Isa Al Maseh nyaꞌ mah te paleng penteng
3
Kebala menyadeꞌ ku seiman, kitaꞌ alah gaga nema kitaꞌ udah suteꞌ abaꞌ Tuhan. Ku nadai ngasa berat nules ulang apa te udah ku tules ke kitaꞌ nema nyaꞌ bayek ngau kitaꞌ bejaga-jaga. 2 Ati-ati ke kitaꞌ nang ngengaꞌ direꞌ detipu kebala urang te mulah te jat. Sidaꞌ nyaꞌ upa medaꞌ ukoia bagai, sidaꞌ mukong kebala urang te pecayaꞌ ke Isa Al Maseh alah desunat. 3 Uleh kita mah urang te bamat-amat udah desunat. Kita kumpol nyemah Tuhan Allah nema de pimpen Roh Ya. Kita rinang nema kebala utai te udah dapulah Isa Al Maseh ngau kita. Kita nadai bepegai ke utai te dapulah ensia. 4 Tunaꞌ des ku adai mah alasan bepegai ke utai nyaꞌ.Kebaꞌ enteꞌ adai urang bukai te kaꞌ bepegai ke utai te dapulah ensia, ku toꞌ lebeh ageꞌ. 5 Ku desunat pas umor ku lapan ari. Ku sidaꞌ Israel ari suku Benyamen. Ku seli sidaꞌ Ibrani. Ku sidaꞌ Parisi te tliti abaꞌ patoh ke ugaꞌ Prator Tuhan Allah te datules Musa. 6 Ku lampar ransaꞌ nunaꞌ Prator Musa, sampai ku nyuroh urang te pecayaꞌ ke Isa Al Maseh ngasa pemedeh. Datai ke sikoꞌ mah niseꞌ urang te tauꞌ nemu penyalah ku nema ku patoh ke ugaꞌ Printah te datules Musa. 7 Uleh kebala utai te meliyaꞌ te ku angap untong, entoꞌ ku angap ke rugi nema apa te udah Isa Al Maseh pulah ke ku. 8 Nadai proꞌ nyaꞌ, entoꞌ ku nyarok abaꞌ ngangap ugaꞌ nyaꞌ niseꞌ reti nema nglala Isa Al Maseh, Tuhan ku nyaꞌ jaoh lebeh brega. Tegal Ya mah ku nglepas kebala utai abaꞌ ngangap nyaꞌ uras isaꞌ ku daempu Al Maseh 9 abaꞌ bamat-amat suteꞌ abaꞌ Ya. Ku tauꞌ kenaꞌ demua Tuhan Allah tegal ku pecayaꞌ ke Isa Al Maseh nadai tegal patoh ke Prator Musa. Tuhan Allah mah te mulah ku kenaꞌ demua Ya nema ku pecayaꞌ ke Isa Al Maseh. 10 Entoꞌ te ku kedekaꞌ kah proꞌ nglala Isa Al Maseh mah. Ku sigeꞌ kaꞌ ngasa kuasa Tuhan Allah, te dengau Tuhan Allah ngidop Isa Al Maseh ageꞌ ari pemati. Ku kaꞌ ngasa pemedeh te dasa Ya abaꞌ upa Ya rila ngasa pemedeh sampai mati. 11 Ngau cara nyaꞌ mah ku ngagam Tuhan Allah ngidop ku ageꞌ ari pemati.
Brusaha ngerebot hadiah te udah de ageh Isa Al Maseh
12 Ku nadai madah direꞌ udah brasel abaꞌ udah nunaꞌ ugaꞌ apa te dakedekaꞌ Tuhan Allah. Uleh ku brusaha ngerebot hadiah te udah deageh Isa Al Maseh, nema nyaꞌ mah te nyuroh Ya ngerebot ku abaꞌ nyuroh ku jadi empu Ya. 13 Kebala kawan seiman, ku nadai madah direꞌ nyau upa Isa. Uleh toꞌ te kaꞌ kupulah kah: Ku nadai ageꞌ ngingat apa te udah-udah uleh ku brusaha sepenalah ku nguleh apa te adai da mua ku. 14 Kebaꞌ nyaꞌ ku beguai sekuat tenaga datai ke pemadoꞌ, isaꞌ tauꞌ buleh hadiah te udah dedanyi Tuhan Allah. Hadiah nyaꞌ, Tuhan Allah ngumai ku idop alam sruga nema apa te udah Isa Al Maseh pulah ke ku.
15 Kita te nyau tegoh pecayaꞌ ke Al Maseh alah bepiker upa piyaꞌ. Uleh enteꞌ adai daentara kitaꞌ te bida paham, Tuhan Allah kaꞌ mantoꞌ kitaꞌ kati cara miker te kenaꞌ. 16 Uleh toꞌ mah te penteng ditoꞌ: Boh kita idop nunaꞌ prator te udah kita tunaꞌ sampai ke entoꞌ.
Kebala pengajar ke jemat
17 Kebala menyadeꞌ ku seiman, tunaꞌ ke cuntoh idop ku abaꞌ prati kah cuntoh idop urang te udah nunaꞌ idop kami. 18 Ku udah kepaꞌ ngingat ke kitaꞌ. Abaꞌ te ngasoh ku nyabak ngingat toꞌ ageꞌ ke kitaꞌ nema adai mayoh urang te idop jadi munsoh saleb Al Maseh. 19 Kepanyai idop kebala urang te upa piyaꞌ kaꞌ ancor. Sidaꞌ idop proꞌ muas apa te dakedekaꞌ tuboh sidaꞌ. Sidaꞌ gaga mulah kebala utai te tunaꞌ des ngasoh malu. Sidaꞌ proꞌ miker mulah kebala utai te keran dapulah kebala urang de dunia toꞌ. 20 Uleh kita nitauꞌ upa sidaꞌ, nema kita nyau jadi warga sruga. Jemah lah Tuhan Isa Al Maseh kaꞌ datai ageꞌ ari sruga ngau nyelamat kita. Kita ngentang Ya nema kita gawok amat kaꞌ betemu. 21 Tuboh kita te lemah abaꞌ te tauꞌ ancor toꞌ, kaꞌ debaleꞌ Al Maseh upa tuboh Ya te lampar bayek. Ya tauꞌ mulah piyaꞌ ngau kuasa Ya, abaꞌ ngau kuasa toꞌ Ya mrintah ugaꞌ utai.