Pengajar isaꞌ suteꞌ abaꞌ ngemaroh direꞌ upa Al Maseh
2
Kitaꞌ kuat nema kitaꞌ suteꞌ abaꞌ Al Maseh. Abaꞌ kitaꞌ rinang nema Al Maseh ngaseh kitaꞌ! Roh Kudos mimpen kitaꞌ, abaꞌ kitaꞌ sama mrati pangan bukai abaꞌ kaseh ke pangan bukai. 2 Kebaꞌ nyaꞌ pulah ke isaꞌ ati ku bamat-amat gaga: sati sepiker ke kitaꞌ abaꞌ pangan bukai abaꞌ kitaꞌ alah kaseh ke pangan bukai abaꞌ suteꞌ pemansang. 3 Nang mulah utai te proꞌ nguntong direꞌ abaꞌ mintaꞌ puji urang. Kitaꞌ alah renah ati abaꞌ ngangap urang bukai lebeh penteng ari kitaꞌ. 4 Nang proꞌ miker te bayek ngau direꞌ, uleh piker ke gaꞌ te bayek ke urang bukai.5 Kitaꞌ alah bepiker piyaꞌ nema upa piyaꞌ mah cara Isa Al Maseh bepiker.
6 Amat mah Isa sama abaꞌ Tuhan Allah alam brena utai,
uleh Ya nadai ngangap nyaꞌ, utai te alah de pegai tegoh.
7 Uleh Ya nudi ugaꞌ nyaꞌ.
Ya jadi ulon
abaꞌ datai ke dunia toꞌ jadi ensia biasa.
8 Pas Ya jadi ensia,
Ya ngemaroh direꞌ abaꞌ idop patoh ke Tuhan Allah datai ke Ya mati de kayu saleb.
9 Kebaꞌ nyaꞌ mah te nyuroh Tuhan Allah nyunyong tingeꞌ Isa,
abaꞌ mreꞌ ke Ya nama te paleng bekuasa ari kebala nama te ke bukai.
10 Tuhan Allah mulah piyaꞌ isaꞌ
ngenap urang, bayek te adai de sruga, te adai de dunia,
abaꞌ te adai de sebayan
kaꞌ nyungkon nyemah Isa.
11 Abaꞌ ngenap urang ngakoꞌ Isa Al Maseh nyaꞌ Tuhan.
Ngau cara nyaꞌ gaꞌ Allah Apai dajunyong tingeꞌ.
Besinar upa piyanau te mansau dunia toꞌ
12 Kebala menyadeꞌ te ku kaseh, jalai ku ageꞌ abaꞌ kitaꞌ, kitaꞌ slareh patoh ke apa te ku ajar ke kitaꞌ. Kitaꞌ alah slareh patoh nang proꞌ tengan ku ageꞌ abaꞌ kitaꞌ uleh kitaꞌ alah lebeh bamat-amat ageꞌ pas tengan ku nadai abaꞌ kitaꞌ. Tuhan Allah udah nyelamat kitaꞌ kebaꞌ nyaꞌ kitaꞌ alah idop upa urang te udah daslamat, idop takot abaꞌ hormat ke Tuhan Allah. 13 Nema Tuhan Allah kedireꞌ te mreꞌ penekaꞌ abaꞌ penalah ke kitaꞌ ngau kitaꞌ mulah kebala utai te ngasoh ati Ya gaga. 14 Pulah ke kebala utai nang ngau sungot abaꞌ playaꞌ. 15 Ngau cara nyaꞌ mah kitaꞌ breseh abaꞌ niseꞌ pejah upa anak Tuhan Allah te idop besinar datengah kebala urang te mulah te jat abaꞌ idop tesat de dunia toꞌ. Pas kitaꞌ madah ke sidaꞌ brita te mreꞌ idop, kitaꞌ alah besinar de datengah sidaꞌ upa piyanau te mansau dunia toꞌ. 16 Asa kitaꞌ idop piyaꞌ, adai lah alasan ku gaga ke kitaꞌ senta Isa datai ageꞌ. Nyaꞌ bukti enteꞌ te ku usaha ke nyaꞌ nadai pracuma abaꞌ te ku kreja ke nyaꞌ adai asel. 17 Dulau teh jalai ku madah Brita Bayek tentang Isa, kitaꞌ bamat-amat pecayaꞌ ke Ya, abaꞌ ngorban idop kitaꞌ ngau ngelayan Tuhan Allah. Kebaꞌ biyar mah ku mati de bunoh abaꞌ darah ku tesioh ngau kurban pesemah ke Tuhan Allah, ku tetap mah gaga abaꞌ kitaꞌ. 18 Upa piyaꞌ gaꞌ kitaꞌ alah gaga abaꞌ ku.
Timutios abaꞌ Ipaproditos
19 Ku ngagam nadai lamaꞌ ageꞌ Tuhan Isa mukaꞌ jalai isaꞌ ku tauꞌ ngutos Timutios ngusong kitaꞌ. Baroꞌ enteꞌ ya datai ageꞌ, ku ngasa tenang nema ku ninga brita kitaꞌ. 20 Daentara ugaꞌ urang te adai ditoꞌ, proꞌ Timutios mah te sati abaꞌ ku, nema ya bamat-amat mrati kebala utai te dengau kitaꞌ. 21 Kebala urang bukai proꞌ miker uros sidaꞌ kedireꞌ abaꞌ nadai miker apa te penteng ngau Isa Al Maseh. 22 Kitaꞌ kedireꞌ udah medaꞌ enteꞌ Timutios toꞌ amat beguna. Ya udah brunteꞌ bekreja abaꞌ ku nyebar Brita Bayek ari Tuhan Allah upa medaꞌ anak mantoꞌ apai. 23 Tengan toꞌ ku bedau tauꞌ badaꞌ ku daukom ke nadailah. Asa ku nyau tauꞌ badaꞌ lah, nyaꞌ mah ku ngutos Timutios ke kitaꞌ. 24 Abaꞌ ku pecayaꞌ Tuhan Allah nalau ku isaꞌ ku tauꞌ gaꞌ sigat datai ngunyong kitaꞌ.
25 Kitaꞌ udah ngutos menyadeꞌ kita Ipaproditos mantoꞌ ku nguros apa te ku perlu ke ditoꞌ, entoꞌ ku kaꞌ ngasoh ya bebalek ngusong kitaꞌ. Ya udah bekreja abaꞌ brusaha abaꞌ ku nusoi Brita Bayek. 26 Ya gawok amat mah ke kitaꞌ. Ya saban nema kitaꞌ udah ninga brita enteꞌ ya pedeh. 27 Amat mah Ipaproditos udah poh. Uleh Tuhan Allah kaseh ke ya abaꞌ nyemoh ya. Tuhan Allah kaseh gaꞌ ke ku. Ya nyemoh Ipaproditos isaꞌ ati ku nadai empala tusah. 28 Kebaꞌ nyaꞌ ku kaꞌ amat ngasoh ya bebalek ngusong kitaꞌ, isaꞌ kitaꞌ gaga betemu abaꞌ ya ageꞌ. Ngau cara piyaꞌ pemiker ku nyamai. 29 Samot ke ya ngau ati gaga nema ya menyadeꞌ kita te pecayaꞌ ke Tuhan Allah. Hormat ke kebala urang te upa ya, 30 nema ya nyau kaꞌ mati tegal ngelayan Al Maseh. Ya brani mati jalai ya nganti kitaꞌ mantoꞌ ku slamaꞌ ku ageꞌ de penyara toꞌ.