.”