Idop alam trang
5
Kitaꞌ toꞌ kebala anak Tuhan Allah te dakaseh, kebaꞌ nyaꞌ kitaꞌ alah nunaꞌ apa te dapulah Tuhan Allah. 2 Kitaꞌ alah idop alam kaseh ke pangan bukai, upa medaꞌ Isa Al Maseh udah ngaseh kitaꞌ abaꞌ udah nyerah direꞌ mati nebos dusa kita. Apa te udah dapulah Ya nyaꞌ jadi pesemah te bau nyamai de mua Tuhan Allah.a 3 Kebaꞌ nang kitaꞌ kanyi abaꞌ nang kitaꞌ mulah utai te nadai senunoh abaꞌ nang tamaꞌ. Nang sampai kitaꞌ jadi buah cakap urang nema kitaꞌ toꞌ urang te daempu Tuhan Allah. 4 Abaꞌ nang gaꞌ kitaꞌ cabol mulot abaꞌ becakap ke utai te niseꞌ reti, nema utai nyaꞌ nadai patot kitaꞌ cakap. Uleh kitaꞌ alah slareh besukor ke Tuhan Allah nema apa te udah Ya pulah. 5 Kitaꞌ alah tauꞌ badaꞌ, kebala urang te kanyi, urang te mulah utai te nadai senunoh abaꞌ urang te tamaꞌ nyaꞌ sama mah abaꞌ urang te nyemah berhala. Sidaꞌ niseꞌ jatah de alam Pemrintah Isa Al Maseh abaꞌ Tuhan Allah. 6 Nang kitaꞌ semengkauꞌ datesat kebala cakap urang te bulaꞌ tentang kebala dusa nyaꞌ tadeꞌ, nema kebala dusa nyaꞌ nyuroh Tuhan Allah ranseng ke kebala urang te nadai patoh ke Ya. 7 Kebaꞌ nyaꞌ nang kitaꞌ bekawan abaꞌ sidaꞌ. 8 Meliyaꞌ teh amat mah kitaꞌ idop de teban te petang, uleh entoꞌ kitaꞌ nyau de teban te tampak nema kitaꞌ udah daempu Tuhan. Kebaꞌ nyaꞌ kitaꞌ alah idop upa urang te idop de teban te tampak. 9 Nema urang te idop de teban te tampak tauꞌ mulah ugaꞌ kebala utai te bayek, te adel abaꞌ kenaꞌ de mua Tuhan Allah. 10 Brusaha ke kitaꞌ ngigaꞌ abaꞌ nunaꞌ apa te nyuroh Tuhan Allah gaga. 11 Nang kitaꞌ mulah kebala utai te niseꞌ reti te gah dapulah kebala urang te idop de teban te petang. Uleh kitaꞌ alah madah ke sidaꞌ enteꞌ kebala utai te sidaꞌ pulah ke nyaꞌ salah. 12 Nyebot gena jaꞌ te udah dapulah sidaꞌ de teban te petang, nyaꞌ udah nyuroh malu. 13 Enteꞌ trang nyaꞌ nyuroh kebala utai pedaꞌ, ugaꞌ te deanyaꞌ nyaꞌ tampak amat. 14 Nyaꞌ nyuroh adai urang madah:“Dani ke meh te tengan tinok,
abaꞌ bangket ke meh ari pemati!
Al Maseh kaꞌ nerang meh.”
15 Kebaꞌ nyaꞌ prati ke bamat cara kitaꞌ idop. Nang kitaꞌ idop upa urang te budu, uleh kitaꞌ alah idop upa urang te panai. 16 Abaꞌ ngenap adai kesempatan pulah ke te bayek, nema jaman toꞌ penoh pemenyat. 17 Kebaꞌ nyaꞌ nang kitaꞌ budu; brusaha kah kitaꞌ isaꞌ nyarok te dakedekaꞌ Tuhan Allah. 18 Abaꞌ nang kitaꞌ mabok aiꞌ angor nema mabok aiꞌ angor toꞌ nyuroh ngerugi direꞌ abaꞌ ngerugi pangan bukai, uleh kitaꞌ alah penoh Roh Kudos. 19 Kuat ke pangan bukai ngau apa te de tules alam masmur abaꞌ kebala lagu rohani. Menanyi, puji ke Tuhan Allah ngau ati gaga. 20 Alam brena utai kitaꞌ alah slareh besukor ke Tuhan Allah Apai kita alam nama Tuhan kita Isa Al Maseh. 21 Kitaꞌ alah sama kaꞌ ninga pangan bukai nema kitaꞌ hormat ke Al Maseh.
Laki bini
22 O kebala bini, kitaꞌ alah kaꞌ ninga laki kitaꞌ upa medaꞌ kitaꞌ kaꞌ ninga Tuhan, 23 nema laki toꞌ palaꞌ bini sama upa medaꞌ Al Maseh palaꞌ jemat. Ya mah te udah nyelamat jemat, tuboh Ya kedireꞌ. 24 Sama upa medaꞌ jemat kaꞌ ninga Al Maseh piyaꞌ gaꞌ kebala bini alah kaꞌ ninga laki sidaꞌ alam brena utai.
25 O kebala laki, kaseh ke bini kitaꞌ upa medaꞌ Al Maseh udah ngaseh jemat abaꞌ udah nyerah idop Ya isaꞌ jemat daslamat. 26 Al Maseh nyerah direꞌ mati isaꞌ jemat Ya kudos. Ya mreseh jemat ngau Brita Bayek abaꞌ ngau aiꞌ. 27 Ngau cara nyaꞌ Al Maseh mulah jemat bedawar datai de mua Ya. Jemat bamat-amat breseh niseꞌ kurang abaꞌ penyalah sama skaleꞌ. 28 Upa piyaꞌ gaꞌ laki alah kaseh ke bini upa medaꞌ ngaseh tuboh direꞌ. Urang te kaseh ke bini direꞌ breti ya ngaseh direꞌ. 29 Nema nadai kalaꞌ urang areh ke tuboh direꞌ, uleh sidaꞌ ngintu tuboh direꞌ upa medaꞌ Al Maseh ngintu jemat Ya. 30 Kita daintu Ya nema kita toꞌ anggota tuboh Ya. 31 Kebaꞌ nyaꞌ adai datules upa pitoꞌ, “Urang laki kaꞌ nudi apai abaꞌ inai ya abaꞌ suteꞌ abaꞌ bini ya, kebaꞌ snikoꞌ jadi suteꞌ tuboh.”b 32 Reti apa te udah ku padah ke toꞌ, ma mah dalam. Uleh apa te udah ku padah kah nyaꞌ tentang hubungan Isa Al Maseh abaꞌ jemat Ya. 33 Uleh amat piyaꞌ tetap mah kebala urang laki alah kaseh ke bini direꞌ upa medaꞌ ngaseh direꞌ ke direꞌ. Abaꞌ bini alah hormat ke laki direꞌ.