Ngageh direꞌ ngentang penatai Tuhan Isa
5
Kebala menyadeꞌ, kami nadai perlu nules ke kitaꞌ kemaya senta te pas kebala utai nyaꞌ kaꞌ tejadi. 2 Nema kitaꞌ kedireꞌ tauꞌ badaꞌ ari penatai Tuhan Isa nyaꞌ nadai mang-mang upa pencuri datai malam. 3 Pas urang madah, “Ugaꞌ toꞌ aman abaꞌ nusah takot,” tengan nyaꞌ mah nadai mang-mang sidaꞌ ma merinsaꞌ, abaꞌ niseꞌ te tauꞌ lepas. Utai nyaꞌ kaꞌ tejadi nadai mang-mang upa pemedeh urang inoꞌ te kaꞌ beranak.4 Uleh kitaꞌ nadai idop de teban te petang, kebaꞌ senta penatai Ya lah nadai nenganyat kitaꞌ upa penatai pencuri. 5 Nema ugaꞌ kitaꞌ kebala urang te idop alam terang, abaꞌ anak tawas. Kita ukai urang te idop alam petang abaꞌ anak malam. 6 Kebaꞌ nyaꞌ nang kita tinok lenyaꞌ upa urang bukai. Kita alah selareh bejaga, selareh siap abaꞌ pemiker kita alah sadar. 7 Asa malam urang tinok, abaꞌ nginom mabok, abaꞌ pemiker sidaꞌ nadai sadar. 8 Uleh kita toꞌ temasok urang tawas te tampak, kebaꞌ nyaꞌ pemiker kitaꞌ alah sadar. Kita alah pecayaꞌ sengabot ke Isa abaꞌ kaseh ke urang bukai. Nyaꞌ upa medaꞌ kita ngau baju besi ngelinong tuboh direꞌ. Abaꞌ kita alah ngagam Tuhan Allah kaꞌ nyelamat kita. Nyaꞌ upa medaꞌ kita ngau tupi besi ngelinong palaꞌ kita.a 9 Tuhan Allah mileh kita nadai isaꞌ deukom, uleh isaꞌ kita buleh selamat ari Tuhan Isa Al Maseh. 10 Ya mati ngau kita isaꞌ pas Ya datai jemah lah, entah kita ageꞌ idop, entah kita nyau mati, kita tauꞌ idop abaꞌ Ya. 11 Kebaꞌ nyaꞌ kitaꞌ alah selareh ngansak abaꞌ nguat ati pangan bukai upa te kitaꞌ pulah ke tengan entoꞌ.
Pengajar te pemadoꞌ
12 Kebala menyadeꞌ, kami bamat-amat mintaꞌ isaꞌ kitaꞌ hormat ke kebala pelayan Tuhan te udah bepanteng kreja de tengah kitaꞌ, sidaꞌ nyaꞌ depileh Tuhan Isa mimpen abaꞌ ngajar kitaꞌ. 13 Nema apa te udah sidaꞌ pulah kah, kitaꞌ alah bamat-amat hormat ke sidaꞌ abaꞌ mulah ugaꞌ nyaꞌ ngau kaseh. Idop sati sengabot ke kitaꞌ abaꞌ pangan bukai.
14 Kami mintaꞌ gaꞌ kebala menyadeꞌ, rara ke sidaꞌ te ngai bekreja, bereꞌ semangat ke urang te takot; talau ke urang te perlu detalau abaꞌ sabar ke ugaꞌ urang. 15 Jaga ke isaꞌ nang malas jat ngau jat. Selareh mulah te bayek ke pangan bukai abaꞌ ugaꞌ urang.
16 Gaga sengabot kah, 17 bradua sengabot kah, 18 abaꞌ alam brena utai kitaꞌ alah besukor, nema nyaꞌ mah te dekedekaꞌ Tuhan Allah ngau kitaꞌ urang te idop sati abaꞌ Isa Al Maseh.
19 Nang madam Roh Kudos te kaꞌ kreja de kitaꞌ. 20 Nang menadai kebala pesau ari Roh Kudos. 21 Ugaꞌ kebala pesau nyaꞌ alah deuji, abaꞌ te bayek alah detunaꞌ. 22 Jaoh ke ari kitaꞌ brena leman te jat.
Pradua abaꞌ printah te pemadoꞌ
23 Kami bradua ke Tuhan Allah te mereꞌ kita idop penoh damai, engkremaꞌ Tuhan Allah kedireꞌ ngasoh kitaꞌ idop bamat-amat ngau Ya jaꞌ. Engkremaꞌ Tuhan Allah ngintu ugaꞌ kitaꞌ, bayek idop, semengat, abaꞌ tuboh, isaꞌ kitaꞌ nadai mulah dusa datai ke senta Tuhan kita Isa Al Maseh datai ageꞌ. 24 Tuhan Allah te udah ngumai kitaꞌ kaꞌ mulah utai nyaꞌ nema Ya setia.
25 Kebala menyadeꞌ pradua ke kami!
26 Betabeꞌ ngau penoh kaseh ke ugaꞌ kitaꞌ abaꞌ sama direꞌ urang pecayaꞌ.
27 Ku mintaꞌ ngau kuasa ari Tuhan Isa, kitaꞌ bedanyi maca surat toꞌ ke ugaꞌ menyadeꞌ kita te seiman.
28 Engkremaꞌ Tuhan kita Isa Al Maseh nganyaꞌ pemayek ati Ya ke ugaꞌ kitaꞌ.