SURAT PAULOS KE JEMAT
EPISOS
Tabeꞌ ke jemat de Episos
1
Tabeꞌ ari ku Paulos. Surat toꞌ ku tules ke kebala urang Episos te setia te daempu Tuhan Allah. Ku toꞌ rasol Isa Al Maseh. Ku jadi rasol nunaꞌ penekaꞌ Tuhan Allah.a 2 Ku bradua ke kitaꞌ isaꞌ Tuhan Allah Apai kita abaꞌ Tuhan Isa Al Maseh nganyaꞌ pemayek ati abaꞌ mreꞌ idop penoh damai.Kebala berkat rohani te dabreꞌ Tuhan Allah
3 Puji Tuhan Allah. Ya mah Allah abaꞌ Apai Tuhan kita Isa Al Maseh te udah mreꞌ ke kita kebala berkat rohani ari sruga nema kita udah suteꞌ abaꞌ Al Maseh. 4 Sebedau dunia toꞌ dapulah, Tuhan Allah udah mileh kita ngau anak Ya ngau cara nyuteꞌ kita abaꞌ Al Maseh, isaꞌ kita jadi kebala urang te suci abaꞌ idop niseꞌ penyalah de mua Ya. 5 Tegal Ya kaseh ke kita, kebaꞌ ari semaru Tuhan Allah udah ngamoꞌ ngeliger kita ngau anak Ya. Ugaꞌ nyaꞌ udah tejadi nema apa te dapulah Isa Al Maseh. Nyaꞌ mah kedekaꞌ Tuhan Allah, nema nyaꞌ te degaga Ya. 6 Kita patot muji Tuhan Allah nema Ya udah nganyaꞌ pemayek ati mileh kita ngau anak Ya. Toꞌ Ya pulah nema Isa Al Maseh, Anak te ma Ya kaseh. 7 Tuhan Allah ma mah bayek ke kita. Nyaꞌ nyuroh Ya nebos kita ngau darah Anak Ya de kayu saleb abaꞌ ngampon kita ari kebala dusa. 8 Ya mulah piyaꞌ nema Ya ma mah kaseh ke kita, abaꞌ Ya udah mreꞌ ke kita brena macam pemanai. 9 Tuhan Allah udah nganyaꞌ ke kita apa te udah deamoꞌ Ya nema nyaꞌ te degaga Ya. Meliyaꞌ teh te deamoꞌ Ya detapok Ya ari urang. Entoꞌ Ya udah mutos nyaꞌ kaꞌ datemoꞌ Al Maseh 10 nunaꞌ senta te udah deatoh Ya. Pengamoꞌ Ya nyaꞌ, ugaꞌ utai te adai de sruga abaꞌ de bumi toꞌ jadi suteꞌ daprintah Al Maseh.
11 Tuhan Allah mulah ugaꞌ utai nunaꞌ penekaꞌ Ya kedireꞌ abaꞌ nunaꞌ te deamoꞌ Ya. Ari semaru Ya udah mileh kita jadi urang te daempu Ya ngau cara nyuteꞌ kita abaꞌ Isa. 12 Isaꞌ kami te blaboh ari semaru ngarap Al Maseh, nunyong tingeꞌ Tuhan Allah nema lampar besai kuasa Ya. 13 Upa piyaꞌ mah gaꞌ kitaꞌ. Kitaꞌ udah suteꞌ abaꞌ Isa, breta kitaꞌ ninga Brita Bayek ari Tuhan Allah te nyelamat kitaꞌ. Breta kitaꞌ pecayaꞌ ke Brita nyaꞌ, Tuhan Allah udah mreꞌ Roh Kudos te udah dedanyi Ya. Roh Kudos nyaꞌ ngau kelaiꞌ enteꞌ kitaꞌ toꞌ empu Ya. 14 Roh Kudos te adai de kita, nyaꞌ mah te nyuroh kita yaken jemah lah Tuhan Allah pesti bamat-amat ngelepas kita te jadi umat Ya abaꞌ mreꞌ apa te udah dedanyi Ya ke kita. Kebaꞌ nyaꞌ boh kita muji Tuhan Allah te lampar besai kuasa.
Pradua Paulos ke jemat Episos
15 Kebaꞌ nyaꞌ, breta ku ninga rita iman kitaꞌ ke Tuhan Isa abaꞌ kaseh kitaꞌ ke ugaꞌ urang daempu Tuhan Allah, 16 ku niseꞌ pemadoꞌ besukor ke Tuhan Allah. Abaꞌ ku slareh ingat bradua ke kitaꞌ. 17 Ku slareh bradua ke Apai te lampar besai kuasa, Allah Tuhan kita Isa Al Maseh. Ku bradua isaꞌ Ya mreꞌ Roh Kudos te kaꞌ madah pengamat tentang Allah abaꞌ nulong kitaꞌ nglala Ya lebeh bayek. 18 Abaꞌ ku bradua isaꞌ Tuhan Allah nyuroh kitaꞌ nyarok abaꞌ yaken ke ugaꞌ utai te bayek te udah deageh Ya ke kitaꞌ jalai Ya gumai kitaꞌ pecayaꞌ ke Ya. Kitaꞌ alah nyarok gaꞌ, luar biasa ugaꞌ utai te bayek te udah Tuhan Allah danyi ke kebala urang te daempu Ya. 19 Abaꞌ ku bradua isaꞌ kitaꞌ nyarok lampar besai kuasa te dengau Tuhan Allah nalau kita urang te pecayaꞌ. Kuasa Tuhan Allah nyaꞌ lampar besai sama upa medaꞌ 20 te dengau Ya ngidop Al Maseh ari pemati abaꞌ nyuroh Isa dudok de sepiyak kanan Ya de sruga. 21 De sruga Al Maseh mrintah ngau kuasa te jaoh lebeh besai ari brena macam jenis roh te mrintah abaꞌ kebala te bekuasa. Al Maseh bekuasa nadai proꞌ de jaman toꞌ uleh jemah gaꞌ lah. 22 Abaꞌ Tuhan Allah udah nepoꞌ ugaꞌ utai debaroh kuasa Isa, abaꞌ ngangkat Isa jadi palaꞌ jemat, jadi palaꞌ ugaꞌ kebala utai. 23 Jemat toꞌ tuboh Isa Al Maseh abaꞌ ugaꞌ te adai de Ya dabreꞌ ke jemat. Ya adai de bumi abaꞌ de sruga, adai diyaꞌ-ditoꞌ.