4
O kebala tuan, kitaꞌ alah adel abaꞌ jujor ke ulon kitaꞌ; kitaꞌ alah ingat kitaꞌ adai gaꞌ Tuan de sruga.2 Kebala menyadeꞌ, kitaꞌ alah tekon bradua abaꞌ alah slareh bejaga blumaꞌ ngucap sukor. 3 Bradua gaꞌ ke kami isaꞌ Tuhan Allah mukaꞌ jalai ngau kami madah Brita Bayek tentang Al Maseh te datapok Tuhan Allah meliyaꞌ. Tegal madah Brita Bayek nyaꞌ mah ku dapenyara. 4 Bradua ke ku isaꞌ ku tauꞌ madah Brita nyaꞌ abaꞌ isaꞌ ku tauꞌ nyelas ke urang ngau bayek nema nyaꞌ mah tugas te dabreꞌ Tuhan Allah ke ku.
5 Panai-panai ke kitaꞌ ngadap urang te nadai pecayaꞌ. Ngau bayek ke waktu te adai. 6 Cakap kitaꞌ alah slareh nyamai datinga, isaꞌ urang nrimaꞌ apa te kitaꞌ padah ke nyaꞌ ngau bayek. Ngau cara nyaꞌ, kitaꞌ tauꞌ badaꞌ kati cara kitaꞌ nyawot ngenap urang.
Brita kebala urang te abaꞌ Paulos
7 Tikikos toꞌ menyadeꞌ ku te ku kaseh. Ya toꞌ penulong te setia, abaꞌ kami sama ngelayan Tuhan. Ya kaꞌ nusoi ke kitaꞌ ugaꞌ utai te tejadi ke ku. 8 Ku ngutos ya ke kitaꞌ isaꞌ kitaꞌ tauꞌ badaꞌ kati brita kami, abaꞌ isaꞌ ya nguat ati kitaꞌ. 9 Ku ngutos Onesimos abaꞌ Tikikos; Onesimos nyaꞌ ari klumpok kitaꞌ. Ya urang te setia abaꞌ te kami kaseh. Ya abaꞌ Tikikos kaꞌ madah ke kitaꞌ ugaꞌ utai te tejadi ditoꞌ.
10 Arestarkos, te adai alam penyara abaꞌ ku, kirem tabeꞌ ke kitaꞌ, piyaꞌ gaꞌ Markos manal Barnabas. (Ku udah gaꞌ bepesau ke kitaꞌ, trimaꞌ ke Markos asa ya datai ngusong kitaꞌ.) 11 Abaꞌ kirem tabeꞌ gaꞌ ari Yesos te dagelar Yustos. Ari ugaꞌ sidaꞌ Yahudi te nyau pecayaꞌ ke Isa, proꞌ sidaꞌ tiga mah te entoꞌ kreja abaꞌ ku madah Brita Bayek tentang Pemrintah Tuhan Allah. Sidaꞌ saja bamat-amat mah mantoꞌ ku. 12 Ipapras kirem tabeꞌ gaꞌ ke kitaꞌ. Ya sigeꞌ ari klumpok kitaꞌ. Ya playan Isa Al Maseh te slareh tekon bradua ke kitaꞌ. Ya bamat-amat mintaꞌ ke Tuhan Allah isaꞌ kitaꞌ bamat-amat tegoh, tuwai pemiker, abaꞌ yaken ugaꞌ te dakedekaꞌ Tuhan Allah ngau kitaꞌ. 13 Ku kedireꞌ udah medaꞌ ya kreja bepanteng tulang ke kitaꞌ abaꞌ ke sidaꞌ te de kuta Laudikia abaꞌ sidaꞌ te de kuta Hirapolis. 14 Kirem tabeꞌ gaꞌ ari enteri Lukas te kitaꞌ kaseh abaꞌ ari Dimas.
15 Padah ke tabeꞌ kami ke kebala menyadeꞌ seiman te de Laudikia; tabeꞌ gaꞌ ke boꞌ Nimpa abaꞌ jemat te kumpol de rumah ya. 16 Udah kitaꞌ maca surat toꞌ, brusaha ke gaꞌ isaꞌ debaca de jemat Laudikia. Abaꞌ kitaꞌ alah maca gaꞌ surat te ku kirem ke jemat Laudikia. 17 Padah ke Arkhipus isaꞌ ya bamat-amat ngudah tugas te datrimaꞌ ya ari Tuhan.
18 Tabeꞌ ari ku Paulos. Tabeꞌ toꞌ ku tules ngau jari ku kedireꞌ. Nang klupa ku ageꞌ adai alam penyara! Engkremaꞌ Tuhan kita Isa Al Maseh nganyaꞌ pemayek ati Ya ke kitaꞌ.