Suteꞌ alam Tuhan
4
Kebaꞌ nyaꞌ, ku urang te tengan de penyara tegal ngelayan Tuhan Isa, mintaꞌ isaꞌ kitaꞌ idop patot nema kitaꞌ udah dekumai Tuhan Allah. 2 Kitaꞌ alah renah ati, alah lulot abaꞌ ugaꞌ urang, abaꞌ alah sabar. Anyaꞌ ke kaseh kitaꞌ ke sama direꞌ ngau cara sabar nerimaꞌ pangan bukai. 3 Berusaha bamat-amat ke kita idop damai nema kita udah desuteꞌ Roh Kudos. 4 Peroꞌ adai suteꞌ tuboh abaꞌ suteꞌ Roh, upa piyaꞌ gaꞌ Tuhan Allah ngumai kita ngagam utai te sama. 5 Peroꞌ adai sikoꞌ Tuhan, suteꞌ iman abaꞌ suteꞌ paneꞌ. 6 Peroꞌ adai sikoꞌ Tuhan Allah abaꞌ Apai ugaꞌ urang. Ya te mrintah ugaꞌ utai, Ya nyuroh ugaꞌ utai mulah apa te dekedekaꞌ Ya, abaꞌ Ya diyau de ugaꞌ urang. 7 Uleh Isa Al Maseh udah mereꞌ krunia Ya ke kita nunaꞌ te dekedekaꞌ Ya. 8 Kebaꞌ nyaꞌ adai detules alam Kitab Suci upa pitoꞌ,“Ya udah nikeꞌ ke teban te tingeꞌ. Ya ngemalu kebala urang te ngemunsoh Ya ngau cara maksa sidaꞌ nerudi belakang Ya.
Baroꞌ urang te mihak ke Ya, debereꞌ Ya kebala pemereꞌ.”a
9 Piyaꞌ ni enteꞌ depadah, “Ya udah nikeꞌ,” breti Ya gaꞌ te udah turon ke bumi te paleng dalam? 10 Ya te udah turon, Ya nyaꞌ mah gaꞌ te udah nikeꞌ ke langet te paleng tingeꞌ isaꞌ de ugaꞌ utai Ya adai. 11 Abaꞌ Ya kedireꞌ mah te udah mileh urang jadi kebala rasol, kebala nabi, kebala penginyel, kebala gemala abaꞌ pengajar jemat. 12 Ya mereꞌ krunia ke sidaꞌ, isaꞌ sidaꞌ nyiap urang te deempu Tuhan Allah ngelayan Tuhan Allah abaꞌ nguat tuboh Al Maseh, 13 datai ke ugaꞌ kita suteꞌ iman abaꞌ suteꞌ pemenauꞌ sapa Anak Tuhan Allah nyaꞌ. Ugaꞌ pemiker kita betamah tuai, datai ke kita sama upa Al Maseh te empu kebala sipat te bayek.
14 Kebaꞌ nyaꞌ kita nadai ageꞌ upa miyak. Kita nadai ageꞌ upa prau mudah deguncang kiyaꞌ-kitoꞌ. Kita nadai mudah te baiꞌ-baiꞌ kebala pengajar baru te salah abaꞌ pengajar te nipu te nesat kita. 15 Uleh kita alah idop nunaꞌ te kenaꞌ blumaꞌ kaseh ke pangan abaꞌ tumoh upa Al Maseh te jadi palaꞌ jemat. 16 Ya mah te nyuroh ugaꞌ tuboh tetuson bayek abaꞌ detamet suteꞌ. Enteꞌ ugaꞌ anggota tuboh bekreja nunaꞌ tugas direꞌ abaꞌ ngaseh anggota bukai, ugaꞌ tuboh nyaꞌ kaꞌ betumoh abaꞌ nguat anggota bukai.
Cara idop baru te kenaꞌ
17 Kebaꞌ nyaꞌ de mua Tuhan ku ngingat toꞌ ke kitaꞌ: Nang kitaꞌ idop upa urang te nadai ngelala Tuhan Allah ngau pemiker te niseꞌ reti. 18 Pemiker sidaꞌ petang, abaꞌ sidaꞌ jaoh ari idop te Tuhan Allah kaꞌ bereꞌ ke sidaꞌ. Utai nyaꞌ tauꞌ piyaꞌ nema tegal pemudu abaꞌ penegel ati sidaꞌ. 19 Sidaꞌ nyau niseꞌ mua malu, nyaꞌ te nyuroh sidaꞌ selareh kaꞌ mulah te jat, nunaꞌ penekaꞌ ati direꞌ. 20 Uleh te kitaꞌ pelajar ke ari Al Maseh nadai upa piyaꞌ. 21 Nema kitaꞌ udah ninga sapa Isa nyaꞌ abaꞌ kitaꞌ nerimaꞌ pengajar te kenaꞌ ari Ya. 22 Kebaꞌ nyaꞌ dudi ke cara idop te lamaꞌ nema nyaꞌ ngemudu kitaꞌ, abaꞌ penekaꞌ idop te upa piyaꞌ ngerusak kitaꞌ. 23 Kitaꞌ alah nyadi Tuhan Allah maleꞌ ati abaꞌ pemiker kitaꞌ. 24 Kitaꞌ nunaꞌ cara idop te baru, nema Tuhan Allah udah maleꞌ kitaꞌ upa sipat Ya isaꞌ kitaꞌ bamat-amat kenaꞌ abaꞌ kudos. 25 Kebaꞌ nyaꞌ kebala menyadeꞌ nang ageꞌ kitaꞌ ngemulaꞌ. Jujor ke kitaꞌ abaꞌ urang bukai, nema kita toꞌ sama anggota tuboh Al Maseh.b 26 Enteꞌ kitaꞌ ranseng ke urang, nang sampai nyaꞌ nyuroh kitaꞌ dusa.c Nang kitaꞌ ranseng datai ke mataari padam. 27 Nema enteꞌ kitaꞌ ranseng sengabot kitaꞌ mereꞌ kesempatan ke Ibles kepalaꞌ kebala sitan ngalah kitaꞌ. 28 Urang te gah encuri, nang encuri ageꞌ, sidaꞌ alah bamat-amat brunteꞌ kreja ngigaꞌ duet ngau cara te bayek, isaꞌ duet te dengau sidaꞌ ari-ari bayah abaꞌ isaꞌ sidaꞌ tauꞌ gaꞌ mereꞌ ke urang te niseꞌ.
29 Nang kitaꞌ becakap ke utai te medeh ati pangan. Uleh cakap ke utai te beguna te nguat ati. Cakap te upa nyaꞌ jadi berkat ngau urang te ninga kitaꞌ. 30 Nang sampai idop kitaꞌ nyuroh Roh Kudos riyu, nema Roh Kudos te adai alam kitaꞌ nyaꞌ kelaiꞌ enteꞌ kitaꞌ toꞌ empu Tuhan Allah, abaꞌ jemah lah de ari te udah deatoh, Ya pesti bamat-amat ngelepas kitaꞌ ari dunia te petang toꞌ. 31 Jadi kitaꞌ pedeh ati, garang, abaꞌ ranseng ke urang. Jadi kitaꞌ belayaꞌ abaꞌ ugaꞌ urang, jadi mejaiꞌ pangan abaꞌ jadi mulah kebala utai te jat. 32 Kitaꞌ alah bayek ati abaꞌ kaseh ke pangan. Kitaꞌ alah ngampon urang bukai upa Tuhan Allah ngampon kitaꞌ, nema kitaꞌ suteꞌ abaꞌ Al Maseh.