Timutios ngemaiꞌ rita te bayek tentang jemat Tesalonika
3
Nyau klamaꞌ kami nadai talah ngetat pengaok kami ke kitaꞌ. Kebaꞌ nyaꞌ kami kaꞌ dadudi kedireꞌ de Atena, 2 abaꞌ kami ngutos menyadeꞌ kita Timutios ke kitaꞌ. Kitaꞌ tauꞌ badaꞌ enteꞌ ya toꞌ salah sikoꞌ playan Tuhan Allah te bekreja abaꞌ kami madah Brita Bayek Al Maseh. Kami ngutos Timutios ngusong kitaꞌ isaꞌ ya nguat kitaꞌ abaꞌ ngansak kitaꞌ lebeh pecayaꞌ ageꞌ ke Al Maseh. 3 Kami mulah piyaꞌ isaꞌ niseꞌ daentara kitaꞌ te teguncang tegal pemedeh kita toꞌ. Kitaꞌ kedireꞌ tauꞌ badaꞌ kebala pemedeh toꞌ lamaꞌ adai alam pengamoꞌ Tuhan Allah ngau kita. 4 Jalai kami ageꞌ abaꞌ kitaꞌ, kami lamaꞌ udah madah enteꞌ kita kaꞌ ngasa pemedeh. Abaꞌ utai nyaꞌ udah tejadi ke kitaꞌ kedireꞌ upa te kitaꞌ ketauꞌ. 5 Kebaꞌ nyaꞌ breta ku nadai sabar ageꞌ kaꞌ ninga brita kitaꞌ ku ngutos Timutios, nema ku kaꞌ amat mah tauꞌ badaꞌ kati iman kitaꞌ ke Isa Al Maseh. Ku saban mali Ibles, kepalaꞌ bala sitan brasel encuba kitaꞌ sampai kitaꞌ nadai pecayaꞌ ageꞌ abaꞌ apa te udah mati-mati kami pulah kah niseꞌ reti.6 Uleh entoꞌ Timutios udah datai ageꞌ abaꞌ udah madah rita te bayek kati iman kitaꞌ ke Al Maseh abaꞌ kati kaseh kitaꞌ abaꞌ sama direꞌ. Timutios madah ke kami, kitaꞌ ingat sengabot abaꞌ gaga ke kami. Abaꞌ kitaꞌ kaꞌ amat betemu abaꞌ kami, sama upa medaꞌ kami kaꞌ betemu abaꞌ kitaꞌ. 7 Kebaꞌ nyaꞌ kebala menyadeꞌ, amat kami tusah abaꞌ pedeh, uleh kami ngasa te ibor ninga rita kitaꞌ. Iman kitaꞌ ke Al Maseh ngibor ati kami. 8 Entoꞌ kami ngasa amat-amat idop, pukoꞌ kitaꞌ tetap diri kuat suteꞌ abaꞌ Al Maseh. 9 Kami ma mah gaga ke kitaꞌ, nyaꞌ nyuroh kami ma mah betrimaꞌ kaseh ke Tuhan Allah jalai kami bradua. 10 Tawas malam kami bradua bamat-amat ke Tuhan Allah, isaꞌ kami tauꞌ betemu abaꞌ kitaꞌ. Abaꞌ ngajar kebala utai te kitaꞌ perlu isaꞌ iman kitaꞌ ke Al Maseh lebeh kuat. 11 Engkremaꞌ Tuhan Allah Apai kita abaꞌ Tuhan kita Isa Al Maseh nulong pejalai kami isaꞌ kami tauꞌ betemu abaꞌ kitaꞌ. 12 Engkremaꞌ Tuhan Isa ngasoh kitaꞌ empala kaseh ke pangan bukai abaꞌ empala kaseh ke ugaꞌ urang, isaꞌ kaseh kitaꞌ nyaꞌ betamah-tamah sama upa kaseh kami ke kitaꞌ. 13 Ngau nyaꞌ mah Tuhan Isa kaꞌ nguat ati kitaꞌ, isaꞌ kitaꞌ suci abaꞌ niseꞌ penyalah de mua Tuhan Allah Apai kita, senta Tuhan kita Isa datai ageꞌ abaꞌ ugaꞌ urang te daempu Ya.a