SURAT PAULOS KE JEMAT
PLIPI
Tabeꞌ
1
Tabeꞌ ari ku Paulos abaꞌ Timutios playan Isa Al Maseh ke ugaꞌ urang te daempu Isa Al Maseh da kuta Plipi. Tabeꞌ gaꞌ ke kebala pemimpen abaꞌ kebala playan jemat.2 Ku bradua ke kitaꞌ, isaꞌ Tuhan Allah Apai kita abaꞌ Tuhan Isa Al Maseh nganyaꞌ pemayek ati Ya abaꞌ mreꞌ idop penoh damai ke kitaꞌ.
Paulos bradua ke jemat
3 Ngenap kaleꞌ ku ingat ke kitaꞌ, ku besukor ke Tuhan Allah. 4 Abaꞌ ngenap kaleꞌ ku bradua ke ugaꞌ kitaꞌ, ku bradua ngau ati gaga, 5 nema blaboh ari semaru pecayaꞌ datai ke entoꞌ, kitaꞌ udah mantoꞌ ku nyebar Brita Bayek ari Tuhan Allah. 6 Tuhan Allah kedireꞌ te udah nudok kreja te bayek nyaꞌ ke kitaꞌ, abaꞌ ku yaken Ya kaꞌ nyamong kreja Ya nyaꞌ datai ke senta Isa Al Maseh datai ageꞌ. 7 Ugaꞌ kitaꞌ slareh adai de ati ku! Ku patot ngasa piyaꞌ nema kitaꞌ udah mantoꞌ ku ngreja tugas kusos te dabreꞌ Tuhan Allah ke ku. Kitaꞌ udah mantoꞌ ku ngreja tugas nyaꞌ nadai proꞌ tengan ku dapenyara toꞌ, uleh tengan ku deluar gaꞌ isaꞌ ku jadi bukti enteꞌ Brita Bayek nyaꞌ kenaꞌ abaꞌ nyaꞌ ngeransak urang isaꞌ tauꞌ bamat-amat pecayaꞌ. 8 Tuhan Allah tauꞌ badaꞌ ku ma gawok ke kitaꞌ. Ku ngaseh ugaꞌ kitaꞌ ngau kaseh te dabreꞌ Isa Al Maseh.
9 Ku bradua ke kitaꞌ: isaꞌ kitaꞌ betamah ngaseh Tuhan Allah abaꞌ sama direꞌ. Ku bradua isaꞌ kitaꞌ bamat-amat nglala Tuhan Allah abaꞌ tauꞌ nyemeh apa te kenaꞌ abaꞌ te salah. 10 Ku kaꞌ kitaꞌ nyarok, isaꞌ kitaꞌ tauꞌ mileh te paleng bayek alam idop kitaꞌ. Ngau cara nyaꞌ idop kitaꞌ suci abaꞌ niseꞌ pejah datai ke senta Isa Al Maseh datai ageꞌ. 11 Ku bradua isaꞌ kitaꞌ slareh mulah utai te bayek, nema proꞌ Isa Al Maseh mah te nyuroh kitaꞌ talah mulah ugaꞌ nyaꞌ. Pas urang medaꞌ pemayek kitaꞌ, urang kaꞌ nyunyong tingeꞌ abaꞌ muji Tuhan Allah.
Paulos gaga nema Brita Bayek de padah
12 Kebala menyadeꞌ, ku kaꞌ kitaꞌ tauꞌ badaꞌ, enteꞌ kebala utai te udah tejadi ke ku nyaꞌ empala ngasoh mayoh urang ninga abaꞌ pecayaꞌ ke Brita Bayek nyaꞌ. 13 Ugaꞌ prajuret istana abaꞌ kebala urang bukai de kuta toꞌ tauꞌ badaꞌ ku dapenyara tegal ku nusoi Brita Bayek. 14 Abaꞌ tegal ku dapenyara, mayoh kebala menyadeꞌ seiman kita lebeh pecayaꞌ ageꞌ ke Tuhan Allah, nyaꞌ nyuroh sidaꞌ empala brani nusoi pesau ari Tuhan Allah ke urang bukai. 15 Adai urang te nusoi Al Maseh nema sidaꞌ ripot abaꞌ blayaꞌ abaꞌ ku, uleh adai gaꞌ te nusoi Al Maseh ngau ati te bayek. 16 Sidaꞌ te bayek ati nyaꞌ nusoi Al Maseh nema sidaꞌ kaseh ke Tuhan Allah abaꞌ ke ku, abaꞌ sidaꞌ tauꞌ badaꞌ Tuhan Allah te nyuroh ku madah Brita Bayek te kenaꞌ toꞌ. 17 Uleh urang te nusoi Al Maseh ngau maksod te nadai bayek; sidaꞌ nusoi ngau direꞌ kedireꞌ isaꞌ sidaꞌ lebeh ari urang bukai. Sidaꞌ miker ngau cara nyaꞌ sidaꞌ tauꞌ namah pemedeh ku alam penyara.
18 Uleh nadai ngapa! te paleng penteng toꞌ Al Maseh detusoi, entah kenyaꞌ dapulah ngau maksod te bayek, entah kenyaꞌ dapulah ngau maksot te nadai bayek. Ku gaga medaꞌ Al Maseh detusoi. Abaꞌ ku slareh gaga, 19 nema ku tauꞌ badaꞌ ku kaꞌ dalepas tegal kitaꞌ bradua ke ku abaꞌ Roh Isa Al Maseh te nalau ku. 20 Te ma ku kedekaꞌ abaꞌ agam, isaꞌ ku nadai malu de mua Tuhan Allah. Ku ngagam ku brani sengabot becakap ngau bibas upa sengket. Slamaꞌ ku ditoꞌ alam tuboh ku toꞌ, ku kaꞌ nyunyong tingeꞌ Al Maseh, bayek ngau pengidop ku, bayek ngau pemati ku. 21 Nema bagi ku enteꞌ ku idop ku proꞌ kaꞌ nyuroh Al Maseh gaga, enteꞌ ku mati ku untong. 22 Uleh enteꞌ ku idop de dunia toꞌ, ku kaꞌ kreja sengabot ke Tuhan, kebaꞌ ku nitauꞌ badaꞌ ni te alah ku pileh, idop ke mati. 23 Ku ma gamaꞌ miker utai toꞌ. Tunaꞌ des ku kaꞌ amat nudi dunia toꞌ, abaꞌ angkat diyau abaꞌ Isa Al Maseh nema nyaꞌ mah te paleng bayek, 24 uleh tegal kitaꞌ, ku alah diyau de dunia toꞌ isaꞌ tauꞌ mantoꞌ kitaꞌ. 25 Nyaꞌ mah te ngasoh ku yaken enteꞌ ku tetap idop abaꞌ kitaꞌ, ku tauꞌ mantoꞌ isaꞌ idop kitaꞌ betamah kuat abaꞌ gaga nema pecayaꞌ ke Al Maseh. 26 Kebaꞌ nyaꞌ, enteꞌ ku bebalek ageꞌ ngusong kitaꞌ, kitaꞌ kaꞌ betamah gaga abaꞌ nyunyong tingeꞌ Isa Al Maseh nema apa te udah dapulah Ya ke ku.
Pengajar isaꞌ slareh bejuang
27 Uleh te paleng penteng entoꞌ, kitaꞌ alah idop upa te de ajar alam Brita Bayek tentang Al Maseh, isaꞌ enteꞌ ku datai, ku medaꞌ abaꞌ enteꞌ ku nadai datai ku ninga kitaꞌ diri tegoh. Kitaꞌ alah sati sepiker bejuang pecayaꞌ ke Tuhan te udah kitaꞌ tinga ke ari Brita Bayek nyaꞌ. 28 Kitaꞌ alah brani abaꞌ nang takot ke kebala urang te ngelawan kitaꞌ. Enteꞌ kitaꞌ nadai takot ke sidaꞌ, nyaꞌ mah tana Tuhan Allah nyelamat kitaꞌ, uleh kebala munsoh kitaꞌ kaꞌ de punas. 29 Kitaꞌ udah debreꞌ Tuhan Allah berkat nadai proꞌ pecayaꞌ ke Al Maseh, uleh kitaꞌ ngasa pemedeh gaꞌ nema kitaꞌ pecayaꞌ ke Ya. 30 Entoꞌ, pemedeh te kitaꞌ asa ke nyaꞌ upa pemedeh te udah tejadi ke ku. Dulau teh kitaꞌ udah medaꞌ pemedeh ku tegal ngelayan Al Maseh abaꞌ entoꞌ tubah mah kitaꞌ ninga ku ngasa pemedeh nyaꞌ.