Urang te tauꞌ jadi pemimpen jemat
3
Te jakoꞌ ku toꞌ kenaꞌ mah, “Urang te kaꞌ jadi pemimpen jemat, urang te kaꞌ bakreja ke kreja te bamat-amat brega.” 2 Kebaꞌ nyaꞌ pemimpen jemat toꞌ alah urang te niseꞌ pejah, alah setia kebini direꞌ,a talah ngetat direꞌ alam brena utai, panai, supan, rumah sidaꞌ gah ngau urang bemalam abaꞌ sidaꞌ anal ngajar urang, 3 ukai penginom, ukai urang te mangah ranseng, uleh sidaꞌ urang te ritak, gaga bedamai, abaꞌ nadai tamaꞌ ke duet. 4 Ya alah panai nguros keluarga ya ngau bayek, abaꞌ ngajar kebala anak ya patoh abaꞌ hormat ke ya. 5 Enteꞌ urang nitauꞌ mimpen keluarga ya kedireꞌ, kati ya tauꞌ mimpen jemat Tuhan Allah? 6 Nang mileh urang te baroꞌ pecayaꞌ jadi pemimpen jemat nema mali ya sumong abaꞌ daukom Tuhan Allah upa Ibles. 7 Urang te jadi pemimpen alah deklala bayek demua urang te nadai pecayaꞌ, isaꞌ Ibles nadai ngelaboh ya ngau kebala cakap urang te mejaiꞌ ya.Playan jemat
8 Kebala playan jemat alah urang te dahormat kebala urang. Ukai te mangah mejaiꞌ urang, ukai penginom, abaꞌ ukai urang te tamaꞌ ke duet. 9 Sidaꞌ alah bepegai ke pengajar te kenaꞌ te udah Tuhan Allah anyaꞌ ke kita, abaꞌ sidaꞌ alah idop ngau ati nurani te suci. 10 Sidaꞌ alah dacuba dulau, enteꞌ sidaꞌ niseꞌ pejah, baroꞌ sidaꞌ tauꞌ deangkat ngau playan. 11 Upa piyaꞌ gaꞌ kebala bini playan jemat alah urang te dahormat kebala urang. Sidaꞌ ukai urang te mangah mejaiꞌ urang bukai, tauꞌ ngetat direꞌ, abaꞌ tauꞌ dapecayaꞌ alam brena utai. 12 Playan jemat alah setia ke bini direꞌ. Sidaꞌ alah panai nguros kebala anak sidaꞌ abaꞌ keluarga ngau bayek. 13 Sidaꞌ te ngelayan ngau bayek kaꞌ empala dahormat urang bukai, abaꞌ nyaꞌ nyuroh sidaꞌ empala brani nusoi ke urang bukai enteꞌ sidaꞌ pecayaꞌ Isa Al Maseh.
Brita Bayek te depadah ke kita
14 Ku ngagam nadai lamaꞌ ageꞌ lah ku ngunyong meh. Uleh amat piyaꞌ, matang mah ku nules surat toꞌ ke meh, 15 isaꞌ enteꞌ ku lat datai lah, ari surat toꞌ meh kaꞌ tauꞌ badaꞌ kati kita alah idop jadi keluarga Tuhan Allah. Te demaksot keluarga Tuhan Allah nyaꞌ mah kesatuan ugaꞌ jemat empu Tuhan Allah te idop. Jemat toꞌ mah te jadi dasar abaꞌ tiang te ngetan abaꞌ te negoh pengajar te kenaꞌ ari Tuhan Allah. 16 Nitauꞌ desangkal ageꞌ lampar besai pengajar te udah deanyaꞌ Tuhan Allah ke kita:
Al Maseh jadi ensia,
Roh Kudos nganyaꞌ enteꞌ Al Maseh bamat mah Anak Tuhan Allah,
dapedaꞌ kebala mlikat,
datusoi de kebala bansa,
dapecayaꞌ kebala urang de dunia toꞌ,
deangkat ke sruga.