Kebala krunia te debereꞌ Roh Kudos
14
Kitaꞌ alah bamat-amat berusaha ngaseh urang bukai. Abaꞌ kitaꞌ alah bamat-amat ingen ke krunia te debereꞌ Roh Kudos ke kitaꞌ. Krunia te nitauꞌ naꞌ nitauꞌ nadai alah kitaꞌ ingen ke nyaꞌ, krunia madah pesau Tuhan Allah. 2 Urang te becakap ngau baasa Roh nadai becakap ke ensia, uleh becakap ke Tuhan Allah. Niseꞌ urang te nyarok baasa ya, nema Roh Kudos nyuroh ya ngucap kebala utai te peroꞌ deketauꞌ Tuhan Allah. 3 Uleh urang te madah pesau Tuhan Allah becakap ke ensia. Pesau nyaꞌ nguat iman sidaꞌ, ngeransak sidaꞌ, abaꞌ merinang sidaꞌ. 4 Sapa te becakap ngau baasa Roh, nguat iman direꞌ, uleh urang te madah pesau Tuhan Allah nguat iman jemat.5 Ku gaga enteꞌ kitaꞌ tauꞌ ugaꞌ becakap ngau baasa Roh, uleh te lebeh bayek ageꞌ enteꞌ kitaꞌ tauꞌ madah pesau Tuhan Allah. Urang te madah pesau Tuhan Allah lebeh beguna ari urang te becakap ngau baasa Roh. Uleh enteꞌ urang te ngau baasa Roh nyaꞌ tauꞌ nyelas reti te sidaꞌ cakap, nyaꞌ sama mah beguna abaꞌ urang te madah pesau Tuhan Allah, nema ngau cara nyaꞌ jemat tauꞌ dekuat ari pesau te depadah sidaꞌ.
6 Kebala menyadeꞌ, misal teh ku datai ngusong kitaꞌ abaꞌ ku becakap ngau baasa Roh, apa guna nyaꞌ ngau kitaꞌ? Sama sekaleꞌ niseꞌ! Lebeh beguna enteꞌ ku datai ngusong kitaꞌ, ku madah pesau Tuhan Allah ke kitaꞌ, ku ngajar kitaꞌ, ku nyelas pemenauꞌ ke kitaꞌ, abaꞌ ku madah ke kitaꞌ apa te depadah Tuhan Allah ke ku. 7 Nyaꞌ sama mah abaꞌ alat musek suleng abaꞌ kecapi. Amat mah alat musek nyaꞌ ukai utai te idop upa ensia, uleh enteꞌ kitaꞌ nebah alat musek nyaꞌ kedaꞌ ari, urang nitauꞌ badaꞌ musek te kitaꞌ tebah nyaꞌ lagu apa. 8 Cuntoh te kebukai, enteꞌ trumpet te ngau ngumai urang perang detebah kedaꞌ ari, niseꞌ te kaꞌ siap angkat perang.
9 Upa piyaꞌ gaꞌ kitaꞌ te becakap ngau baasa Roh. Enteꞌ kitaꞌ nadai nguna baasa te jelas niseꞌ urang te nyarok apa te kitaꞌ padah. Te decakap kitaꞌ nyaꞌ peracuma mah sama sekaleꞌ niseꞌ reti. 10 De dunia toꞌ lampar mayoh baasa, abaꞌ niseꞌ te niseꞌ reti. 11 Uleh enteꞌ urang becakap ke ku abaꞌ ku nadai nyarok ke cakap ya, ku ngangap ya urang jaoh, abaꞌ ya sigeꞌ ngangap ku urang jaoh gaꞌ. 12 Upa piyaꞌ gaꞌ kitaꞌ. Nema kitaꞌ ma ingen ke krunia ari Roh Kudos, lebeh bayek kitaꞌ berusaha mintaꞌ krunia te ngau mantoꞌ jemat isaꞌ tamah kuat.
13 Kebaꞌ nyaꞌ, sapa jaꞌ te becakap ngau baasa Roh, ya alah bradua isaꞌ ya tauꞌ nyelas apa reti te decakap ya nyaꞌ. 14 Nema enteꞌ ku bradua ngau baasa Roh, roh ku te bradua, uleh pemiker ku nadai abaꞌ bradua. 15 Jadi apa te alah ku pulah? Ku kaꞌ bradua ngau roh ku, uleh ku kaꞌ gaꞌ bradua ngau pemiker ku. Ku kaꞌ menanyi muji Tuhan Allah ngau roh ku, uleh ku kaꞌ gaꞌ menanyi muji Tuhan Allah ngau pemiker ku. 16 Nema enteꞌ kitaꞌ besukor ke Tuhan Allah ngau roh kitaꞌ jaꞌ, urang bukai nadai nyarok, abaꞌ sidaꞌ nitauꞌ madah, “Amen” ke apa te desukor kitaꞌ nyaꞌ. Nema ya nadai nyarok ke apa te kitaꞌ padah. 17 Biyar mah kitaꞌ besukor ke Tuhan Allah ngau cara te bayek, uleh te kitaꞌ pulah nyaꞌ nadai mantoꞌ iman urang te ninga kitaꞌ nyaꞌ betamah kuat.
18 Ku besukor ke Tuhan Allah, ku tauꞌ becakap ngau baasa Roh lebeh ari ugaꞌ kitaꞌ. 19 Uleh enteꞌ pas ku begugoꞌ abaꞌ jemat, ku lebeh gaga ngucap limaꞌ kata te sidaꞌ nyarok ngau ku ngajar sidaꞌ, ari pada ku ngucap beribu kata ngau baasa Roh.
20 Kebala menyadeꞌ, nang kitaꞌ bepiker upa miyak, uleh pemiker kitaꞌ alah upa urang tuai! Enteꞌ abaꞌ utai te jat kitaꞌ alah upa miyak, te bedau nyarok utai te jat.
21 Alam Kitab Suci Tuhan madah pitoꞌ,
“Ku kaꞌ nguna kebala urang te becakap ngau baasa te kebukai,
Ku kaꞌ becakap ke bansa Ku toꞌ ngau mulot urang jaoh,
uleh amat piyaꞌ, sidaꞌ matang ngai mah ninga Ku.”a
22 Kebaꞌ nyaꞌ, krunia baasa Roh toꞌ tana ngau urang te nadai pecayaꞌ, ukai ngau urang te pecayaꞌ. Uleh krunia madah pesau Tuhan Allah nyaꞌ tana ngau urang te pecayaꞌ ukai tana ngau urang te nadai pecayaꞌ.
23 Misal teh enteꞌ kitaꞌ anggota jemat begugoꞌ abaꞌ ugaꞌ kitaꞌ becakap ngau baasa Roh, baroꞌ tamaꞌ dua tiga ikoꞌ urang te ari luar jemat abaꞌ urang te bedau pecayaꞌ, pesti sidaꞌ madah kitaꞌ nyau gila. 24 Uleh enteꞌ ugaꞌ kitaꞌ madah pesau Tuhan Allah, baroꞌ tamaꞌ dua tiga ikoꞌ urang te ari luar jemat abaꞌ urang te bedau pecayaꞌ, kebala utai te depadah kitaꞌ kaꞌ nunyok kebala dusa urang nyaꞌ abaꞌ nyaꞌ nyuroh sidaꞌ sadar ke kebala dusa sidaꞌ. 25 Kebala utai te detapok sidaꞌ alam ati kaꞌ deanyaꞌ. Abaꞌ sidaꞌ kaꞌ nyungkon nyemah Tuhan Allah abaꞌ madah, “Amat mah Tuhan Allah abaꞌ kitaꞌ.”
Prator alam jemat
26 Kebala menyadeꞌ ku seiman, enteꞌ piyaꞌ apa te alah kitaꞌ pulah? Enteꞌ kitaꞌ kumpol nyemah Tuhan, adai te menanyi, adai te ngajar, adai te madah pesau Tuhan Allah, adai te becakap ngau baasa Roh, abaꞌ adai gaꞌ te nyelas apa reti te depadah ngau baasa Roh. Uleh ugaꞌ nyaꞌ depulah isaꞌ iman urang betamah kuat. 27 Enteꞌ adai urang te becakap ngau baasa Roh, dua ikoꞌ jaꞌ, paleng mayoh tiga ikoꞌ. Sidaꞌ alah beganteꞌ abaꞌ alah adai te tukang nyelas apa te depadah sidaꞌ. 28 Enteꞌ niseꞌ urang te tauꞌ nyelas, urang te tauꞌ baasa Roh alah sunyeꞌ, nang ngau baasa Roh alam jemat. Sidaꞌ peroꞌ tauꞌ becakap ngau baasa Roh ke Tuhan Allah alam ati sidaꞌ.
29 Upa piyaꞌ gaꞌ kebala urang te adai krunia madah pesau Tuhan Allah. Lebeh bayek dua, paleng mayoh tiga mah te madah pesau Tuhan Allah, abaꞌ te kebukai alah nilai apa te sidaꞌ padah ke nyaꞌ. 30 Uleh enteꞌ urang bukai te dudok diyaꞌ nadai mang-mang nerimaꞌ pesau ari Tuhan Allah, te semaru becakap alah sunyeꞌ isaꞌ ya tauꞌ becakap. 31 Ugaꞌ kitaꞌ tauꞌ madah pesau Tuhan Allah, uleh kitaꞌ alah beganteꞌ isaꞌ ugaꞌ urang tauꞌ belajar abaꞌ dekuat. 32 Ngenap urang te debereꞌ Tuhan krunia madah pesau Tuhan Allah, talah nyangkaꞌ cakap direꞌ. 33 Nema Tuhan Allah ngai medaꞌ utai te kacau, uleh Ya kaꞌ medaꞌ utai te tenang.
Upa prator te jama depulah de jemat Tuhan Allah, 34 urang inoꞌ alah sunyeꞌ enteꞌ sidaꞌ abaꞌ kumpol nema sidaꞌ nadai desadi becakap. Sidaꞌ alah tunok ke laki sidaꞌ upa te depadah alam Prator Musa. 35 Enteꞌ sidaꞌ kaꞌ tauꞌ badaꞌ utai, sidaꞌ alah nanyaꞌ nyaꞌ ke laki sidaꞌ de rumah nema nadai bayek urang inoꞌ becakap tengan kumpol.
36 Ngapa piyaꞌ kitaꞌ ngai ninga ku? Kitaꞌ miker pesau Tuhan Allah datai ari kitaꞌ? Ku madah ke kitaꞌ, nadai peroꞌ kitaꞌ te buleh pesau nyaꞌ. 37 Enteꞌ adai urang te ngasa direꞌ adai krunia, bayek krunia madah pesau Tuhan Allah, bayek krunia te kebukai ari Roh Kudos, urang nyaꞌ alah sadar enteꞌ apa te ku tules ke kitaꞌ nyaꞌ printah Tuhan. 38 Uleh enteꞌ urang nadai iboh ke utai toꞌ, nang kitaꞌ iboh ya.