3
Kitaꞌ udah daidop ageꞌ abaꞌ Isa Al Maseh, kebaꞌ nyaꞌ kitaꞌ alah brusaha ngigaꞌ kebala utai te de sruga teban jalai Isa dudok de sepiyak kanan Tuhan Allah. 2 Piker ke kebala utai te de sruga, nang miker kebala utai te de dunia. 3 Nema idop kitaꞌ te lamaꞌ udah mati, abaꞌ entoꞌ kitaꞌ empu idop baru abaꞌ Al Maseh demua Tuhan Allah. Idop baru nyaꞌ bedau gulong pedaꞌ. 4 Al Maseh mah pon pengidop kitaꞌ te pengamat. Senta Ya nganyaꞌ direꞌ jemah lah, kitaꞌ sigeꞌ pedaꞌ abaꞌ Ya alam kuasa te lampar besai.Pengidop te baru
5 Kebaꞌ nyaꞌ buai ke kebala penekaꞌ dunia te adai alam idop kitaꞌ. Buai ke kanyi, kebala utai te nadai senunoh, penekaꞌ te jat, pemiker te jat, abaꞌ tamaꞌ. Tamaꞌ toꞌ sama mah abaꞌ nyemah berhala. 6 Kebala utai nyaꞌ mah te nyuroh Tuhan Allah kaꞌ ngukom urang te nadai kaꞌ patoh ke Ya. 7 Meliyaꞌ kitaꞌ sigeꞌ mulah piyaꞌ jalai kitaꞌ idop upa sidaꞌ. 8 Uleh entoꞌ buai kebala utai te jat ari idop kitaꞌ. Kebala utai te jat nyaꞌ: garang, ranseng, areh, mejaiꞌ urang bukai, abaꞌ kebala cakap te jat te pansot ari mulot kitaꞌ. 9 Nang ageꞌ ngemulaꞌ pangan, nema idop te lamaꞌ abaꞌ kebala te udah kitaꞌ pulah udah kitaꞌ buai. 10 Entoꞌ kitaꞌ udah ngenaꞌ idop te baru, idop te de ubah ngenap ari uleh Tuhan Allah te mulah kitaꞌ isaꞌ kitaꞌ upa Ya. Ya mulah piyaꞌ isaꞌ kitaꞌ bamat-amat nglala Tuhan Allah. 11 De idop te baru toꞌ, niseꞌ bida sidaꞌ Yahudi abaꞌ te ukai Yahudi, niseꞌ bida urang te sunat abaꞌ te nadai sunat, niseꞌ bida urang aseng abaꞌ urang te nadai deangap, abaꞌ niseꞌ gaꞌ bida urang te jadi ulon abaꞌ urang te nadai jadi ulon, uleh te ma penteng toꞌ Al Maseh, abaꞌ Ya mah te idop alam ugaꞌ ati kita.
12 Kitaꞌ udah dapileh Tuhan Allah, dekudos Ya abaꞌ dekaseh Ya, kebaꞌ nyaꞌ kitaꞌ alah ngaseh urang bukai, kitaꞌ alah bayek ati, kitaꞌ alah renah ati, kitaꞌ alah ritak abaꞌ alah sabar. 13 Sabar ke kitaꞌ ke pangan bukai, abaꞌ ampon ke penyalah urang enteꞌ adai te denam ke pangan. Tuhan udah ngampon ugaꞌ kitaꞌ, kebaꞌ nyaꞌ pulah gaꞌ upa piyaꞌ ke pangan bukai. 14 Ari entara ugaꞌ nyaꞌ te paleng penteng kitaꞌ alah kaseh ke pangan bukai nema kaseh nyaꞌ mah te bamat-amat nyuteꞌ kitaꞌ. 15 Kitaꞌ udah dekumai jadi suteꞌ tuboh, kebaꞌ nyaꞌ kitaꞌ alah nyerah direꞌ ke Al Maseh isaꞌ damai Ya mrintah ati kitaꞌ. Abaꞌ kitaꞌ alah besukor. 16 Ngaꞌ ke pengajar Al Maseh diyau alam ati kitaꞌ. Ajar abaꞌ rara ke pangan bukai ngau pemanai te dabreꞌ Tuhan Allah ke kitaꞌ. Blumaꞌ kitaꞌ menanyi masmor abaꞌ lagu rohani, kitaꞌ ngucap sukor ke Tuhan Allah alam ati kitaꞌ. 17 Abaꞌ ugaꞌ utai te kitaꞌ pulah, pulah abaꞌ padah ke ugaꞌ utai nyaꞌ alam nama Tuhan Isa blumaꞌ besukor ke Allah Apai nema apa te udah dapulah Isa ke kitaꞌ.
Pengajar ke keluarga
18 O kebala bini, dinga ke laki kitaꞌ, nema piyaꞌ mah gaya idop urang te pecayaꞌ ke Tuhan.
19 O kebala laki kaseh ke bini kitaꞌ abaꞌ nang medeh sidaꞌ.
20 O kebala anak, patoh ke apai inai kitaꞌ alam brena utai, nema nyaꞌ mah te degaga Tuhan.
21 O kebala apai, nang kitaꞌ medeh ati anak kitaꞌ isaꞌ sidaꞌ nadai putus asa.
22 O kebala ulona, patoh ke tuan kitaꞌ te dedunia toꞌ alam brena utai, nang proꞌ de mua sidaꞌ bayah kaꞌ nyuroh sidaꞌ gaga, uleh ngau tulos ati nema kitaꞌ takot ke Tuhan. 23 Apa jaꞌ te kitaꞌ pulah, pulah ke nyaꞌ bamat-amat upa kitaꞌ mulah ke Tuhan ukai ngau ensia. 24 Kitaꞌ alah ingat enteꞌ kitaꞌ kaꞌ nrimaꞌ upah te deageh Tuhan ngau urang te daempu Ya nema Al Maseh mah tuan te pengamat kitaꞌ layan. 25 Sapa te mulah penyalah, nyaꞌ mah te alah deukom, nema Tuhan toꞌ nadai pileh antah.