Cara idop te dekedekaꞌ Tuhan Allah
4
Kebala menyadeꞌ, kami udah ngajar kati kitaꞌ idop nunaꞌ kedekaꞌ Tuhan Allah. Pengajar kami nyaꞌ, udah kitaꞌ tunaꞌ. Entoꞌ kami mintaꞌ abaꞌ ngingat ke kitaꞌ ngau kuasa ari Tuhan Isa, isaꞌ kitaꞌ mulah lebeh ageꞌ. 2 Kitaꞌ kedireꞌ tauꞌ badaꞌ apa jaꞌ te alah depulah, te kami udah ajar ke kitaꞌ ngau kuasa Tuhan Isa. 3 Nema toꞌ te de kedekaꞌ Tuhan Allah, isaꞌ kitaꞌ idop suci, isaꞌ kitaꞌ nadai bekamoh tinok abaꞌ urang bukai, bukai ari abaꞌ laki bini direꞌ. 4 Ngenap urang alah belajar ngetat direꞌa isaꞌ nyuroh ati Tuhan Allah abaꞌ ensia gaga. 5 Nang idop nunaꞌ penekaꞌ ati direꞌ, upa te depulah urang te nadai ngelala Tuhan Allah. 6 Alam hal toꞌ nang adai urang mulah te jat ke kebala menyadeꞌ kita te seiman abaꞌ nipu sidaꞌ. Meliyaꞌ teh kami udah bamat-amat ngingat ke kitaꞌ, Tuhan Isa kaꞌ ngukom urang te mulah kebala penyalah te upa nyaꞌ. 7 Tuhan Allah ngumai kita nadai mulah idop te nadai bayek, uleh isaꞌ kita idop suci. 8 Kebaꞌ nyaꞌ sapa te ngai ninga pengajar toꞌ, nadai ngai ke ensia uleh ngai ke Tuhan Allah te mereꞌ Roh Ya te Kudos ke kitaꞌ.9 Nadai perlu kami nules ke kitaꞌ kati cara kitaꞌ ngaseh kebala menyadeꞌ te sama pecayaꞌ. Kitaꞌ kedireꞌ udah deajar uleh Tuhan Allah kati ngaseh sama direꞌ. 10 Abaꞌ utai toꞌ udah kitaꞌ pulah ke ugaꞌ urang te pecayaꞌ de wilayah Makedunia. Uleh kebala menyadeꞌ kami mintaꞌ bamat-amat isaꞌ kitaꞌ nganyaꞌ kaseh kitaꞌ lebeh ageꞌ.
11 Berusaha ke kitaꞌ idop tenang abaꞌ nang kalot ke uros urang bukai. Lebeh bayek kitaꞌ bekreja ngigaꞌ te dengau direꞌ, upa te dulau udah kami suroh ke kitaꞌ. 12 Enteꞌ idop kitaꞌ piyaꞌ, kitaꞌ nadai begantong ke urang bukai, abaꞌ kebala urang te nadai pecayaꞌ ke Al Maseh kaꞌ hormat ke kitaꞌ.
Penatai Tuhan Isa
13 Kebala menyadeꞌ, kami kaꞌ isaꞌ kitaꞌ tauꞌ badaꞌ kati pengamat kebala urang pecayaꞌ te udah mati; isaꞌ kitaꞌ nadai bekenang upa kebala urang te nadai arap urang mati kaꞌ idop ageꞌ. 14 Kita pecayaꞌ Isa udah mati abaꞌ idop ageꞌ. Kebaꞌ nyaꞌ kita pecayaꞌ gaꞌ Tuhan Allah kaꞌ ngidop ageꞌ ugaꞌ urang mati te udah pecayaꞌ ke Isa isaꞌ sidaꞌ idop abaꞌ Ya.
15 Kami kaꞌ madah ke kitaꞌ enteꞌ nunaꞌ pengajar Tuhan Isa, kita te ageꞌ idop datai ke senta penatai Tuhan Isa te kedua kaleꞌ lah, nadai ngilah kebala urang te udah dulau mati ari kita betemu abaꞌ Isa. 16 Jemah lah Tuhan Isa kedireꞌ kaꞌ turon ari sruga ngau perintah te tegas. Tengan nyaꞌ gaꞌ kepalaꞌ mlikat ngangau abaꞌ trompet Tuhan Allah dasepu, abaꞌ kebala urang Kristen te dulau mati lah nyaꞌ mah te dulau deidop Ya ageꞌ. 17 Udah nyaꞌ kita te ageꞌ idop tengan nyaꞌ kaꞌ deangkat abaꞌ sidaꞌ ke awan betemu abaꞌ Tuhan Isa de langet. Udah nyaꞌ kita tauꞌ jong idop abaꞌ Tuhan sengabot. 18 Kebaꞌ nyaꞌ, kita alah nguat ati pangan bukai ngau pengajar toꞌ.