Prajuret Isa te bayek
2
Timutios, anak ku, meh alah nguat direꞌ ngau pemayek ati Tuhan Allah te dabreꞌ ari Isa Al Maseh ke kita. 2 Apa te udah ku ajar ke meh de mua urang banyau, ajar kah ugaꞌ nyaꞌ ke kebala urang te tauꞌ dapecayaꞌ, abaꞌ te anal ngajar pangan bukai. 3 Meh alah ngasa pemedeh upa prajuret Isa Al Maseh te bayek. 4 Prajuret te tengan tugas, nadai sibok ke kebala pengidop direꞌ, ya mulah piyaꞌ isaꞌ ati kepalaꞌ prajuret gaga. 5 Sama upa medaꞌ urang te ulah raga alah nunaꞌ prator isaꞌ ya tauꞌ menang buleh juara. 6 Abaꞌ urang te bepanteng tulang ngreja uma direꞌ, ya mah te alah semaru ngasa asel kreja direꞌ. 7 Prati ke apa te ku padah ke toꞌ nema Tuhan Allah kaꞌ nulong meh isaꞌ meh nyarok ke ugaꞌ nyaꞌ. 8 Ingat kah Isa Al Maseh, pureh Daot; Ya mah Al Maseh te udah idop ageꞌ ari pemati. Toꞌ mah Brita Bayek te ku padah ke kebala urang. 9 Tegal ku madah Brita Bayek toꞌ mah, ku ngasa idop pedeh; ku sampai dapenyara upa medaꞌ urang te mulah pemenyaiꞌ. Uleh pesau Tuhan Allah niseꞌ urang te talah ngetan. 10 Nyaꞌ mah te ngasoh ku sabar nangong ugaꞌ pemedeh toꞌ. Ku mulah toꞌ ngau nalau kebala urang te dapileh Tuhan Allah, isaꞌ sidaꞌ daslamat Isa Al Maseh abaꞌ dajunyong tingeꞌ abaꞌ Isa sengabot. 11 Amat mah toꞌ:“Enteꞌ kita udah mati abaꞌ Ya,
kita kaꞌ idop gaꞌ abaꞌ Ya;
12 enteꞌ kita tan ngasa pemedeh,
kita kaꞌ mrintah abaꞌ Ya;
enteꞌ kita ngai ngakoꞌ Ya,
Ya ngai gaꞌ ngakoꞌ kita.a
13 Enteꞌ kita nadai setia, Ya slareh setia,
nema Ya nitauꞌ ngelawan direꞌ.”
Pelayan te patot
14 Timutios ingat ke ugaꞌ pengajar ku toꞌ ke jemat. Demua Tuhan Allah, padah ke sidaꞌ bamat-amat isaꞌ sidaꞌ nadai betengek ke kebala cakap te niseꞌ reti. Betengek ke te piyaꞌ sama skaleꞌ niseꞌ guna, empala ngamaꞌ kebala urang te ninga. 15 Brusaha bamat-amat ke meh isaꞌ Tuhan Allah ngakoꞌ meh patot ngau playan Ya. Brusaha ke meh isaꞌ nadai malu ke apa te meh kreja, abaꞌ ajar kah pengajar te kenaꞌ ari Tuhan Allah, abaꞌ cara meh ngajar alah bayek. 16 Nang meh ngamoh direꞌ abaꞌ urang te becakap ke utai te niseꞌ guna te nadai suci. Kebala cakap te piyaꞌ tumas naꞌ ngasoh urang empala jat. 17 Cakap sidaꞌ nyaꞌ upa medaꞌ panyaket kangker nangker kenangker. Daentara sidaꞌ te becakap nyaꞌ adai Himenios abaꞌ Pilitos. 18 Sidaꞌ udah limpang ari pengajar te kenaꞌ, nema sidaꞌ madah urang te pecayaꞌ ke Isa udah idop ageꞌ ari pemati. Nyaꞌ nyuroh adai kedaꞌ urang nadai pecayaꞌ ke Isa ageꞌ. 19 Uleh Tuhan Allah niri jemat upa medaꞌ urang te ngletak dasar te tegoh. De atau dasar nyaꞌ dakelaiꞌ ngau tules upa pitoꞌ, “Tuhan Allah nglala kebala urang te daempu Ya” abaꞌ “Urang te nyemah Ya alah nudi te jat.” 20 Alam rumah te besai abaꞌ bayek adai brena macam barang. Adai te dapulah ari pirak, abaꞌ ari mas, uleh adai gaꞌ te ari kayu abaꞌ ari tanah. Adai te dengau kusos, abaꞌ adai gaꞌ te dengau ari-ari. 21 Urang te mreseh direꞌ ari ugaꞌ te jat, urang nyaꞌ kaꞌ dengau kusos. Ya dabreseh isaꞌ patot dengau tuan ya abaꞌ deageh ngau kreja te bayek. 22 Kebaꞌ nyaꞌ Timutios jaoh ke direꞌ meh ari kebala utai te jat te dapulah urang mudaꞌ. Brusaha ke meh abaꞌ urang te pecayaꞌ ke Tuhan Allah idop nunaꞌ penekaꞌ Ya, setia ke Ya, kaseh ke sama direꞌ, abaꞌ bedamai abaꞌ pangan bukai. 23 Nang betengek ke utai te niseꞌ reti. Meh tauꞌ badaꞌ enteꞌ ugaꞌ nyaꞌ tumas naꞌ nimol pelayaꞌ. 24 Urang te ngelayan Tuhan Allah nang blayaꞌ; alah ritak abaꞌ ugaꞌ urang, panai ngajar, abaꞌ sabar. 25 Sidaꞌ alah lulot ngajar kebala urang te gah ngelawan; engkremaꞌ Tuhan Allah mreꞌ waktu ke kebala urang nyaꞌ nudi kebala dusa sidaꞌ, abaꞌ sidaꞌ tauꞌ badaꞌ pengajar te kenaꞌ. 26 Pengajar nyaꞌ te tauꞌ nyadar sidaꞌ ageꞌ, abaꞌ te tauꞌ ngelepas sidaꞌ ari perangkap Ibles kepalaꞌ bala sitan te udah ngurong sidaꞌ abaꞌ mukong sidaꞌ nunaꞌ penekaꞌ ya.