SURAT PAULOS TE KEDUA KE JEMAT
TESALONIKA
Kirem tabeꞌ ke jemat Tesalonika
1
Kirem tabeꞌ ari ku Paulos, Silas, abaꞌ Timutios ke kebala menyadeꞌ jemat Tesalonika te deempu Tuhan Allah Apai kita abaꞌ Tuhan Isa Al Maseh. 2 Kami bradua isaꞌ Tuhan Allah Apai kita abaꞌ Tuhan Isa Al Maseh nganyaꞌ pemayek ati abaꞌ mereꞌ idop penoh damai ke kitaꞌ.Bradua ngucap sukor
3 Kebala menyadeꞌ, kami alah selareh ngucap sukor ke Tuhan Allah nema idop kitaꞌ. Nyaꞌ patot kami pulah nema kitaꞌ betamah pecayaꞌ ke Al Maseh, abaꞌ kitaꞌ betamah ngaseh sama direꞌ. 4 Nyaꞌ mah ngasoh kami gaga amat nusoi kitaꞌ ke ugaꞌ jemat Tuhan Allah te kami kunyong. Kami nusoi kitaꞌ tegoh pecayaꞌ ke Al Maseh amat urang mrisa abaꞌ nyuroh kitaꞌ mayoh ngasa pemedeh.
5 Kitaꞌ tegoh ngasa pemedeh nema kitaꞌ nunaꞌ Pemrintah Tuhan Allah. Kebaꞌ nyaꞌ Tuhan Allah ngangap kitaꞌ patot tamaꞌ ke alam Pemrintah Ya, nyaꞌ mah bukti Tuhan Allah selareh adel. 6 Tuhan Allah te adel nyaꞌ gaꞌ kaꞌ malas pemedeh ke urang te ngasoh kitaꞌ pedeh. 7 Abaꞌ Ya kaꞌ ngemadoꞌ pemedeh nyaꞌ ari kitaꞌ abaꞌ ari kami senta Isa nganyaꞌ direꞌ turon ari sruga abaꞌ kebala mlikat Ya te penoh kuasa. 8 Ya datai ngau api te bejelau turon ngukom kebala urang te nadai iboh ke Tuhan Allah abaꞌ te nadai kaꞌ idop nunaꞌ Brita Bayek Tuhan kita Isa Al Maseh. 9 Kebala sidaꞌ nyaꞌ kaꞌ jong ngasa pemedeh deukom Tuhan Allah, debuai ari mua Tuhan Isa abaꞌ dejaoh ari sinar kuasa Ya te lampar besai. 10 Ugaꞌ nyaꞌ kaꞌ tejadi pas ari Isa datai ageꞌ lah. Isa kaꞌ datai ageꞌ lah isaꞌ ugaꞌ kebala urang te deempu Ya madah pemayek Ya abaꞌ sidaꞌ te pecayaꞌ nyaꞌ muji nyemah Ya. Kitaꞌ adai gaꞌ de entara sidaꞌ nema kitaꞌ pecayaꞌ ke apa te udah kami tusoi ke kitaꞌ.
11 Kebaꞌ nyaꞌ kami bradua sengabot ke Tuhan Allah isaꞌ Ya nulong kitaꞌ urang te udah dekumai Ya isaꞌ tauꞌ idop patot. Kami bradua isaꞌ Tuhan Allah nguna kuasa Ya nyuroh kitaꞌ talah mulah kebala utai te bayek upa te de kedekaꞌ kitaꞌ. Engkremaꞌ Ya ngudah kreja te udah kitaꞌ pulah nema kitaꞌ pecayaꞌ ke Isa. 12 Kami bradua upa piyaꞌ isaꞌ urang te medaꞌ idop kitaꞌ muji Isa, Tuhan kita, abaꞌ kitaꞌ depuji Ya nunaꞌ pemayek ati Tuhan Allah kita abaꞌ Tuhan Isa Al Maseh.