Kreja Paulos de Tesalonika
2
Kebala menyadeꞌ! Kitaꞌ kedireꞌ tauꞌ badaꞌ penatai kami ngusong kitaꞌ adai asel. 2 Kitaꞌ tauꞌ badaꞌ sebedau kami datai ngusong kitaꞌ de Tesalonika, kami udah deprisa abaꞌ dalujeꞌ de Plipi. Amat mah urang de Tesalonika toꞌ mayoh te ngelawan kami, uleh Tuhan Allah kita te nyuroh kami berani madah Brita Bayek ari Ya ke kitaꞌ. 3 Kami nadai ngemaiꞌ kitaꞌ nunaꞌ pengajar te tesat abaꞌ niseꞌ maksot kami te nadai tulos abaꞌ nipu. 4 Uleh kami becakap nema Tuhan Allah ngangap kami patot nyebar Brita Bayek nyaꞌ. Kebaꞌ kami nadai becakap ngau ngenyamai ati urang, uleh ngau ngenyamai ati Tuhan Allah te mersa ati kami.5 Kitaꞌ kedireꞌ tauꞌ badaꞌ kami nadai kalaꞌ becakap nugeng kitaꞌ, abaꞌ kami nadai kalaꞌ ngajar isaꞌ kami tauꞌ buleh duet ari kitaꞌ. Tuhan Allah tauꞌ badaꞌ apa te kami pulah. 6 Abaꞌ kami nadai gaꞌ berusaha isaꞌ kitaꞌ abaꞌ kebala urang bukai muji kami. Tunaꞌ sa nema kami rasol Al Maseh, adai hak kami buleh kebala utai nyaꞌ ari kitaꞌ, uleh kami nadai nuntot hak kami nyaꞌ.
7 Uleh kami lulot ke kitaꞌ jalai kami abaꞌ kitaꞌ, upa medaꞌ inai ngintu anak ya. 8 Kami ma mah ngaseh kitaꞌ, kebaꞌ nyaꞌ kami nadai peroꞌ madah Brita Bayek ari Tuhan Allah. Uleh mereꞌ idop kami ke kitaꞌ gaꞌ, nema kami ma mah ngaseh kitaꞌ. 9 Kebala menyadeꞌ, kitaꞌ ingat kati kami brunteꞌ kreja tawas malam isaꞌ kami nadai ngemerat kitaꞌ, jalai kami madah Brita Bayek ari Tuhan Allah ke kitaꞌ.
10 Kami idop suci, kenaꞌ abaꞌ niseꞌ salah ke kitaꞌ te udah pecayaꞌ ke Al Maseh. Kitaꞌ abaꞌ Tuhan Allah mah saksi kami. 11 Kitaꞌ tauꞌ badaꞌ, enteꞌ kami udah mulah kebala utai ke kitaꞌ upa medaꞌ apai mulah kebala utai ke kebala anak ya. Kami udah ngajar abaꞌ ngansak kitaꞌ sikoꞌ-sikoꞌ, 12 abaꞌ kami udah mintaꞌ bamat-amat isaꞌ kitaꞌ idop upa te de kedekaꞌ Tuhan Allah te udah ngumai kitaꞌ tamaꞌ ke alam Pemrintah Ya, diyau abaꞌ Ya de teban Ya dejunyong tingeꞌ.
Paulos gaga ke jemat Tesalonika
13 Adai suteꞌ ageꞌ utai te ngasoh kami ngucap sukor sengabot ke Tuhan Allah. Jalai kitaꞌ nerimaꞌ Brita Bayek ari kami, kitaꞌ nadai ngangap Brita nyaꞌ ari ensia gena, uleh kitaꞌ ngangap nyaꞌ Brita ari Tuhan Allah. Abaꞌ bamat-amat mah Brita nyaꞌ ari Tuhan Allah. Tuhan Allah te bekreja ngubah ati kitaꞌ te pecayaꞌ ke Al Maseh. 14 Kebala menyadeꞌ, apa te kitaꞌ asa kah udah deasa gaꞌ uleh kebala jemat Tuhan Allah te adai de wilayah Yudia, te jadi empu Isa Al Maseh. Kitaꞌ ngasa pemedeh ari bansa kitaꞌ kedireꞌ, sama upa te deasa uleh kebala jemat Tuhan Allah te adai de Yudia ari kebala sidaꞌ Yahudi. 15 Kebala sidaꞌ Yahudi nyaꞌ mah te munoh Tuhan Isa abaꞌ kebala nabi, abaꞌ sidaꞌ gaꞌ te medeh kami. Sidaꞌ ngelawan ugaꞌ urang abaꞌ Tuhan Allah sama sekaleꞌ nadai gaga ke sidaꞌ. 16 Sidaꞌ ngaral kami madah Brita Bayek te tauꞌ nyelamat urang ke kebala bansa bukai. Ngau cara nyaꞌ kebala sidaꞌ Yahudi namah kebala dusa sidaꞌ sampai penoh. Abaꞌ entoꞌ mah senta sidaꞌ nerimaꞌ peranseng Tuhan Allah.
Paulos kaꞌ datai sekaleꞌ ageꞌ ngusong kebala sidaꞌ Tesalonika
17 Kebala menyadeꞌ, jalai kami bedau lamaꞌ bepisah ari kitaꞌ (jaoh de mata uleh semak de ati) kami ma gaok ke kitaꞌ abaꞌ berusaha bamat-amat kaꞌ betemu ageꞌ abaꞌ kitaꞌ. 18 Kami ngamoꞌ angkat ngusong kitaꞌ. Ku Paulos, udah dua tiga kaleꞌ kaꞌ ngelaba ngunyong kita. Uleh Ibles, Kepalaꞌ kebala sitan selareh ngaral kami. 19 Ku kaꞌ ngunyong kitaꞌ nema kitaꞌ mah te deagam kami, pengaga ati kami, abaꞌ te kami bangga ke senta penatai Tuhan kita Isa Al Maseh. 20 Amat kitaꞌ mah te kami bangga abaꞌ pengaga ati kami!