Tugas Timutios ngadap kebala urang te ngajar tesat
4
Roh Kudos tegas madah de waktu te kemua lah, urang nadai ageꞌ pecayaꞌ ke te deajar Al Maseh sidaꞌ patoh ke roh te nesat urang abaꞌ pengajar kebala sitan. 2 Pengajar nyaꞌ datusoi kebala urang te mangah ngemulaꞌ te budi-budi bayek. Ati nurani sidaꞌ nyau ngematu nyaꞌ ngasoh sidaꞌ nitauꞌ mileh te dapulah sidaꞌ kenaꞌ ke salah. 3 Sidaꞌ ngerot urang belaki bini, ngerot urang makai te dapulah Tuhan Allah. Bataꞌ Tuhan Allah mulah pemakai nyaꞌ isaꞌ datrimaꞌ kebala urang pecayaꞌ te tauꞌ badaꞌ pengajar te kenaꞌ, ngau sukor ke Tuhan Allah. 4 Ugaꞌ te dapulah Tuhan Allah nyaꞌ bayek niseꞌ te najes enteꞌ datrimaꞌ ngau besukor ke Tuhan Allah. 5 Ugaꞌ nyaꞌ dabreseh uleh pesau ari Tuhan Allah abaꞌ uleh pradua. 6 Enteꞌ meh slareh ngingat pengajar nyaꞌ ke kebala menyadeꞌ kita, meh jadi playan Al Maseh te bayek. Blumaꞌ meh ngajar ugaꞌ nyaꞌ meh alah mekal direꞌ ngau pesau Tuhan Allah abaꞌ pengajar te kenaꞌ te meh tunaꞌ slamaꞌ toꞌ. 7 Nang mames ari meh ngau ninga kebala kisah te dapulah-pulah. Uleh meh alah ngelateh direꞌ belajar idop nunaꞌ kedekaꞌ Tuhan Allah. 8 Lateh jasmani nadai mayoh guna, uleh ngelateh direꞌ belajar idop nunaꞌ kedekaꞌ Tuhan Allah toꞌ beguna alam ugaꞌ utai nema adai danyi ngau idop entoꞌ abaꞌ ngau idop te kaꞌ datai jemah lah. 9 Apa te udah ku padah toꞌ amat mah abaꞌ tauꞌ dapecayaꞌ. 10 Kebaꞌ nyaꞌ kita mati-mati kreja abaꞌ bejuang nema kita pecayaꞌ ke Tuhan Allah te idop. Penyelamat ugaꞌ ensia, kusos urang te udah pecayaꞌ ke Ya.11 Padah abaꞌ ajar ke ugaꞌ nyaꞌ. 12 Nang sampai adai urang te menadai meh tegal meh ageꞌ biyak. Meh alah jadi cuntoh ngau kebala urang te pecayaꞌ bayek alam cakap meh, bayek tingkah laku meh, bayek kaseh meh, bayek iman meh abaꞌ idop meh te suci. 13 Sebedau ku datai, meh alah rajen maca abaꞌ ngajar Kitab Suci ke jemat, abaꞌ rajen ngansak sidaꞌ. 14 Nang lemau ngau krunia te dabreꞌ Roh Kudos ke meh, jalai kebala pemimpen jemat madah apa te kaꞌ tejadi tentang meh ari Tuhan Allah, pas sidaꞌ bradua abaꞌ ngletak jari ke atau meh. 15 Pulah kah bamat-amat ugaꞌ kebala utai te udah dasuroh ke meh isaꞌ urang medaꞌ meh nyau empala anal ngau krunia te dabreꞌ ke meh. 16 Jaga kah direꞌ meh abaꞌ jaga apa te meh ajar kah, nema ngau cara nyaꞌ meh abaꞌ ugaꞌ urang te ninga meh tauꞌ daslamat ari ukom Tuhan Allah.