Paulos nusoi Brita Bayek ke urang te ukai bansa Yahudi
3
Nyaꞌ nyuroh ku toꞌ, Paulos, depenyara nema ku nusoi Isa Al Maseh ke kitaꞌ urang te ukai bansa Yahudi. 2 Kitaꞌ pesti udah ninga, tugas te depecayaꞌ Tuhan Allah ke ku, isaꞌ ku madah pemayek ati Ya ke kitaꞌ. 3 Tuhan Allah nganyaꞌ kusos ke ku apa te udah Ya tapok ari urang upa medaꞌ te udah ku tules ke tadeꞌ. 4 Enteꞌ kitaꞌ maca apa te ku tules, kitaꞌ tauꞌ badaꞌ Tuhan Allah te nyuroh ku nyarok sapa Al Maseh nyaꞌ te selamaꞌ toꞌ Ya tapok ari urang. 5 Meliyaꞌ teh te detapok nyaꞌ nadai kalaꞌ depadah ke urang, uleh entoꞌ Roh Kudos udah nganyaꞌ ke kebala rasol abaꞌ nabi te depileh Ya. 6 Te detapok nyaꞌ upa pitoꞌ: Tegal pecayaꞌ ke Brita Bayek nyaꞌ, bansa bukai ngasa berkat te dulau teh peroꞌ deageh ke bangsa Yahudi. Bansa bukai sama abaꞌ bansa Yahudi jadi anggota tuboh Al Maseh, abaꞌ sama nerimaꞌ apa te udah dedanyi Tuhan Allah ari Isa Al Maseh.7 Tegal kuasa abaꞌ pemayek ati Tuhan Allah, ku tauꞌ jadi pelayan Ya abaꞌ madah Brita Bayek Ya. 8 Ari entara ugaꞌ urang te deempu Tuhan Allah ku mah urang te paleng met. Uleh Tuhan Allah udah nganyaꞌ pemayek ati Ya ke ku. Ya ngutos ku ke urang te ukai bansa Yahudi madah lampar besai berkat ari Isa Al Maseh. 9 Abaꞌ ku detugas Allah nyelas ke ugaꞌ urang kati Ya nemoꞌ pengamoꞌ te detapok Ya meliyaꞌ. Ya mah te mulah langet abaꞌ bumi. 10 Maksot Tuhan Allah, isaꞌ entoꞌ ari jemat, kebala mlikat abaꞌ kebala penguasa de sruga medaꞌ lampar besai pemanai Tuhan Allah alam brena utai. 11 Tuhan Allah mulah ugaꞌ nyaꞌ nunaꞌ te udah deamoꞌ Ya ari semaru. Utai nyaꞌ tejadi nema apa te udah depulah Isa Al Maseh, Tuhan kita. 12 Kita suteꞌ abaꞌ Al Maseh abaꞌ pecayaꞌ ke Ya, nyaꞌ te nyuroh kita nadai takot nyemak Tuhan Allah, nema yaken kita detrimaꞌ. 13 Kebaꞌ nyaꞌ ku mintaꞌ ke kitaꞌ, nang putos asa medaꞌ ku ma pedeh tegal nusoi Brita Bayek ke kitaꞌ. Pemedeh ku tunaꞌ des alah nyuroh kitaꞌ gaga nema ngau cara nyaꞌ Tuhan Allah ningeꞌ kitaꞌ.
Pradua Paulos
14 Nyaꞌ te nyuroh ku nyungkon nyemah bradua de mua Apai kita. 15 Ya mah te mereꞌ idop ke ugaꞌ te diyau de sruga abaꞌ de bumi. 16 Ku bradua engkremaꞌ Tuhan Allah nalau kitaꞌ ngau kebala berkat te lampar besai, isaꞌ Roh Kudos nguat ati kitaꞌ. 17 Abaꞌ ku bradua isaꞌ Isa Al Maseh diyau alam ati kitaꞌ nema kitaꞌ pecayaꞌ ke Ya. Abaꞌ ku bradua isaꞌ kaseh nyuroh kitaꞌ tegoh upa medaꞌ pon kayu te urat ya dalam, abaꞌ upa rumah te depulah ngau dasar te tegoh. 18 Abaꞌ ku bradua isaꞌ kitaꞌ abaꞌ ugaꞌ urang te deempu Tuhan Allah nyarok, lampar luah, panyai, tingeꞌ, abaꞌ dalam kaseh Al Maseh nyaꞌ. 19 Ku bradua isaꞌ kitaꞌ ngasa kaseh Ya te ma jaoh de luar pemiker kita, isaꞌ kitaꞌ depenoh ngau sipat Tuhan Allah.