SURAT PAULOS TE SEMARU KE
TIMUTIOS
Tabeꞌ ke Timutios
1
1-2 Surat toꞌ ari ku Paulos ke Timutios te bamat-amat upa anak ku kedireꞌ nema tua seiman. Ku bradua ke Tuhan Allah abaꞌ Isa Al Maseh Tuhan kita, nganyaꞌ pemayek ati Ya, pengaseh abaꞌ mreꞌ idop penoh damai ke meh. Ku jadi rasol Isa Al Maseh nema daprintah Tuhan Allah Penyelamat kita, abaꞌ Isa Al Maseh pengagam kita.Paulos ngingat ke Timutios tentang pengajar te nesat
3 Pas ku ke wilayah Makedonia, ku bamat-amat mintaꞌ isaꞌ meh diyau de Episos, nema diyaꞌ adai dua tiga ikoꞌ urang ngajar te salah, abaꞌ ku kaꞌ meh ngingat sidaꞌ isaꞌ sidaꞌ badoꞌ. 4 Padah ke sidaꞌ isaꞌ sidaꞌ nadai mames ari sidaꞌ ngajar kebala kisah te bulaꞌ abaꞌ isaꞌ sidaꞌ nadai ngajar tuson pureh puyang jagang te niseꞌ pemadoꞌ. Kebala pengajar nyaꞌ bayah nimol pelayaꞌ abaꞌ nyuroh urang nitauꞌ badaꞌ enteꞌ urang daslamat Tuhan Allah proꞌ uleh iman jaꞌ. 5 Maksod te dasuroh ku toꞌ isaꞌ urang kaseh ke pangan ngau kaseh te timol ari ati te tulos, ati nurani te breseh abaꞌ bamat-amat pecayaꞌ ke Al Maseh. 6 Uleh adai kedaꞌ urang nadai idop upa nyaꞌ ageꞌ, nyaꞌ nyuroh sidaꞌ mames ari sidaꞌ ngajar utai te niseꞌ reti. 7 Sidaꞌ kaꞌ jadi guru te tauꞌ ngajar Prator Tuhan Allah te datules Musa, amat mah sidaꞌ miker sidaꞌ tauꞌ badaꞌ tentang kebala utai nyaꞌ, uleh sidaꞌ nadai nyarok ke apa te deajar sidaꞌ ke urang bukai. 8 Kita tauꞌ badaꞌ Prator Musa bayek enteꞌ ngau pengenaꞌ. 9 Kita alah ingat Prator Musa nyaꞌ ngau ngator idop urang te nadai patoh ke Tuhan Allah, ngau kebala urang te ngelawan Tuhan Allah, ngau urang te dusa, ngau urang te ngai nyemah Tuhan Allah, ngau kebala urang te nadai hormat ke Tuhan Allah abaꞌ agama, ngau kebala urang te munoh apai inai direꞌ abaꞌ munoh urang, bukai ngau urang te kenaꞌ de mua Tuhan Allah. 10 Prator nyaꞌ gaꞌ ngau kebala urang te kanyi, ngau urang laki te kaꞌ ke sama direꞌ laki, ngau kebala urang te nyual ensia ngau jadi ulon, ngau urang te gah ngemulaꞌ, ngau urang te madah utai te bulaꞌ tentang urang de teban jalai urang besidang, abaꞌ ngau ugaꞌ urang te mulah utai te ngelawan pengajar te kenaꞌ. 11 Pengajar te kenaꞌ nyaꞌ pengajar te nunaꞌ Brita Bayek ari Tuhan Allah te Ma Besai abaꞌ patot dapuji. Ku dapecayaꞌ Tuhan Allah nusoi Brita nyaꞌ ke urang bukai.
Ngucap syukor ke Tuhan Allah
12 Ku besukor ke Isa Al Maseh, Tuhan kita te nguat ku sengabot. Nema Ya ngangap ku setia abaꞌ ngangap ku tauꞌ dapecayaꞌ ngau ngelayan Ya. 13 Meliyaꞌ teh ku urang te mlicak Isa, mrisa urang te pecayaꞌ ke Ya abaꞌ ku urang te ganas, uleh Isa Al Maseh nganyaꞌ pengaseh Ya ke ku, tengan nyaꞌ ku bedau pecayaꞌ ke Ya, nyaꞌ nyuroh ku nitauꞌ badaꞌ apa te ku pulah ke nyaꞌ salah. 14 Tuhan kita niseꞌ pemadoꞌ nganyaꞌ pemayek ati Ya ke ku. Ya gaꞌ te nyuroh ku tauꞌ pecayaꞌ ke Ya abaꞌ kaseh ke urang bukai. Utai nyaꞌ tauꞌ piyaꞌ nema kita nrimaꞌ Isa Al Maseh abaꞌ suteꞌ abaꞌ Ya. 15 Apa te ku padah ke toꞌ bamat mah abaꞌ patot datrimaꞌ ugaꞌ: Isa Al Maseh datai ke dunia toꞌ nyelamat urang te dusa, abaꞌ daentara urang te dusa, ku te paleng mayoh dusa. 16 Uleh Tuhan Allah nganyaꞌ pengaseh Ya ke ku urang te paleng mayoh dusa isaꞌ Isa nganyaꞌ penyabar Ya ke ku. Ya mulah piyaꞌ ke ku ngau cuntoh ke urang bukai isaꞌ urang pecayaꞌ ke Ya nema nyaꞌ mah te nyuroh urang tauꞌ jong idop abaꞌ Tuhan Allah. 17 Tuhan Allah Raja te jong mrintah, patot dahormat abaꞌ dapuji sengabot, nema Ya mah te jong idop, te nadai pedaꞌ abaꞌ sikoꞌ-ikoꞌ Allah. Amen.
Tugas Timutios
18 Timutios anak ku, tugas toꞌ ku pecayaꞌ ke meh nunaꞌ te udah depadah kebala pemimpen jemat tentang meh ari Tuhan Allah sebedau meh naꞌ blaboh melayan. Ku ngingat toꞌ ke meh isaꞌ apa te udah depadah tentang meh ari Tuhan Allah ngansak meh bejuang ngau cara te bayek. Cara meh bejuang meh pecayaꞌ ke utai te kenaꞌ abaꞌ ngau ati nurani te suci. 19 Adai urang te nadai iboh ke apa te jakoꞌ ati nurani, nyaꞌ nyuroh sidaꞌ nadai pecayaꞌ ke Al Maseh ageꞌ. 20 Dua ikoꞌ urang te upa nyaꞌ Himenios abaꞌ Aleksander, snikoꞌ udah ku serah ke Ibles Kepalaꞌ bala sitan isaꞌ snikoꞌ tauꞌ jeraꞌ mlicak Tuhan Allah.