SURAT PAULOS TE SEMARU KE JEMAT
TESALONIKA
Kirem tabeꞌ ke jemat te adai de Tesalonika
1
Kirem tabeꞌ ari ku Paulos, Silas,a abaꞌ Timutios ke kebala menyadeꞌ jemat Tesalonika te deempu Tuhan Allah Apai kita abaꞌ Tuhan Isa Al Maseh. Kami bradua ke kitaꞌ isaꞌ Tuhan Allah nganyaꞌ pemayek ati Ya abaꞌ mereꞌ idop penoh damai.Cara idop abaꞌ iman jemat Tesalonika
2 Kami selareh besukor ke Tuhan Allah medaꞌ cara idop ugaꞌ kitaꞌ, abaꞌ nyebot kitaꞌ alam pradua kami. 3 Ngenap kaleꞌ kami bradua ke Tuhan Allah Apai kita, kami selareh ingat apa te kitaꞌ pulah nema kitaꞌ pecayaꞌ ke Tuhan Isa, abaꞌ kati kaseh kitaꞌ ke urang bukai sampai kitaꞌ brunteꞌ kreja isaꞌ tauꞌ mantoꞌ sidaꞌ. Kami ingat kitaꞌ selareh setia, nema kitaꞌ ngagam penatai Tuhan kita Isa Al Maseh.
4 Kebala menyadeꞌ, kami tauꞌ badaꞌ Tuhan Allah kaseh ke kitaꞌ abaꞌ udah mileh kitaꞌ jadi empu Ya. 5 Kami tauꞌ badaꞌ nyaꞌ, nema kami udah madah Brita Bayek ke kitaꞌ, kami becakap nadai ngau mulot gena uleh ngau kuasa Roh Kudos. Abaꞌ kami ma mah pecayaꞌ ke Brita Bayek nyaꞌ. Kitaꞌ kedireꞌ udah medaꞌ idop kami jalai kami ageꞌ abaꞌ kitaꞌ. Nyaꞌ kami pulah ke isaꞌ idop kami beguna ngau kitaꞌ. 6 Amat mah kitaꞌ ma pedeh uleh kitaꞌ nerimaꞌ Brita Bayek te kami padah ke kitaꞌ ngau ati gaga. Ngau cara nyaꞌ kitaꞌ kedireꞌ udah nunaꞌ cuntoh idop kami abaꞌ cuntoh idop Tuhan Isa. Pengaga kitaꞌ nyaꞌ de bereꞌ Roh Kudos.
7 Ari apa te udah kitaꞌ pulah ke nyaꞌ, kitaꞌ jadi cuntoh ngau ugaꞌ urang pecayaꞌ te adai de wilayah Makedonia abaꞌ Akhaya. 8 Nema belaboh ari kitaꞌ mah Brita Tuhan Isa toꞌ tesebar datai ke Makedonia abaꞌ Akhaya. Abaꞌ nadai peroꞌ diyaꞌ gena, uleh kati kitaꞌ tauꞌ pecayaꞌ ke Tuhan Allah udah de tusoi kiyaꞌ-kitoꞌ, nyaꞌ nyuroh niseꞌ te alah kami padah ke ageꞌ. 9 Ugaꞌ urang diyaꞌ nusoi kati kitaꞌ nerimaꞌ kami jalai kami datai ngusong kitaꞌ dulau teh. Sidaꞌ nusoi kati kitaꞌ nudi kebala pentek te desemah kitaꞌ, abaꞌ nusoi kati kitaꞌ bebalek ke Tuhan Allah te idop abaꞌ kenaꞌ, abaꞌ kitaꞌ ngelayan Ya. 10 Sidaꞌ sigeꞌ nusoi enteꞌ kitaꞌ ngagam penatai Anak Tuhan Allah ari sruga, Ya mah Isa te udah deidop ageꞌ uleh Tuhan Allah ari pemati. Isa nyaꞌ mah te nyelamat kita ari ukom Tuhan Allah te kaꞌ datai nema Tuhan Allah ranseng ke urang te dusa.