2 Timutios 1

SURAT PAULOS TE KEDUA KE

TIMUTIOS

Kirem tabeꞌ ke Timutios

1-2 Surat toꞌ ari ku, Paulos, ke meh Timutios anak ku te ma ku kaseh, ku ngagam Tuhan Allah Apai kita abaꞌ Isa Al Maseh Tuhan kita, nganyaꞌ pemayek ati Ya, nganyaꞌ pengaseh Ya, abaꞌ mereꞌ idop penoh damai. Ku toꞌ rasol Isa Al Maseh. Ku jadi rasol nunaꞌ penekaꞌ Tuhan Allah. Ya kaꞌ isaꞌ ku madah idop te dedanyi Tuhan Allah. Kita tauꞌ buleh idop nyaꞌ nema kita suteꞌ abaꞌ Isa Al Maseh.

Paulos besukor medaꞌ idop Timutios abaꞌ ngansak ya isaꞌ ya kuat

3 Ku ngucap sukor ke Tuhan Allah te ku layan, ngau ati nurani te breseh upa te depulah puyang jagang ku meliyaꞌ. Ngenap kaleꞌ ku bradua, betawas malam, ku ingat sengabot nyebot nama meh. 4 Ku ingat ke sabak meh jalai ku angkat, nyaꞌ mah te ngasoh ku kaꞌ amat betemu abaꞌ meh ageꞌ, isaꞌ ati ku betamah gaga. 5 Ku ingat iman meh te tulos ke Isa Al Maseh, upa medaꞌ iman ineꞌ meh Luwes abaꞌ inai meh Yuniki. Ku pecayaꞌ meh upa piyaꞌ. 6 Kebaꞌ nyaꞌ meh alah rajen ngau krunia te udah debereꞌ Tuhan Allah ke meh, jalai ku bradua ngeletak jari ke atau meh. 7 Roh Kudos te Tuhan Allah bereꞌ ke kita, ukai Roh te ngasoh kita takot. Uleh Roh te ngasoh kita kuat, kaseh ke pangan, abaꞌ talah ngetat direꞌ.

8 Kebaꞌ nyaꞌ nang malu besaksi nusoi Tuhan Isa Al Maseh, abaꞌ nang malu madah direꞌ ngelala ku, urang te depenyara tegal Isa. Meh alah ngau kuasa Tuhan Allah te debereꞌ ke meh abaꞌ meh alah upa ku kaꞌ idop pedeh tegal madah Brita Bayek. 9 Tuhan Allah udah nyelamat abaꞌ ngumai kita isaꞌ kita idop suci. Ukai tegal apa te depulah kita, uleh sebedau dunia toꞌ depulah Tuhan Allah, Ya lamaꞌ ngamoꞌ nganyaꞌ pemayek ati Ya ngau cara ngutos Isa Al Maseh nyelamat kita. 10 Abaꞌ entoꞌ Tuhan Allah udah nganyaꞌ pemayek ati Ya ngau penatai Raja Penyelamat kita, Isa Al Maseh. Isa udah menang ari kuasa te nyuroh mati abaꞌ ngau Brita Bayek nyaꞌ, Ya ngemaiꞌ kita jong idop abaꞌ Tuhan Allah sengabot. 11 Abaꞌ isaꞌ Brita Bayek nyaꞌ empala nyebar, Tuhan Allah te nyuroh ku madah abaꞌ ngajar Brita Bayek nyaꞌ, abaꞌ ngangkat ku jadi rasol Isa Al Maseh. 12 Nyaꞌ mah te ngasoh ku ngasa idop pedeh, uleh amat piyaꞌ ku nadai malu, nema ku ngelala sapa te ku pecayaꞌ. Ku yaken enteꞌ Ya talah ngintu utai te udah depecayaꞌ Ya ke ku, datai ke senta Tuhan Allah ngukom ugaꞌ urang.

13 Pegai ke bamat-amat ugaꞌ utai te udah meh dinga ari ku ngau cuntoh pengajar te kenaꞌ, abaꞌ pulah ke ugaꞌ nyaꞌ ngau iman abaꞌ kaseh te adai alam Isa Al Maseh. 14 Pengajar toꞌ reta te lampar bayek te udah depecayaꞌ Tuhan Allah ke kita. Kebaꞌ nyaꞌ jaga bayek-bayek ke utai te brega nyaꞌ ngau kuasa Roh Kudos te diyau alam kita.

15 Meh tauꞌ badaꞌ urang te de Asia nyau ngai ke ku, temasok Pigelos abaꞌ Hermuginis. 16 Uleh Unisepuros keran merinang ku. Ku bradua isaꞌ Tuhan Allah nganyaꞌ pemayek ati Ya ke keluarga ya. Unisepuros nadai malu betemu abaꞌ ku amat mah ku alam penyara. 17 Pas ya datai ke kuta Ruma, ya berusaha ngigaꞌ ku sampai ya nemu ku. 18 Abaꞌ meh tauꞌ badaꞌ de Episos ya mayoh amat nalau ku. Engkremaꞌ Tuhan Allah nganyaꞌ pengaseh ke ya senta Tuhan Allah ngukom ugaꞌ urang.