Urang daslamat tegal pemayek ati Tuhan Allah
2
Meliyaꞌ teh kitaꞌ udah mati rohani nema kitaꞌ dusa abaꞌ ngelawan printah Tuhan Allah. 2 Kitaꞌ idop nunaꞌ kebala utai te dapulah urang dunia abaꞌ nunaꞌ penekaꞌ Ibles Kepalaꞌ bala sitan te adai de udara, ya te tengan bekuasa alam pengidop ugaꞌ urang te nadai patoh ke Tuhan Allah. 3 Meliyaꞌ teh ugaꞌ kita sigeꞌ sama mah upa sidaꞌ, kita idop nunaꞌ penekaꞌ abaꞌ pemiker kita te jat. Kita patot gaꞌ nrimaꞌ ukom Tuhan Allah, upa medaꞌ urang dunia toꞌ. 4 Uleh lampar besai pengaseh Tuhan Allah abaꞌ Ya ma mah kaseh ke kita. 5 Nyaꞌ nyuroh Ya mreꞌ idop baru abaꞌ Al Maseh tengan kita mati tegal kebala penyalah kita. Tegal pemayek Ya gaꞌ kitaꞌ daslamat. 6 Tuhan Allah ngidop kita ari pemati sama upa medaꞌ Ya ngidop Isa Al Maseh. Ya nepoꞌ kita abaꞌ Isa de sruga. Ugaꞌ nyaꞌ Ya pulah nema kita nyau suteꞌ abaꞌ Isa. 7 Tuhan Allah mulah piyaꞌ isaꞌ jemah lah ensia medaꞌ lampar besai pemayek ati Ya te niseꞌ taneng. Pemayek ati Ya nyaꞌ deanyaꞌ Ya pas Isa Al Maseh mulah te bayek ke kita. 8 Tuhan Allah nyelamat kitaꞌ nema pemayek ati Ya, ngau cara kitaꞌ pecayaꞌ ke Ya, ukai tegal apa te kitaꞌ pulah. Kitaꞌ tauꞌ daslamat toꞌ pemreꞌ Tuhan Allah. 9 Nyaꞌ ukai asel kreja kitaꞌ, kebaꞌ nang adai urang te ngepah ngemah direꞌ. 10 Tuhan Allah udah mulah idop kita baru. Kita tauꞌ piyaꞌ nema kita suteꞌ abaꞌ Isa Al Maseh kebaꞌ nyaꞌ Tuhan Allah kaꞌ kita mulah kebala utai te bayek te udah deamoꞌ Ya ari meliyaꞌ.Isa Al Maseh nyuteꞌ bansa Yahudi abaꞌ bansa bukai
11 Kebala menyadeꞌ ku te ukai ari bansa Yahudi. Ingat ke pengidop kitaꞌ meliyaꞌ teh. Kitaꞌ dasebot bansa te nadai dasunat, uleh sidaꞌ Yahudi ngakoꞌ direꞌ bansa te dasunat. Sunat toꞌ kelaiꞌ te adai de tuboh ensia abaꞌ toꞌ dapulah uleh ensia. 12 Meliyaꞌ teh kitaꞌ nadai suteꞌ abaꞌ Isa Al Maseh, kitaꞌ toꞌ bansa aseng te nadai masok urang te dapileh Tuhan Allah. Kitaꞌ dulau niseꞌ hak buleh apa te udah dedanyi Tuhan Allah ke bansa Yahudi. Kitaꞌ idop alam dunia toꞌ niseꞌ agam abaꞌ nadai nglala Tuhan Allah. 13 Uleh entoꞌ nema kitaꞌ nyau suteꞌ abaꞌ Isa Al Maseh, kitaꞌ te jaoh meliyaꞌ entoꞌ nyau semak tegal darah Al Maseh. 14 Al Maseh mah te nyuroh kita tauꞌ idop damai, Ya te udah nyuteꞌ bansa Yahudi abaꞌ bansa bukai. Pelayaꞌ kita upa medaꞌ dineng te tebal daruboh Isa. 15 Isa nyerah idop direꞌ. Ngau cara nyaꞌ Ya ngapos prator agama Yahudi abaꞌ ugaꞌ kebala perintah te diyaꞌ. Tegal nyaꞌ gaꞌ dua klumpok bansa te bebida jadi suteꞌ abaꞌ tauꞌ idop alam damai nema Isa te udah nyuteꞌ sidaꞌ. 16 Tegal Ya mati de kayu saleb, Al Maseh udah ngemadoꞌ pelayaꞌ bansa Yahudi abaꞌ bansa bukai. Abaꞌ Ya te udah nyuteꞌ kitaꞌ ngenamai kitaꞌ abaꞌ Tuhan Allah. 17 Isa datai madah Brita Bayek tentang damai ke kitaꞌ te ukai bansa Yahudi, te jaoh ari Tuhan Allah. Abaꞌ Ya madah gaꞌ Brita nyaꞌ ke kami bansa Yahudi te semak abaꞌ Tuhan Allah.a 18 Ugaꞌ kita, bayek sidaꞌ Yahudi bayek urang ari bansa bukai, ari Al Maseh mah kita tauꞌ datai ngadap Apai kita nema Roh Kudos nalau ugaꞌ kita. 19 Kebaꞌ nyaꞌ kitaꞌ nadai ageꞌ urang aseng abaꞌ penatai. Uleh entoꞌ kitaꞌ nyau jadi suteꞌ abaꞌ urang te daempu Tuhan Allah abaꞌ nyau sebilek abaꞌ Tuhan Allah. 20 Ugaꞌ kita toꞌ kebarat rumah te dadiri Tuhan Allah. Kebala rasol abaꞌ nabi upa medaꞌ dasar rumah nyaꞌ, abaꞌ Isa Al Maseh upa medaꞌ tiang te nyuroh rumah nyaꞌ tegoh. 21 Kita udah suteꞌ abaꞌ Isa Al Maseh. Nyaꞌ te nyuroh kita datipan Ya ngau bayek abaꞌ detangker jadi rumah Tuhan Allah te besai te kusos ngau Ya. 22 Tuhan Allah niri ugaꞌ kita ngau rumah teban Roh Ya diyau nema kita suteꞌ abaꞌ Isa Al Maseh.