Anak abaꞌ apai inai
6
O kebala anak, patoh ke apai inai kitaꞌ nunaꞌ te dekedekaꞌ Tuhan Allah nema nyaꞌ mah te alah kitaꞌ pulah. 2 “Hormat ke apai inai kitaꞌ.” Toꞌ printah Tuhan Allah te semaru adai danyi. Enteꞌ kitaꞌ nunaꞌ printah Ya nyaꞌ, 3 idop kitaꞌ nyamai abaꞌ umor kitaꞌ panyai de dunia toꞌ.a4 Abaꞌ kebala apai, nang kitaꞌ becakap abaꞌ mulah utai te nyuroh anak kitaꞌ ranseng, uleh intu abaꞌ didek ke sidaꞌ nunaꞌ apa te jakoꞌ Tuhan Allah.
Ulon abaꞌ tuan
5 O kebala kitaꞌ te jadi ulon, patoh ke printah tuan kitaꞌ de dunia toꞌ ngau hormat. Pulah ke ugaꞌ nyaꞌ ngau ati te tulos, sama upa medaꞌ kitaꞌ patoh ke Al Maseh. 6 Nang peroꞌ de mua urang bayah kaꞌ nyuroh ati ensia gaga, uleh pulah ke ugaꞌ nyaꞌ ngenap ati, nema kitaꞌ ulon Al Maseh te nunaꞌ penekaꞌ Ya. 7 Kreja ke tugas kitaꞌ ngau ati gaga, abaꞌ layan ke tuan kitaꞌ upa medaꞌ kitaꞌ ngelayan Tuhan Isa. 8 Dinga kah, ngenap urang bayek ulon bayek te ukai ulon, enteꞌ sidaꞌ udah mulah utai te bayek jemah lah Tuhan Allah kaꞌ malas ke sidaꞌ.
9 Abaꞌ kitaꞌ kebala tuan, pulah ke te upa nyaꞌ ke kebala ulon kitaꞌ. Nang kita ngancam sidaꞌ, nema kitaꞌ tauꞌ badaꞌ Tuhan kitaꞌ Tuhan sidaꞌ gaꞌ. Tuhan toꞌ adai de surga abaꞌ Ya nadai nyemeh mipeh urang.
Cara ngelawan Ibles Kepalaꞌ kebala sitan
10 Pesau ku te pemadoꞌ toꞌ, kuat ke ati kitaꞌ ngau kuasa Tuhan te lampar besai, ngau cara kitaꞌ suteꞌ abaꞌ Ya. 11 Ngau ke ugaꞌ alat perang te debereꞌ Tuhan Allah ke kitaꞌ, isaꞌ kitaꞌ talah ngelawan tipu Ibles Kepalaꞌ kebala sitan. 12 Nema kita bejuang toꞌ ukai ngelawan ensia, uleh ngelawan brena macam roh te mrintah, kebala penguasa de dunia te petang toꞌ abaꞌ kebala sitan de udara. 13 Kebaꞌ nyaꞌ ngau ke ugaꞌ alat perang Tuhan Allah, isaꞌ kitaꞌ talah ngelawan munsoh de senta ari te jat datai abaꞌ kitaꞌ kuat datai ke pemadoꞌ.
14 Tegoh ke kitaꞌ diri. Pegai ke pengajar te kenaꞌ ari Tuhan Allah. Nema pengajar te kenaꞌ nyaꞌ kebarat ke sementeng te nyuroh kitaꞌ selareh siap. Pegai ke idop te kenaꞌ nema idop kenaꞌ nyaꞌ kebarat ke baju besi te kaꞌ ngelinong kitaꞌ.b 15 Kitaꞌ alah selareh siap madah Brita Bayek damai, nema selareh siap nyaꞌ kebarat ke sepatu te dengau kitaꞌ.c 16 Alam brena utai kitaꞌ alah selareh beiman, nema iman nyaꞌ kebarat prisai te tauꞌ madam ugaꞌ panah api Ibles Kepalaꞌ kebala sitan. 17 Abaꞌ yaken ke kitaꞌ Tuhan Allah udah nyelamat kitaꞌ, nema selamat te ari Tuhan Allah nyaꞌ kebarat tupi perang te ngelinong palaꞌ kitaꞌ. Abaꞌ pegai ke te jakoꞌ Tuhan Allah upa medaꞌ megai pedang nema te jakoꞌ Ya adai penguat ari Roh Kudos.d 18 Pulah ke ugaꞌ nyaꞌ blumaꞌ bradua mintaꞌ tulong ari Allah. Ngenap kaleꞌ kitaꞌ bradua, bradua ke nunaꞌ apa te Roh Kudos pimpen ke kitaꞌ. Kitaꞌ alah selareh siap bradua ke ugaꞌ jemat Tuhan Allah, nang sampai lejoꞌ. 19 Nang kelupa gaꞌ bradua ke ku, isaꞌ ngenap kaleꞌ ku becakap, Tuhan Allah mereꞌ cakap te pas ke ku abaꞌ isaꞌ ku berani madah Brita Bayek te meliyaꞌ detapok Tuhan Allah ari urang. 20 Ku deutos Al Maseh madah Brita Bayek, abaꞌ tegal nyaꞌ mah entoꞌ ku de penyara. Bradua ke ku isaꞌ ku berani becakap ke Brita Bayek nunaꞌ te detugas ke ku.
Pesau te pemadoꞌ
21 Tikikos kaꞌ nusoi pengidop ku ke kitaꞌ, isaꞌ kitaꞌ tauꞌ badaꞌ kati brita ku. Tikikos toꞌ menyadeꞌ kita te kita kaseh abaꞌ ya setia ngelayan Tuhan. 22 Ya ku utos ke kitaꞌ isaꞌ kitaꞌ ninga lansong ari ya kati brita kami isaꞌ kitaꞌ nadai puas ngagam kami.