Kebala utai te kaꞌ tejadi sebedau Isa datai ageꞌ
2
Kebala menyadeꞌ, entoꞌ ku kaꞌ becakap ke kitaꞌ upa kati penatai Tuhan kita Isa Al Maseh, abaꞌ kati Ya ngumpol kita abaꞌ Ya jemah lah. Ku mintaꞌ ke kitaꞌ, 2 nang sampai pemiker kitaꞌ lekas kacau abaꞌ saban enteꞌ kitaꞌ ninga urang madah ari penatai Tuhan Isa nyau udah datai. Nang sama sekaleꞌ kitaꞌ pecayaꞌ, biyar mah sidaꞌ madah pesau nyaꞌ ari Roh Kudos, ari te deajar abaꞌ ari surat kami kedireꞌ. 3 Nang kitaꞌ ngengaꞌ direꞌ detesat urang ngau brena cara! Nema sebedau ari penatai Tuhan Isa, alah tejadi dulau, mayoh kebala urang kaꞌ meruntak ngelawan Tuhan Allah. Abaꞌ Ensia te Jat kaꞌ nganyaꞌ direꞌ, ya nyaꞌ lah pesti kaꞌ depunas. 4 Ensia te Jat nyaꞌ kaꞌ ngelawan Tuhan Allah abaꞌ kaꞌ ningeꞌ direꞌ lebeh ari kebala utai te desembah ensia abaꞌ te deangap sidaꞌ Allah. Abaꞌ ya kaꞌ dudok de Rumah Kudos Tuhan Allah abaꞌ kaꞌ ngakoꞌ direꞌ Tuhan Allah.a5 Nadai piyaꞌ kitaꞌ ingat, enteꞌ ugaꞌ utai nyaꞌ gah ku padah ke kitaꞌ, jalai ku ageꞌ abaꞌ kitaꞌ? 6 Abaꞌ entoꞌ kitaꞌ tauꞌ badaꞌ apa te udah ngetan Ensia te Jat nyaꞌ, te nyuroh ya baroꞌ timol de senta te udah deatoh Tuhan Allah. 7 Kuasa te jat nyau belaboh bekreja sunyeꞌ-sunyeꞌ, uleh entoꞌ ageꞌ adai te ngetan. Uleh enteꞌ urang te ngetan nyaꞌ deameꞌ ageꞌ, 8 pas tengan nyaꞌ mah Ensia te Jat kaꞌ nganyaꞌ direꞌ. Pas Tuhan Isa datai ageꞌ alam sinar te bedawar, Ya kaꞌ munoh Ensia te Jat nyaꞌ ngau penyuan te dakesoh ari mulot Ya abaꞌ kaꞌ munas Ensia nyaꞌ.
9 Penatai Ensia te Jat nyaꞌ ari kuasa Ibles Kepalaꞌ kebala sitan, abaꞌ ya kaꞌ mulah brena macam utai te nyaroh abaꞌ kebala tana te nipu urang. 10 Ya kaꞌ nguna brena macam utai te jat ngau nesat urang te kaꞌ depunas. Sidaꞌ pesti kaꞌ depunas nema sidaꞌ nulak abaꞌ nadai gaga ke brita te kenaꞌ te tauꞌ nyelamat sidaꞌ. 11 Abaꞌ nyaꞌ mah te nyuroh Tuhan Allah ngengaꞌ sidaꞌ detesat pecayaꞌ ke utai te bulaꞌ. 12 Kebaꞌ ugaꞌ urang te nadai pecayaꞌ ke brita te kenaꞌ abaꞌ gaga mulah te jat, sidaꞌ deukom.
Kita te pecayaꞌ alah betan
13 Kebala menyadeꞌ te dekaseh Tuhan Isa, kami alah selareh besukor ke Tuhan Allah nema idop kitaꞌ, nema Ya ari semaru udah mileh kitaꞌ deselamat ngau kuasa Roh te ngudos kitaꞌ abaꞌ nema kitaꞌ pecayaꞌ ke pengajar te kenaꞌ. 14 Tuhan Allah kaꞌ nyelamat kitaꞌ, nyaꞌ mah te ngasoh Ya ngumai kitaꞌ ngau Brita Bayek te kami padah, isaꞌ kitaꞌ tauꞌ dejunyong tingeꞌ abaꞌ Isa Al Maseh Tuhan kita. 15 Kebaꞌ nyaꞌ, kitaꞌ alah diri tegoh abaꞌ ingat ke kebala pengajar te udah kitaꞌ trimaꞌ ari kami, bayek te depadah kami lansong, bayek te kami tules. 16-17 Kami bradua isaꞌ Tuhan kita Isa Al Maseh abaꞌ Tuhan Allah Apai kita ngibor abaꞌ nguat ati kitaꞌ, isaꞌ kitaꞌ tauꞌ mulah abaꞌ madah kebala utai te bayek. Tuhan Allah selareh ngibor abaꞌ nyuroh kita ngagam te bayek nema Ya ngaseh abaꞌ nganyaꞌ pemayek ati Ya ke kita.