SURAT PAULOS TE SEMARU KE JEMAT
TESALONIKA
PENULAU BECAKAP
Tesalonika toꞌ ibu kuta Makedonia, suteꞌ propinsi te de baroh Pemrintah Ruma. Paulos te semaru nudok jemat de Tesalonika jalai ya udah angkat ari Plipi. Uleh nadai lamaꞌ udah nyaꞌ, kebala sidaꞌ Yahudi te iri ke Paulos blaboh nentang usaha Paulos nema ya madah pengajar Kristen. Kebaꞌ nyaꞌ nyuroh Paulos paksa angkat nudi Tesalonika abaꞌ angkat ke Beria. Baroꞌ udah nyaꞌ ya datai ke Korintus, Timutios kawan playan ya datai ngusong ya ngemaiꞌ rita jemat te adai de Tesalonika.
Surat Paulos te Semaru ke Jemat Tesolonika toꞌ datules ngau ngansak abaꞌ nguat ati sidaꞌ. Paulos besukor ninga rita kebala iman abaꞌ kaseh sidaꞌ te datrimaꞌ ya. Paulos ngingat ke sidaꞌ kati idop ya dulau jalai ya ageꞌ abaꞌ sidaꞌ. Baroꞌ Paulos ngajar cara idop ke urang pecayaꞌ, udah nyaꞌ ya nyawot kebala te detanyaꞌ sidaꞌ ke ya kati penatai Al Maseh te kedua kaleꞌ nyaꞌ. Enteꞌ sikoꞌ urang Kristen te mati sebedau Al Maseh datai ageꞌ, tauꞌ kah urang nyaꞌ jong idop abaꞌ Tuhan Allah sengabot? Kemaya Al Maseh kaꞌ datai? Paulos ngajar sidaꞌ isaꞌ sidaꞌ bekreja sengabot ngau tenang blumaꞌ nungoꞌ penatai Al Maseh ngau pengarap penoh.