Pengajar isaꞌ sati sepiker
4
Kebaꞌ nyaꞌ kebala menyadeꞌ ku, upa te udah kupadah ke kitaꞌ, kitaꞌ alah tegoh ke pecayaꞌ ke Tuhan Isa. Ku ma mah kaseh abaꞌ gaok ke kitaꞌ nema kitaꞌ mah mahkuta abaꞌ pengaga ku!2 Menyadeꞌ seiman ku Eyodia abaꞌ Sintike, ku mintaꞌ snikoꞌ sati sepemiker nema snikoꞌ nyau suteꞌ abaꞌ Tuhan. 3 Ku mintaꞌ ke meh gaꞌ Sunsugos kawan ku te setia, bantoꞌ dua ikoꞌ inoꞌ nyaꞌ. Snikoꞌ udah brunteꞌ bekreja abaꞌ ku madah Brita Bayek ke urang banyau. Snikoꞌ ngelayan abaꞌ Klemen abaꞌ ugaꞌ urang te bekreja abaꞌ ku. Nama sidaꞌ udah adai alam Kitab Kehidopan.a
4 Gaga sengabot ke kitaꞌ alam Tuhan! Skaleꞌ ageꞌ ku madah gaga sengabot ke kitaꞌ! 5 Isaꞌ mah urang medaꞌ pemayek ati kitaꞌ nema nadai lamaꞌ ageꞌ Tuhan Isa kaꞌ datai! 6 Nang kitaꞌ saban ke kebala utai, uleh pradua ke ugaꞌ nyaꞌ. Pas kitaꞌ bradua, padah ke te daperlu kitaꞌ ke Tuhan Allah abaꞌ nang klupa besukor. 7 Asa kitaꞌ mulah piyaꞌ, damai ari Tuhan Allah te de luar pemiker ensia, nyaga ati abaꞌ pemiker kitaꞌ te udah suteꞌ abaꞌ Al Maseh.
8 Kebala menyadeꞌ, toꞌ mah utai te pemadoꞌ kaꞌ kupadah ke kitaꞌ. Kitaꞌ alah slareh miker apa te kenaꞌ, te jujor, te adel, te niseꞌ pejah, te ngasoh gaga, abaꞌ nadai ngasoh pedeh ati. Bukai ari nyaꞌ piker kah kebala utai te bayek abaꞌ ugaꞌ te patot depuji urang. 9 Apa te udah kitaꞌ pelajar, trimaꞌ, tinga, abaꞌ pedaꞌ ari ku, pulah ke upa nyaꞌ. Tuhan Allah te nyuroh ati kitaꞌ damai kaꞌ abaꞌ kitaꞌ sengabot.
Trimaꞌ kaseh ngau pemreꞌ jemat
10 Ati ku gaga amat abaꞌ ku muji Tuhan Allah nema nyau klamaꞌ baroꞌ mah kitaꞌ tauꞌ ngirem ageꞌ kebala utai te dengau ku. Ku tauꞌ badaꞌ kitaꞌ slareh kaꞌ mantoꞌ ku uleh niseꞌ jalai ngirem. 11 Ku madah pitoꞌ nadai tegal ku nyau niseꞌ kebala utai, nema ku udah belajar puas ngau apa te adai. 12 Ku gah ngasa kati idop kurang abaꞌ ku sigeꞌ gah gaꞌ ngasa kati idop te belebeh. Ku udah belajar kati cara ngadap ugaꞌ nyaꞌ. Kemaya abaꞌ dini ku adai, ku udah ngasa puas ngau apa te adai, entah ke lapar entah ke kenyang, entah ke kurang entah ke lebeh. 13 Ku talah ngadap ugaꞌ utai nema Isa Al Maseh te mreꞌ penalah ke ku. 14 Uleh amat piyaꞌ ku betrimaꞌ kaseh gaꞌ ke kitaꞌ nema kitaꞌ udah nulongku pas benong ku tusah. 15 Kebala menyadeꞌ ku sidaꞌ Plipi! Pas semaru ku madah Brita Bayek ke kitaꞌ, jalai ku angkat ari Makedunia, proꞌ kitaꞌ mah jemat te mantoꞌ ku ngau duwet. 16 Abaꞌ pas ku de Tesalonika gaꞌ, kitaꞌ dua tiga kaleꞌ ngirem kebala utai te dengau ku. 17 Ku madah pitoꞌ nadai tegal ku ngagam buleh duwet ari kitaꞌ ageꞌ. Te ku kedekaꞌ isaꞌ Tuhan Allah malas pemayek kitaꞌ ngau berkat te lebeh besai ageꞌ. 18 Ku udah nrimaꞌ kebala utai te dabreꞌ kitaꞌ ke ku abaꞌ nyaꞌ lebeh ari cukop, nema Ipaproditos udah ngemaiꞌ ugaꞌ pemreꞌ kitaꞌ ke ku. Kitaꞌ udah mreꞌ pesemah te bau nyamai ke Tuhan Allah abaꞌ Ya gaga nrimaꞌ utai nyaꞌ. 19 Tuhan Allah te ku layan ke nyaꞌ kaꞌ menoh ugaꞌ te daperlu kitaꞌ nunaꞌ pengaya Ya te luar biasa nema kitaꞌ suteꞌ abaꞌ Isa Al Maseh. 20 Puji Tuhan Allah Apai kita ari entoꞌ datai ke jemah! Amen.
Tabeꞌ
21 Ku kirem tabeꞌ ke ugaꞌ sidaꞌ te pecayaꞌ ke Tuhan Allah. Kebala menyadeꞌ seiman te abaꞌ ku ditoꞌ kirem tabeꞌ gaꞌ ke ugaꞌ kitaꞌ. 22 Abaꞌ ugaꞌ kebala menyadeꞌ kita te diyau de kuta toꞌ, kebala sidaꞌ te betugas de istana Kaisar Ruma, sidaꞌ sigeꞌ kirem tabeꞌ ke ugaꞌ kitaꞌ.
23 Ku bradua isaꞌ Tuhan Isa Al Maseh mreꞌ berkat ke kitaꞌ.