2
Ku kaꞌ kitaꞌ tauꞌ badaꞌ kati pemedeh ku bejuang ngau kitaꞌ, ngau sidaꞌ kuta Laodikia abaꞌ ngau ugaꞌ urang te bedau naꞌ nglala ku. 2 Ku mulah piyaꞌ ke ugaꞌ kitaꞌ, isaꞌ ugaꞌ kitaꞌ ransak abaꞌ suteꞌ alam kaseh. Ngau cara nyaꞌ kitaꞌ bamat-amat nyarok sampai kitaꞌ bamat-amat pecayaꞌ ke Al Maseh te bedau deanyaꞌ Tuhan Allah meliyaꞌ, 3 De alam Al Maseh mah ugaꞌ pemanai abaꞌ pemenauꞌ Tuhan Allah detaroh. 4 Ku madah toꞌ ke kitaꞌ isaꞌ niseꞌ urang te tauꞌ nipu kitaꞌ ngau mulot sidaꞌ te blemak. 5 Amat mah ku jaoh ari kitaꞌ, uleh ku slareh miker kitaꞌ. Ku ma mah gaga ninga pengidop kitaꞌ terator abaꞌ kitaꞌ tegoh pecayaꞌ ke Al Maseh.Idop te baru alam Al Maseh
6 Kitaꞌ udah nrimaꞌ Isa Al Maseh ngau Tuhan, kebaꞌ nyaꞌ kitaꞌ alah slareh idop suteꞌ abaꞌ Ya. 7 Kitaꞌ alah beurat alam Ya, dadiri de atau Ya. Kitaꞌ alah tamah tegoh pecayaꞌ ke Al Maseh upa te udah deajar ke kitaꞌ abaꞌ ati kitaꞌ alah slareh besukor. 8 Ati-ati ke kitaꞌ, nang sampai adai te nipu kitaꞌ ngau pengajar te nesat abaꞌ te niseꞌ reti. Pengajar nyaꞌ nadai ari Al Maseh, uleh ari pemiker puyang jagang te turon menuron abaꞌ ari kebala roh penguasa dunia. 9 Kitaꞌ alah tauꞌ badaꞌ enteꞌ Al Maseh bamat-amat Allah. Upa piyaꞌ gaꞌ jalai Ya jadi ensia biasa Ya tetap mah empu sipat abaꞌ kuasa Allah. 10 Abaꞌ nema kitaꞌ suteꞌ abaꞌ Al Maseh, idop kitaꞌ niseꞌ te niseꞌ. Ya mah kepalaꞌ ugaꞌ pemrintah abaꞌ ugaꞌ penguasa te adai. 11 Alam Al Maseh, kitaꞌ udah desunat, ukai ngau sunat te dapulah ensia, uleh ngau sunat te dapulah Al Maseh, reti nyaꞌ Al Maseh te ngebibas kitaꞌ ari sipat dusa te bekuasa alam tuboh kitaꞌ. 12 Pas kitaꞌ depaneꞌ, kitaꞌ dekubor abaꞌ Al Maseh, abaꞌ ngau cara nyaꞌ gaꞌ kitaꞌ daidop ageꞌ abaꞌ Ya, nema kitaꞌ pecayaꞌ ke kuasa Tuhan Allah te udah ngidop Al Maseh ari pemati. 13 Meliyaꞌ teh kitaꞌ udah mati nema kitaꞌ dusa abaꞌ kitaꞌ nadai desunat. Uleh entoꞌ Tuhan Allah ngidop kitaꞌ abaꞌ Al Maseh. Tuhan Allah udah ngampon ugaꞌ dusa kita. 14 Ya udah ngapos ugaꞌ utang kita ngau cara maku ugaꞌ utang kita dekayu saleb. 15 Dekayu saleb Tuhan Allah ngalah ugaꞌ kebala roh te mrintah abaꞌ bekuasa, nema Ya udah menang ngelawan sidaꞌ abaꞌ ngemalu sidaꞌ.
Nang nunaꞌ kebala prator te dapulah ensia te niseꞌ reti
16 Kebaꞌ nyaꞌ nang kitaꞌ ngengaꞌ urang nyalah kitaꞌ, nema kitaꞌ nadai nunaꞌ prator tentang apa te tauꞌ depakai abaꞌ apa te tauꞌ deinom. Nang gaꞌ kitaꞌ ngengaꞌ urang nyalah kitaꞌ nema kitaꞌ nadai ngeramai ari besai, bulan baru abaꞌ ari Sabat. 17 Ugaꞌ nyaꞌ bayah kenayang ari apa te kaꞌ datai, uleh ugaꞌ nyaꞌ udah datemoꞌ Al Maseh. 18 Ati-ati ke kita! Nang ngengaꞌ urang te budi-budi ngemaroh direꞌ abaꞌ te nyemah mlikat nyalah kitaꞌ. Sidaꞌ becakap ke utai te depedaꞌ sidaꞌ, te depadah sidaꞌ ari Tuhan Allah. Nang ninga sidaꞌ enteꞌ sidaꞌ nyalah kitaꞌ, nema kitaꞌ nadai mulah piyaꞌ. Utai nyaꞌ lampar budu, sidaꞌ ngepah ngemah direꞌ ngau pemiker dunia toꞌ. 19 Sidaꞌ nadai ageꞌ bepegai ke Al Maseh te jadi palaꞌ sidaꞌ. Al Maseh toꞌ palaꞌ, abaꞌ ugaꞌ jemat toꞌ tuboh te begantong ke Ya. Ugaꞌ tuboh te dapulah suteꞌ abaꞌ saleng nulong, betumoh nunaꞌ penekaꞌ Tuhan Allah, ugaꞌ toꞌ tejadi tegal Al Maseh. 20 Enteꞌ kitaꞌ udah mati abaꞌ Al Maseh abaꞌ udah dabibas ari kebala kuasa roh dunia toꞌ, ngapa kitaꞌ tubah idop upa urang dunia toꞌ? Ngapa kitaꞌ patoh ke kebala prator te upa toꞌ, 21 “Nang nyamah utai toꞌ!” “Nang encelar pemakai nyaꞌ!” “Nang negoꞌ utai toꞌ!” 22 Ugaꞌ prator nyaꞌ tentang kebala utai te breta dengau niseꞌ reti ageꞌ. Prator nyaꞌ bayah printah abaꞌ pengajar te dapulah ensia. 23 Ator nyaꞌ asa dapedaꞌ upa te bayek, uleh nyaꞌ bayah ator agama te dapulah direꞌ, sidaꞌ ngajar ator te ngemaroh direꞌ abaꞌ medeh direꞌ, uleh kebala prator nyaꞌ niseꞌ guna nema nadai tauꞌ nulong kita ngetat direꞌ ari kebala penekaꞌ te jat.