Cara mimpen jemat
5
Nang kasar nganoꞌ kebala urang laki te tuai, padah ke sidaꞌ upa medaꞌ meh madah apai direꞌ. Rara ke kebala miyak laki te biyak ari meh upa ngerara menyadeꞌ direꞌ. 2 Bayek-bayek ke meh abaꞌ urang inoꞌ te tuai upa medaꞌ meh abaꞌ inai direꞌ. Abaꞌ bayek-bayek ke meh abaꞌ urang inoꞌ te biyak ari meh upa medaꞌ meh abaꞌ menyadeꞌ direꞌ ngau tulos ati.Cara jemat merati kebala inoꞌ te balu
3 Prati ke inoꞌ balu te diyau kedireꞌ. 4 Uleh enteꞌ balu nyaꞌ ageꞌ adai anak abaꞌ ucoꞌ, kebala anak ucoꞌ ya alah belajar ngintu inai direꞌ abaꞌ malas budi urang tuai abaꞌ ineꞌ sidaꞌ, nema nyaꞌ te mulah ati Tuhan Allah gaga. 5 Inoꞌ balu te ngidop direꞌ, sidaꞌ ngagam Tuhan Allah abaꞌ bradua sengabot betawas malam. 6 Uleh kebala balu te gaga muas direꞌ, ya nyau mati rohani amat ya ageꞌ idop. 7 Ingat ke kebala utai nyaꞌ ke ugaꞌ jemat isaꞌ sidaꞌ niseꞌ pejah. 8 Uleh enteꞌ adai urang te ngai ngintu kebala manal menyadeꞌ direꞌ apa klageꞌ iseꞌ bilek direꞌ, ya nadai patoh ke pengajar te kenaꞌ abaꞌ ya lebeh jat ari urang te nadai pecayaꞌ.
9 Sidaꞌ te masok daptar kelumpok balu te tauꞌ debantoꞌ, toꞌ peroꞌ sidaꞌ te enam puloh taon ke atau, te baroꞌ sekaleꞌ belaki. 10 Abaꞌ sidaꞌ udah dekelala mulah te bayek, upa medaꞌ ngintu miyak direꞌ, rumah ya gah jalai urang bemalam, ngelayan kebala menyadeꞌ seiman, nalau urang te idop pedeh, abaꞌ selareh siap mulah te bayek.
11 Nang naptar kebala balu te ageꞌ biyak ke kelumpok balu, nema enteꞌ sidaꞌ nadai tan abaꞌ kaꞌ belaki ageꞌ, sidaꞌ kelupa ke danyi direꞌ enteꞌ sidaꞌ kaꞌ ngelayan Al Maseh jaꞌ. 12 Enteꞌ sidaꞌ belaki ageꞌ ukom kaꞌ datai ke sidaꞌ nema sidaꞌ nadai setia ke danyi direꞌ te semaru. 13 Bukai ari nyaꞌ, kebala balu te ageꞌ biyak mames ari sidaꞌ ngau branau kiyaꞌ-kitoꞌ. Sidaꞌ luntos-kelalah abaꞌ gah mejaiꞌ urang abaꞌ kalot ke urang bukai. Sidaꞌ gah becakap ke utai te nadai patot decakap. 14 Nyaꞌ nyuroh ku kaꞌ isaꞌ kebala balu te ageꞌ biyak belaki ageꞌ, sidaꞌ beranak, nguros keluarga direꞌ ngau bayek, isaꞌ kebala urang te areh ke kita nitauꞌ mejaiꞌ kita. 15 Ku madah pitoꞌ nema adai dua tiga ikoꞌ balu te tesat abaꞌ sidaꞌ idop nunaꞌ kedekaꞌ Ibles Kepalaꞌ kebala sitan.
16 Enteꞌ kitaꞌ urang te udah pecayaꞌ ke Isa adai keluarga te balu, kitaꞌ alah mantoꞌ sidaꞌ isaꞌ sidaꞌ nadai jadi beban jemat. Abaꞌ isaꞌ jemat tauꞌ mantoꞌ sidaꞌ te bamat-amat balu.
Kebala petunyok te kebukai
17 Kebala pemimpen jemat te bekreja ngau bayek alah dehormat, abaꞌ debereꞌ upah te patot, apa klageꞌ sidaꞌ te kusos kotbah abaꞌ ngajar. 18 Sidaꞌ patot dehormat, nema adai depadah alam Kitab Suci upa pitoꞌ, “Nang kitaꞌ namet nyawa sapi te tengan ngirek ganom,”a abaꞌ “Urang te kreja patot nerimaꞌ upah.”b
19 Adu meh ninga kebala te detudoh urang ke kebala pemimpen jemat, kecuali enteꞌ adai dua tiga ikoꞌ urang kaꞌ ngau saksi.c 20 Kebala pemimpen jemat te mulah dusa alah derara de mua jemat, isaꞌ kebala jemat te kebukai takot.
21 De mua Tuhan Allah abaꞌ Isa Al Maseh abaꞌ kebala mlikat te depileh Ya, ku nyuroh meh isaꞌ meh nunaꞌ kebala petunyok te baroꞌ ku padah ke meh. Abaꞌ pulah ke ugaꞌ toꞌ ngau ugaꞌ jemat, nang nyemeh mipeh urang. 22 Nang beburoh gilaꞌ kaꞌ ngeletak jari, bradua ngelantek sidaꞌ jadi pemimpen jemat. Nema asa meh beburoh ngelantek sidaꞌ, enteꞌ urang nyaꞌ mulah dusa meh lah te desalah. Kebaꞌ meh alah nyaga idop meh isaꞌ meh idop kudos.
23 Timutios, nang meh peroꞌ nginom aiꞌ mati gena, inom ke gaꞌ aiꞌ angor siket ngau entama perot meh te gah pedeh.
24 Adai dusa dua tiga ikoꞌ urang, lamaꞌ nyau deketauꞌ sebedau sidaꞌ depresa. Uleh adai gaꞌ dusa te pedeh deketauꞌ, nyau kelamaꞌ baroꞌ mah ketauꞌ. 25 Upa piyaꞌ gaꞌ kebala utai te bayek te depulah urang. Adai te sintak pedaꞌ, adai gaꞌ te nadai sintak pedaꞌ, uleh apa te udah depulah sidaꞌ nadai talah tapok sengabot.