6
Kebala kitaꞌ te jadi ulon alah hormat ke tuan kitaꞌ, isaꞌ urang nitauꞌ mejaiꞌ nama Tuhan Allah abaꞌ pengajar Ya. 2a Kebala ulon te empu tuan te udah pecayaꞌ ke Al Maseh, nitauꞌ menadai tuan sidaꞌ tegal suteꞌ iman abaꞌ sidaꞌ. Empala sidaꞌ alah ngelayan tuan sidaꞌ lebeh bayek ageꞌ, nema te nerimaꞌ untong ari te sidaꞌ kreja ke nyaꞌ tuan sidaꞌ te sidaꞌ kaseh.Pengajar te tesat abaꞌ sikap urang te tamaꞌ ke duet
2b Ajar ke ugaꞌ utai toꞌ abaꞌ suroh ke ngenap urang mulah ugaꞌ toꞌ. 3 Enteꞌ adai urang bukai ngajar laen ari te ku ajar abaꞌ nadai setuju ke pengajar te kenaꞌ ari Tuhan kita Isa Al Maseh, abaꞌ ngai nunaꞌ pengajar te ngemaiꞌ kita idop nunaꞌ kedekaꞌ Tuhan Allah, 4 sidaꞌ urang te sumong, bataꞌ niseꞌ pemenauꞌ sidaꞌ! Penyaket sidaꞌ gaga betengek abaꞌ belayaꞌ ke reti asal usol kata. Nyaꞌ ngasoh urang iri, belayaꞌ, mejaiꞌ urang bukai, curiga ke urang bukai, 5 abaꞌ belayaꞌ niseꞌ pemadoꞌ. Pemiker sidaꞌ nyaꞌ nyau buntu abaꞌ niseꞌ te kenaꞌ. Sidaꞌ miker enteꞌ acara agama tauꞌ ngasoh sidaꞌ kaya.
6 Amat mah, acara agama toꞌ tauꞌ ngasoh kita buleh untong rohani te besai enteꞌ kita puas ngau apa te adai. 7 Kita niseꞌ ngemaiꞌ utai ke dunia toꞌ jalai kita adai, piyaꞌ gaꞌ kita niseꞌ ngemaiꞌ utai pas kita mati. 8 Nyaꞌ nyuroh kita alah puas enteꞌ adai te depakai abaꞌ te dengau. 9 Kebala urang te kaꞌ kaya, laboh ke brena utai te kaꞌ encuba sidaꞌ. Sidaꞌ detamet uleh kebala penekaꞌ te budu abaꞌ medeh direꞌ. Ugaꞌ nyaꞌ nyuroh sidaꞌ ancor abaꞌ rusak. 10 Tegal tamaꞌ ke duet urang kaꞌ mulah brena utai te jat. Abaꞌ tegal kaꞌ kaya mayoh urang te nyimpang ari pengajar Isa Al Maseh. Nyaꞌ nyuroh sidaꞌ ma tusah ati.
Pesau pemadoꞌ
11 Uleh meh Timutios, meh urang te deempu Tuhan Allah. Meh alah berusaha nang sampai mulah te jat upa piyaꞌ. Uleh meh alah berusaha mulah te dekedekaꞌ Tuhan Allah abaꞌ idop ngau cara te degaga Ya. Meh alah betamah pecayaꞌ ke Al Maseh, kaseh ke urang bukai, tan ngadap brena utai te pedeh, abaꞌ alah ritak abaꞌ urang bukai. 12 Bejuang bamat-amat ke meh idop nunaꞌ pengajar te kenaꞌ ari Al Maseh, abaꞌ meh alah berusaha isaꞌ jong idop abaꞌ Tuhan Allah. Tuhan Allah ngumai meh isaꞌ meh jong idop abaꞌ Ya. Pas tengan nyaꞌ meh ngakoꞌ de mua urang banyau enteꞌ meh pecayaꞌ ke Al Maseh. 13 Dinga kah! De mua Tuhan Allah te mereꞌ idop ke ugaꞌ utai abaꞌ de mua Isa Al Maseh te udah madah te kenaꞌ de mua Puntios Pelatos, ku mereꞌ printah toꞌ ke meh: 14 Meh alah nunaꞌ ugaꞌ utai te udah depadah ke meh ngau ati te suci isaꞌ urang nitauꞌ mejah meh, datai ke senta Tuhan kita Isa Al Maseh datai ageꞌ. 15 Penatai Ya nyaꞌ lamaꞌ udah deatoh Tuhan Allah kedireꞌ, nema Ya mah sikoꞌ-ikoꞌ te bekuasa te patot depuji, Raja te paleng tingeꞌ, Tuhan te paleng tingeꞌ. 16 Peroꞌ Ya mah te idop sengabot. Ya idop alam terang nyaꞌ te nyuroh urang nitauꞌ nungaꞌ Ya. Niseꞌ urang te udah medaꞌ Ya, abaꞌ niseꞌ urang te tauꞌ medaꞌ Ya. Tuhan Allah te patot dehormat abaꞌ depuji nema ya bekuasa belama-lama! Amen.
17 Timutios, ingat ke kebala urang te kaya de dunia toꞌ, isaꞌ sidaꞌ nadai sumong abaꞌ isaꞌ sidaꞌ nadai nganal kebala reta te nadai pesti de idop toꞌ. Uleh sidaꞌ alah pecayaꞌ Tuhan Allah te mereꞌ ugaꞌ utai blebeh-lebeh ke kita isaꞌ kita ngasa penyamai. 18 Ingat ke sidaꞌ isaꞌ sidaꞌ selareh kaꞌ nalau urang, sidaꞌ kaya kaꞌ mulah brena utai te bayek, mangah mereꞌ abaꞌ bebagi. 19 Enteꞌ sidaꞌ mulah piyaꞌ sidaꞌ ngumpol reta ngau mudal idop jemah lah. Ngau cara nyaꞌ sidaꞌ tauꞌ ngasa idop te pengamat.
20 Timutios apa te udah depecayaꞌ ke meh pulah ke nyaꞌ bamat-amat. Nang ninga kebala urang te gila becakap ke utai te niseꞌ reti te ngelawan Tuhan Allah. Sidaꞌ ngelawan Tuhan Allah ngau pemenauꞌ te deangap sidaꞌ kenaꞌ. 21 Nema adai dua tiga ikoꞌ urang te ngajar nyaꞌ, abaꞌ ngau cara nyaꞌ sidaꞌ nyimpang ari apa te kita pecayaꞌ. Ku bradua isaꞌ Tuhan nganyaꞌ pemayek ati Ya ke kitaꞌ.