SURAT PAULOS KE JEMAT
KLUSI
Kirem tabeꞌ ke jemat te de kuta Klusi
1
Surat toꞌ ari ku Paulos te dapileh jadi rasol Isa Al Maseh nunaꞌ kedekaꞌ Tuhan Allah. Tabeꞌ ari ku abaꞌ Timutios menyadeꞌ seiman kita, 2 ke kitaꞌ urang te daempu Tuhan Allah abaꞌ te setia ke Isa Al Maseh de kuta Klusi. Kami bradua isaꞌ Tuhan Allah Apai kita nganyaꞌ pemayek ati Ya abaꞌ mreꞌ idop penoh damai ke kitaꞌ.Paulos bradua abaꞌ besukor ke jemat te adai de kuta Klusi
3 Kami slareh ngucap sukor ke Allah, Apai Tuhan kita Isa Al Maseh, ngenap kaleꞌ kami bradua ke kitaꞌ. 4 Kami besukor nema kami udah ninga kati kitaꞌ pecayaꞌ ke Isa Al Maseh abaꞌ kati kaseh kitaꞌ ke kebala urang te daempu Tuhan Allah. 5 Kitaꞌ pecayaꞌ abaꞌ ngaseh urang nema kitaꞌ ngagam apa te deageh Tuhan Allah ke kitaꞌ de sruga. Kitaꞌ ninga utai nyaꞌ jalai Brita Bayek te kenaꞌ depadah ke kitaꞌ. 6 Brita Bayek nyaꞌ tesebar ke ugaꞌ dunia, abaꞌ entoꞌ betamah mayoh urang pecayaꞌ ke Isa abaꞌ idop sidaꞌ bebaleꞌ, sama upa medaꞌ jalai kitaꞌ semaru ninga Brita Bayek nyaꞌ. Pas nyaꞌ mah, idop kitaꞌ bebaleꞌ abaꞌ kitaꞌ betamah nyarok pemayek ati Tuhan Allah te pengamat. 7 Kitaꞌ udah ninga Brita Bayek nyaꞌ ari Ipapras, kawan kami te kami kaseh. Ya nyaꞌ kawan te setia abaꞌ kami ngelayan Al Maseh de daerah kitaꞌ ngau nguwat pecayaꞌ kitaꞌ ke Ya. 8 Ya mah gaꞌ te madah ke kami kati kitaꞌ kaseh kepangan nema tegal Roh Kudos.
9 Breta kami ninga piyaꞌ, nyaꞌ mah te nyuroh kami slareh bradua ke kitaꞌ. Kami bradua isaꞌ Roh Kudos mukaꞌ pemiker kitaꞌ abaꞌ mreꞌ pemanai ke kitaꞌ isaꞌ tauꞌ badaꞌ apa te dakedekaꞌ Tuhan Allah. 10 Ngau cara nyaꞌ kitaꞌ tauꞌ idop nunaꞌ kedekaꞌ Tuhan Allah, abaꞌ slareh mulah ati Tuhan Allah gaga, isaꞌ alam brena utai kitaꞌ tauꞌ ngasel kebala utai te bayek. Abaꞌ kitaꞌ betamah nglala Tuhan Allah. 11 Kami bradua isaꞌ kuasa Tuhan Allah te lampar besai nguat kitaꞌ. Pas kitaꞌ ngasa pemedeh, kitaꞌ tegoh abaꞌ sabar ngau ati gaga. 12 Kami bradua isaꞌ kitaꞌ besukor ke Allah Apai kita, te udah nyuroh kitaꞌ patot nrimaꞌ apa te udah deageh Ya ke urang te daempu Ya de alam pemrintah Ya te trang. 13 Ya udah ngelepas kita ari kuasa te petang abaꞌ minah kita ke alam pemrintah Anak Ya te ma Ya kaseh. 14 Uleh Anak Ya nyaꞌ kita detebos. Toꞌ breti ugaꞌ dusa kita deampon.
Isa Al Maseh mah te ma penteng
15 Isa Al Maseh toꞌ gamar ari Tuhan Allah te nadai pedaꞌ, Ya anak tuwai Tuhan Allah te udah adai sebedau dunia dapulah abaꞌ lebeh penteng ari ugaꞌ te dapulah Tuhan Allah. 16 Nema ari Ya, ugaꞌ utai dapulah, ugaꞌ te de sruga abaꞌ te de bumi, ugaꞌ kebala utai te pedaꞌ abaꞌ ugaꞌ utai te nadai pedaꞌ, abaꞌ kebala roh te bekuasa, kebala tuan, kebala penguasa abaꞌ pemrintah. Ugaꞌ utai toꞌ dapulah ari Ya abaꞌ ngau Ya. 17 Sebedau ugaꞌ utai adai Ya udah adai, abaꞌ Ya mah te ngator abaꞌ ngintu ugaꞌ utai. 18 Ya kbarat palaꞌ abaꞌ jemat toꞌ kbarat tuboh Ya. Ya mah anak tuwai Tuhan Allah te semaru idop ari pemati, isaꞌ Ya mah te paleng penteng ari ugaꞌ utai. 19 Tuhan Allah kaꞌ, isaꞌ ugaꞌ sipat abaꞌ kuasa te adai de Ya adai gaꞌ de Anak Ya. 20 Abaꞌ ngau darah Al Maseh te mati de kayu saleb, Tuhan Allah nyuroh ugaꞌ utai damai ageꞌ abaꞌ Ya. Bayek te adai de bumi bayek te adai de sruga, udah dedamai abaꞌ Tuhan Allah.
21 Meliyaꞌ teh kitaꞌ jaoh ari Tuhan Allah. Kitaꞌ jadi munsoh Ya nema te kitaꞌ pulah abaꞌ te kitaꞌ piker ke nyaꞌ jat. 22 Uleh entoꞌ Tuhan Allah udah nyuroh hubungan kitaꞌ abaꞌ Ya bayek ageꞌ. Utai toꞌ tejadi jalai Isa jadi ensia, mati de kayu saleb. Entoꞌ kitaꞌ tauꞌ ngadap Tuhan Allah nema kitaꞌ udah de kudos Ya, abaꞌ sama skaleꞌ kitaꞌ niseꞌ pejah de pemedaꞌ Tuhan Allah. 23 Pas kitaꞌ pecayaꞌ, kitaꞌ alah slareh kuat abaꞌ nang guncang. Nang kitaꞌ kaꞌ degansat ari Brita bayek te kitaꞌ agam. Brita Bayek te sama nyaꞌ udah depadah ke ugaꞌ urang de dunia toꞌ, abaꞌ ku Paulos playan Ya, udah de tugas madah Brita Bayek nyaꞌ.
Paulos bejuang ngau jemat
24 Entoꞌ ku ma gaga ku tauꞌ ngasa pemedeh tegal kitaꞌ, nema ngau cara tuboh ku ngasa pemedeh, ku ngasa pemedeh upa te udah dasa Al Maseh alam tuboh Ya kedireꞌ. Tuboh Ya nyaꞌ jemat. 25 Ku udah jadi playan jemat nyaꞌ nunaꞌ tugas te udah de pecayaꞌ Tuhan Allah ke ku. Tugas ku nyaꞌ madah ugaꞌ pesau Ya ke kitaꞌ, 26 pesau Ya te detapok beratos-ratos taon abaꞌ turon menuron, uleh entoꞌ depadah ke urang te daempu Ya. 27 Tuhan Allah kaꞌ isaꞌ ugaꞌ bansa tauꞌ badaꞌ lampar kaya abaꞌ bayek apa te slamaꞌ toꞌ ageꞌ de tapok. Brita Bayek te detapok nyaꞌ Al Maseh idop alam kitaꞌ abaꞌ Ya mah te deagam kitaꞌ, isaꞌ kitaꞌ tauꞌ dajunyong tingeꞌ abaꞌ Tuhan Allah.
28 Al Maseh nyaꞌ mah te kami padah ke ngenap urang. Kami ngingat abaꞌ ngajar urang ngau pemanai ari Tuhan Allah, isaꞌ sidaꞌ niseꞌ pejah demua Tuhan Allah nema sidaꞌ udah suteꞌ abaꞌ Al Maseh. 29 Isaꞌ ku tauꞌ buleh utai nyaꞌ, ku bekreja bepanteng tulang. Ku bejuang ngau ugaꞌ tenaga te dabreꞌ Al Maseh ke ku abaꞌ ngau kuasa Al Maseh te bekreja alam ku.