11
Kebaꞌ nyaꞌ, tunaꞌ ke cuntoh idop ku, upa ku nunaꞌ cuntoh idop Al Maseh.Prator ngau tungkau palaꞌ pas kumpol
2 Ku muji kitaꞌ nema kitaꞌ selareh ingat ke ku abaꞌ nunaꞌ pengajar te ku ajar ke kitaꞌ. 3 Uleh ku kaꞌ kitaꞌ tauꞌ badaꞌ utai toꞌ: Kepalaꞌ urang laki toꞌ Al Maseh, kepalaꞌ urang inoꞌ toꞌ urang laki, abaꞌ kepalaꞌ Al Maseh toꞌ Tuhan Allah.
4 Enteꞌ urang laki bradua abaꞌ madah pesau Tuhan Allah betungkau palaꞌ, urang nyaꞌ ngemalu Al Maseh kepalaꞌ ya. 5 Uleh enteꞌ urang inoꞌ bradua abaꞌ madah pesau Tuhan Allah nadai betungkau palaꞌ, ya ngemalu laki direꞌ te jadi kepalaꞌ ya, nema ya sama mah abaꞌ urang inoꞌ te udah degunol ke palaꞌ. 6 Enteꞌ urang inoꞌ ngai betungkau, lebeh bayek ya ngunol palaꞌ direꞌ. Uleh enteꞌ ngunteng bok abaꞌ ngunol palaꞌ direꞌ nyaꞌ sama mah abaꞌ ya ngemalu direꞌ, lebeh bayek ya betungkau.
7 Uleh urang laki enteꞌ bradua abaꞌ madah pesau Tuhan Allah, nadai alah betungkau. Nema urang laki depulah Tuhan Allah upa sipat Ya, isaꞌ urang muji abaꞌ hormat ke Tuhan Allah tegal urang laki nyaꞌ. Uleh urang inoꞌ alah betungkau, isaꞌ urang muji abaꞌ hormat ke laki ya.a 8 Nema meliyaꞌ teh pas Tuhan Allah mulah ensia, Ya nadai mulah urang laki ari urang inoꞌ, uleh urang inoꞌ te depulah ari urang laki. 9 Abaꞌ urang laki toꞌ nadai depulah ngau urang inoꞌ, uleh urang inoꞌ te depulah ngau urang laki.b 10 Kebaꞌ nyaꞌ urang inoꞌ alah betungkau ngau tana enteꞌ ya bekuasa bradua abaꞌ madah pesau Tuhan Allah. Abaꞌ utai nyaꞌ alah sidaꞌ pulah nema adai mlikat te medaꞌ sidaꞌ.
11 Uleh kita te nyau pecayaꞌ ke Tuhan tauꞌ badaꞌ enteꞌ urang inoꞌ toꞌ perlu urang laki, piyaꞌ gaꞌ urang laki perlu urang inoꞌ. 12 Nema sama upa medaꞌ urang inoꞌ depulah ari urang laki, upa piyaꞌ gaꞌ urang laki deadai ari urang inoꞌ. Uleh ugaꞌ utai ari Tuhan Allah.
13 Cuba kitaꞌ piker bamat-amat utai toꞌ: Patot nadai urang inoꞌ bradua ke Tuhan Allah de mua jemat nadai betungkau? 14 Kitaꞌ pesti udah tauꞌ badaꞌ, urang laki te bok panyai nadai patot dehormat. 15 Uleh enteꞌ urang inoꞌ bok panyai nyaꞌ bayek abaꞌ patot dehormat, nema Tuhan Allah mereꞌ bok ke urang inoꞌ ngau nutop palaꞌ sidaꞌ.
16 Uleh enteꞌ adai urang te tengek kaꞌ maleꞌ utai nyaꞌ, kitaꞌ alah tauꞌ badaꞌ kami abaꞌ ugaꞌ jemat Tuhan Allah mulah piyaꞌ gaꞌ, nadai mulah utai te bukai.
Prator alam Perjamuan Tuhan
17 Alam prator te toꞌ ku nadai muji kitaꞌ. Kitaꞌ begugoꞌ uleh peracuma mah, nema te tejadi kitaꞌ nadai betamah bayek uleh kitaꞌ empala betamah jat. 18 Nema semaru ku ninga, asa kitaꞌ begugoꞌ, kitaꞌ pecah-belah jadi dua tiga kelumpok, abaꞌ menurot ku te depadah urang ke ku nyaꞌ adai gaꞌ amat. 19 Amat mah de entara kitaꞌ alah adai te pecah-belah! Ngapa? Isaꞌ pedaꞌ lah sapa urang te bamat-amat setia pecayaꞌ ke Tuhan.
20 Enteꞌ kitaꞌ begugoꞌ, kitaꞌ nadai mulah apa te patot de Perjamuan Tuhanc ngau ngingat pemati Tuhan Isa. 21 Nema jalai kitaꞌ makai, kitaꞌ ngameꞌ pemakai nadai bejangkaꞌ sampai adai te lapar nadai ampet, abaꞌ adai te nginom nadai bejangkaꞌ sampai mabok. 22 Ngapa bah kitaꞌ piyaꞌ? Kati kitaꞌ nadai makai abaꞌ nginom de rumah direꞌ? Kitaꞌ kaꞌ menadai jemat Tuhan Allah abaꞌ ngemalu urang misken? Apa te alah ku padah ke kitaꞌ? Muji kitaꞌ? Alam hal toꞌ ku sama sekaleꞌ nadai kaꞌ muji kitaꞌ.
23 Toꞌ pengajar te ku trimaꞌ ari Tuhan abaꞌ entoꞌ ku padah ke kitaꞌ: Pas malam jalai Tuhan Isa deserah, Ya ngameꞌ ruti 24 abaꞌ ngucap sukor. Udah nyaꞌ Ya mungaꞌ ruti nyaꞌ abaꞌ madah, “Toꞌ mah tuboh Ku te deserah ngau kitaꞌ. Pulah ke toꞌ ngau ngingat Ku.” 25 Upa piyaꞌ gaꞌ udah makai, Ya ngameꞌ cawan te biseꞌ aiꞌ angor, abaꞌ madah, “Cawan toꞌ danyi baru Tuhan Allah abaꞌ ensia te dekelaiꞌ ngau darah Ku. Pulah ke toꞌ, ngenap kaleꞌ kitaꞌ nginom toꞌ ngau ngingat Ku.”d 26 Nema ngenap kaleꞌ kitaꞌ makai ruti toꞌ abaꞌ nginom cawan toꞌ kitaꞌ nusoi pemati Tuhan sampai ke Ya datai ageꞌ.
27 Kebaꞌ nyaꞌ sapa jaꞌ te makai ruti abaꞌ nginom angor alam Perjamuan Tuhan ngau cara te nadai patot, urang nyaꞌ dusa ke Tuhan te udah nyerah tuboh abaꞌ darah Ya. 28 Kebaꞌ nyaꞌ ngenap urang alah mresa direꞌ dulau abaꞌ udah nyaꞌ baroꞌ ya makai ruti abaꞌ nginom ari cawan nyaꞌ. 29 Nema sapa jaꞌ te makai abaꞌ nginom uleh nadai ngakoꞌ tuboh Tuhan, urang nyaꞌ nyuroh ukom Tuhan Allah datai ke ya. 30 Nyaꞌ nyuroh mayoh de entara kitaꞌ te lemah, pedeh, abaꞌ adai gaꞌ te mati. 31 Enteꞌ kita mresa direꞌ, ukom nyaꞌ nadai ngenaꞌ kita. 32 Uleh enteꞌ kita nerimaꞌ ukom ari Tuhan Allah, kita deajar, isaꞌ kita nadai de ukom abaꞌ dunia toꞌ.
33 Kebaꞌ nyaꞌ kebala menyadeꞌ ku, enteꞌ kitaꞌ begugoꞌ makai, tungoꞌ ke pangan bukai. 34 Enteꞌ adai te lapar, lebeh bayek makai dulau de rumah direꞌ sebedau begugoꞌ. Enteꞌ kitaꞌ mulah utai te patot jalai kitaꞌ begugoꞌ, kitaꞌ nadai deukom Tuhan Allah. Kebala utai te kebukai nungoꞌ ku datai lah ku madah ke kitaꞌ.