SURAT PAULOS KE JEMAT
PLIPI
PENULAU BECAKAP
Jemat de Plipi toꞌ jemat te semaru dediri Paulos de Eropa. Plipi toꞌ adai de Makedunia, suteꞌ Propinsi pemrintah Ruma. Surat Paulos ka Jemat Plipi toꞌ datules Paulos dapenyara. Ati ya tengan nyaꞌ saban nema adai kebala urang te nentang ya. Piyaꞌ gaꞌ dealam jemat Plipi nyaꞌ adai kebala urang te ngajar kebala pengajar te nyimpang. Amat piyaꞌ surat Paulos toꞌ nyamai goꞌ abaꞌ penoh pengarap. Apa te ngasoh piyaꞌ? Niseꞌ bukai, nyaꞌ nema Paulos pecayaꞌ amat ke Isa Al Maseh.
Paulos nules surat toꞌ, semaru ya kaꞌ betrimaꞌ kaseh ke jemat te de Plipi nema sidaꞌ udah mantoꞌ ya pas ya tengan niseꞌ kebala utai de penyara. Abaꞌ ari penyara ya ngeransak sidaꞌ isaꞌ sidaꞌ brani abaꞌ tan ngadap kebala te pedeh. Paulos bamat-amat mintaꞌ isaꞌ sidaꞌ renah ati upa Isa, nadai sumong abaꞌ nadai menteng direꞌ kedireꞌ. Paulos ngingat ke sidaꞌ, tegal pemayek ati Tuhan Allah mah, Ya ngasoh sidaꞌ suteꞌ abaꞌ Al Maseh. Sidaꞌ slamat nadai tegal sidaꞌ setia abaꞌ patoh ke prator agama Yahudi uleh nema sidaꞌ pecayaꞌ ke Isa Al Maseh. Udah nyaꞌ Paulos nules gaꞌ tentang pengaga ya te dabreꞌ Tuhan Allah ke kebala urang te idop suteꞌ abaꞌ Al Maseh.
Surat toꞌ lebeh mayoh ngisah kati urang te pecayaꞌ ke Isa Al Maseh tauꞌ gaga, tauꞌ tan, tauꞌ suteꞌ pemiker abaꞌ tauꞌ sabar ke kebala urang. Surat toꞌ nyelas gaꞌ upa kati kaseh Paulos ke jemat Plipi.