Kebala krunia te debereꞌ Roh Kudos
12
Kebala menyadeꞌ, entoꞌ ku kaꞌ kitaꞌ tauꞌ badaꞌ krunia kusos te debereꞌ Roh Kudos. 2 Ingat nadai kita, meliyaꞌ teh jalai kitaꞌ bedau pecayaꞌ ke Isa Al Maseh, kitaꞌ ngengaꞌ direꞌ detipu abaꞌ depengaroh nyemah kebala berhala te bisoꞌ. 3 Kebaꞌ nyaꞌ ku madah ke kitaꞌ enteꞌ urang depimpen Roh Kudos, urang nyaꞌ nadai patot nyumpah Isa. Abaꞌ enteꞌ ya nadai depimpen Roh Kudos, urang nyaꞌ nadai ngamoꞌ madah, “Isa nyaꞌ Tuhan.”4 Adai brena macam krunia, uleh ugaꞌ nyaꞌ debereꞌ ari suteꞌ Roh. 5 Abaꞌ adai brena macam cara ngelayan Tuhan, uleh Tuhan te kita layan nyaꞌ sikoꞌ mah. 6 Adai brena macam cara kreja ke Tuhan, uleh peroꞌ Tuhan te sikoꞌ nyaꞌ mah te mereꞌ penalah ke ugaꞌ urang.
7 Krunia Roh Kudos debereꞌ ke ngenap urang ngau mantoꞌ ugaꞌ jemat. 8 Adai urang te debereꞌ Roh Kudos krunia anal becakap, abaꞌ adai gaꞌ te debereꞌ Roh Kudos krunia anal ngajar urang. 9 Roh te sama mereꞌ urang krunia ngau pecayaꞌ ke Isa sengabot, abaꞌ Roh nyaꞌ gaꞌ te mereꞌ urang bukai krunia tauꞌ nyemoh urang te pedeh. 10 Adai urang te debereꞌ Roh Kudos krunia mulah utai te nyaroh, abaꞌ adai te debereꞌ Ya krunia madah pesau Tuhan Allah. Adai urang te debereꞌ Roh Kudos krunia ngetauꞌ roh nyaꞌ ari Roh Kudos sekaleꞌ ke roh jat, abaꞌ adai gaꞌ te debereꞌ Ya krunia tauꞌ becakap ngau baasa Roh abaꞌ krunia tauꞌ nyelas reti baasa Roh nyaꞌ. 11 Ugaꞌ toꞌ peroꞌ dekreja uleh suteꞌ Roh te mereꞌ krunia ke ngenap urang nunaꞌ te dekedekaꞌ Roh nyaꞌ.
Mayoh anggota uleh suteꞌ tuboh
12 Tuboh ensia toꞌ suteꞌ uleh mayoh anggota. Amat anggota tuboh toꞌ mayoh uleh peroꞌ suteꞌ mah tuboh. Upa piyaꞌ gaꞌ Al Maseh peroꞌ suteꞌ tuboh, uleh anggota ya mayoh. 13 Ugaꞌ kita udah depaneꞌ alam Roh te sama. Bayek kita sidaꞌ Yahudi bayek te bukai sidaꞌ Yahudi, bayek ulon bayek te bukai ulon, ugaꞌ kita udah depaneꞌ isaꞌ jadi suteꞌ tuboh, abaꞌ ugaꞌ kita debereꞌ nginom Roh te sama.
14 Nema tuboh toꞌ nadai peroꞌ suteꞌ anggota, uleh mayoh anggota. 15 Misal teh kaki tauꞌ becakap ya madah pitoꞌ, “Nema ku ukai jari, ku nadai temasok tuboh.” Amat piyaꞌ, kaki tetap mah anggota tuboh. 16 Abaꞌ misal teh peneng tauꞌ becakap ya madah pitoꞌ, “Nema ku ukai mata, ku nadai temasok anggota tuboh.” Amat piyaꞌ, peneng tetap mah anggota tuboh. 17 Nema enteꞌ misal ugaꞌ tuboh toꞌ mata, kati tuboh tauꞌ ninga? Abaꞌ enteꞌ misal ugaꞌ tuboh toꞌ peneng, kati tuboh tauꞌ nyiom? 18 Uleh Tuhan Allah udah nepoꞌ ngenap anggota de teban te bebida de tuboh. Ya nepoꞌ ngenap anggota tuboh nunaꞌ penekaꞌ Ya. 19 Enteꞌ ugaꞌ nyaꞌ peroꞌ suteꞌ anggota, dini tuboh? 20 Te pengamat adai mayoh anggota, uleh peroꞌ suteꞌ tuboh.
21 Kebaꞌ nyaꞌ, misal mata tauꞌ becakap, mata nitauꞌ madah ke jari, “Ku nadai perlu direꞌ!” Upa piyaꞌ gaꞌ misal palaꞌ tauꞌ becakap, palaꞌ nitauꞌ madah ke kaki, “Ku nadai perlu direꞌ!” 22 Ku madah ke kitaꞌ, empala kebala anggota tuboh te kita angap lemah, empala nyaꞌ mah te paleng kita perlu. 23 Abaꞌ kebala anggota tuboh te kita angap nadai gulong penteng, empala nyaꞌ mah te lebeh mayoh kita perati. Abaꞌ anggota tuboh te ngai kita anyaꞌ, nyaꞌ mah te alah kita perati ke bamat-amat. 24 Kebala anggota tuboh te kaꞌ kita anyaꞌ, nadai alah gulong deprati. Uleh Tuhan Allah udah nuson tuboh kita lampar bayek isaꞌ anggota tuboh kita te deangap nadai gulong penteng dehormat kusos. 25 Tuhan Allah mulah piyaꞌ isaꞌ tuboh kita nadai tebagi-bagi. Tuhan Allah kaꞌ isaꞌ ngenap anggota tuboh toꞌ merati anggota tuboh te bukai. 26 Enteꞌ suteꞌ anggota tuboh pedeh, ugaꞌ anggota tuboh pedeh ugaꞌ. Enteꞌ suteꞌ anggota tuboh depuji, ugaꞌ anggota tuboh te kebukai abaꞌ gaga.
27 Ugaꞌ kitaꞌ nyaꞌ tuboh Al Maseh, abaꞌ ngenap kitaꞌ anggota ari tuboh nyaꞌ. 28 Abaꞌ Tuhan Allah udah ngatoh kebala urang te pecayaꞌ alam jemat: Te semaru kebala rasol, te kedua kebala nabi, te ketiga kebala guru. Baroꞌ kebala urang te debereꞌ krunia mulah utai te nyaroh, nyemoh urang, nulong urang, mimpen urang abaꞌ urang te debereꞌ krunia tauꞌ becakap ngau baasa Roh. 29 Nadai ugaꞌ kita toꞌ rasol. Nadai ugaꞌ kita toꞌ nabi. Nadai ugaꞌ kitaꞌ toꞌ guru. Abaꞌ nadai ugaꞌ kita tauꞌ mulah utai te nyaroh. 30 Nadai ugaꞌ urang debereꞌ krunia tauꞌ nyemoh urang. Nadai ugaꞌ urang debereꞌ krunia tauꞌ becakap ngau baasa Roh. Abaꞌ nadai ugaꞌ urang debereꞌ krunia tauꞌ nyelas reti baasa Roh nyaꞌ. 31 Kebaꞌ nyaꞌ kitaꞌ alah bamat-amat berusaha ingen ke krunia te paleng beguna.
Abaꞌ entoꞌ ku kaꞌ nganyaꞌ ke kitaꞌ jalai te paleng bayek.