Kaseh
13
Biyar mah ku tauꞌ becakap ugaꞌ baasa ensia abaꞌ baasa mlikat, uleh enteꞌ ku niseꞌ kaseh, peracuma mah. Ku sama abaꞌ tawak abaꞌ lunceng te begoꞌ gena. 2 Biyar mah ku adai krunia tauꞌ madah pesau Tuhan Allah, tauꞌ badaꞌ ugaꞌ utai te detapok, tauꞌ badaꞌ ugaꞌ pemenauꞌ, abaꞌ empu iman te ma besai ngau minah buket, uleh enteꞌ ku niseꞌ kaseh, ku sama sekaleꞌ nadai beguna. 3 Abaꞌ biyar mah ku magi ugaꞌ utai te adai de ku ke urang misken abaꞌ nyerah direꞌ detunu, uleh enteꞌ ku niseꞌ kaseh ugaꞌ nyaꞌ niseꞌ guna.4 Kaseh nyaꞌ sabar, bayek ati, nadai ngemuru, nadai ngepah-ngemah direꞌ, abaꞌ nadai sumong. 5 Ya nadai mulah utai te nadai senunoh, nadai ngigaꞌ utai te nguntong direꞌ, nadai mudah ranseng abaꞌ nadai ngingat penyalah urang bukai. 6 Ya nadai gaga medaꞌ urang mulah utai te nadai adel, uleh ya gaga medaꞌ urang mulah utai te kenaꞌ. 7 Ya talah ngadap ugaꞌ utai, pecayaꞌ ugaꞌ utai, ngagam ugaꞌ utai, abaꞌ sabar nangong ugaꞌ utai.
8 Kaseh niseꞌ pemadoꞌ. Ugaꞌ krunia adai pemadoꞌ, bayek krunia madah pesau Tuhan Allah, bayek krunia becakap ngau baasa Roh, abaꞌ krunia pemenauꞌ nyaꞌ niseꞌ ageꞌ lah. 9 Nema pemenauꞌ kita abaꞌ penalah kita te ngau madah pesau Tuhan Allah nyaꞌ adai jangkaꞌ. 10 Uleh jemah lah senta Tuhan datai ageꞌ, Ya kaꞌ mulah ugaꞌ utai niseꞌ pejah, tengan nyaꞌ ugaꞌ utai te adai jangkaꞌ toꞌ nadai perlu ageꞌ.
11 Jalai ku ageꞌ biyak, ku becakap upa miyak, ku ngasa upa miyak, abaꞌ ku bepiker upa miyak. Entoꞌ ku nyau tuai, gaya idop ku te upa miyak nyaꞌ udah ku buai. 12 Nema entoꞌ kita medaꞌ alam cremen suteꞌ gamar te kabor, uleh jemah lah kita kaꞌ betemu mua. Entoꞌ ku bedau naꞌ gulong tauꞌ badaꞌ ugaꞌ utai, uleh jemah lah ku bamat-amat ngelala Ya, upa medaꞌ Ya ngelala ku.
13 Entoꞌ tiga uteꞌ toꞌ te penteng te alah selareh kita pulah: Kita alah pecayaꞌ ke Tuhan Allah, ngagam kebala utai te udah dedanyi Ya, abaꞌ kaseh ke Tuhan Allah abaꞌ pangan bukai. Uleh te paleng penteng toꞌ, kaseh ke Tuhan Allah abaꞌ pangan bukai.