Bradua abaꞌ bekreja
3
Entoꞌ kebala menyadeꞌ kami mintaꞌ kitaꞌ bradua ke kami isaꞌ pesau ari Tuhan Isa deras tesebar, abaꞌ datrimaꞌ bayek upa te udah tejadi ke kitaꞌ dulau. 2 Bradua gaꞌ isaꞌ Tuhan Allah nyaga kami isaꞌ kami nadai ngasa pemedeh ari kebala urang te ma jat. Nema nadai ugaꞌ urang pecayaꞌ ke Brita Bayek nyaꞌ. 3 Uleh Tuhan Isa slareh setia, kebaꞌ Ya kaꞌ nguat ati abaꞌ nyaga kitaꞌ ari te jat. 4 Abaꞌ kami yaken Tuhan Isa nulong kitaꞌ, isaꞌ apa te udah kami padah ke kitaꞌ udah kitaꞌ pulah, abaꞌ kaꞌ kitaꞌ pulah ke ageꞌ. 5 Kami bradua isaꞌ Tuhan Isa nulong kitaꞌ isaꞌ kitaꞌ tauꞌ badaꞌ enteꞌ Tuhan Allah kaseh ke kitaꞌ, abaꞌ isaꞌ kitaꞌ tan ngadap pemedeh upa Al Maseh.6 Kebala menyadeꞌ, kami mintaꞌ ke kitaꞌ ngau kuasa Tuhan kita Isa Al Maseh isaꞌ kitaꞌ ngejaoh direꞌ ari kebala menyadeꞌ seiman kita te ngai kreja abaꞌ ngai nunaꞌ pengajar te kami padah ke kitaꞌ. 7 Kitaꞌ kedireꞌ udah tauꞌ badaꞌ kitaꞌ alah nunaꞌ cuntoh idop kami, kami nadai kalaꞌ luntos kreja jalai kami ageꞌ abaꞌ kitaꞌ. 8 Kami nadai kalaꞌ makai utai te nadai kami bayar, uleh betawas malam bepanteng kreja isaꞌ kami nadai medeh kitaꞌ. 9 Kami mulah piyaꞌ ukai tegal kami niseꞌ hak nrimaꞌ pemreꞌ kitaꞌ, kami mulah piyaꞌ nema kami kaꞌ ngau cuntoh ke kitaꞌ. 10 Pas kami ageꞌ abaꞌ kitaꞌ, kami mreꞌ prator upa pitoꞌ, “Urang te ngai kreja, nang makai.” 11 Kami nules ugaꞌ toꞌ nema kami ninga enteꞌ adai kebala urang daentara kitaꞌ te luntos kreja, sidaꞌ bayah sibok ngaru urang. 12 Urang te upa piyaꞌ kami kingat abaꞌ kami ansak ngau kuasa Tuhan Isa Al Maseh isaꞌ sidaꞌ ruros kreja ngau idop sidaꞌ kedireꞌ. 13 Uleh kitaꞌ nang lejoꞌ mulah te bayek. 14 Asa adai urang te nadai kaꞌ nunaꞌ apa te kami padah alam surat toꞌ, kelaiꞌ ke sidaꞌ abaꞌ nang kitaꞌ bekawan abaꞌ sidaꞌ, isaꞌ sidaꞌ malu. 15 Uleh nang ngangap sidaꞌ munsoh, rara ke sidaꞌ upa medaꞌ kitaꞌ ngerara menyadeꞌ direꞌ.
Pesau te pemadoꞌ
16 Entoꞌ kami bradua isaꞌ Tuhan Isa pon damai slareh mreꞌ damai Ya ke kitaꞌ alam ugaꞌ utai abaꞌ slareh abaꞌ kitaꞌ sengabot. 17 Tabeꞌ ari ku, Paulos. Tabeꞌ toꞌ ku tules ngau jari ku kedireꞌ. Toꞌ mah kelai ugaꞌ surat te datules ku. Upa pitoꞌ mah tules ku. 18 Ku bradua isaꞌ Isa Al Maseh Tuhan kita nganyaꞌ pemayek ati Ya ke ugaꞌ kitaꞌ.