Pengajar isaꞌ nadai nyemah berhala
10
Ku kaꞌ ngingat kitaꞌ kebala menyadeꞌ, apa te udah tejadi ke puyang jagang kita meliyaꞌ jalai Musa ngemaiꞌ sidaꞌ angkat ari Meser. Pas tengan nyaꞌ sidaꞌ delinong tiang awan, abaꞌ ugaꞌ sidaꞌ selamat, jalai sidaꞌ nyemerang Laot Mirah.a 2 Isaꞌ sidaꞌ tauꞌ jadi muret Musa, ugaꞌ sidaꞌ upa depaneꞌ alam awan abaꞌ laot. 3 Ugaꞌ sidaꞌ makai pemakai te sama ari Tuhan Allah,b 4 abaꞌ nginom aiꞌ te sama ari Tuhan Allah. Sidaꞌ nginom ari batu besai ari Tuhan Allah te nerudi sidaꞌ, abaꞌ batu besai nyaꞌ, nyaꞌ mah Al Maseh.c 5 Uleh amat piyaꞌ mayoh sidaꞌ te nadai degaga Tuhan Allah, kebaꞌ sidaꞌ dengaꞌ mati abaꞌ bangkai sidaꞌ betegaler de tanah luah te beengkrangan.d6 Ugaꞌ nyaꞌ ngau cuntoh, ngau ngingat kita, isaꞌ kita nadai cerat ke utai te jat upa te udah depulah puyang jagang kita,e 7 abaꞌ isaꞌ kita nadai nyemah kebala berhala upa te depulah sidaꞌ kedaꞌ. Alam Kitab Suci depadah, “Bansa toꞌ dudok makai nginom baroꞌ sidaꞌ bejuget nyemah berhala.”f 8 Nang kita baraꞌ upa te depulah sidaꞌ kedaꞌ, nema tegal apa te sidaꞌ pulah kah, alam sari dua puloh tiga ribu sidaꞌ mati.g 9 Abaꞌ nang kita upa sidaꞌ kedaꞌ encuba Al Maseh, nyaꞌ te ngasoh sidaꞌ mati depantok ular.h 10 Abaꞌ nang ngemumot upa te depulah sidaꞌ kedaꞌ, nyaꞌ te ngasoh sidaꞌ mati debunoh mlikat te deutos Tuhan Allah.
11 Ugaꞌ utai te tejadi ke sidaꞌ nyaꞌ ngau cuntoh ke urang bukai. Abaꞌ ugaꞌ nyaꞌ detules ngau ngingat ke kita te idop de jeman pemadoꞌ. 12 Kebaꞌ nyaꞌ kebala urang te miker direꞌ diri tegoh, alah ati-ati nang sampai laboh ke alam dusa te upa nyaꞌ. 13 Kitaꞌ decuba uleh kebala masalah te biasa upa te gah deasa urang bukai. Nema Tuhan Allah toꞌ setia, kebaꞌ Ya nadai kaꞌ ngengaꞌ kitaꞌ decuba lebeh ari penalah kitaꞌ. Pas kitaꞌ decuba, Ya kaꞌ mereꞌ ke kitaꞌ jalai keluar isaꞌ kitaꞌ talah ngadap ugaꞌ nyaꞌ.
14 Kebaꞌ nyaꞌ kebala menyadeꞌ ku te ku kaseh, nang kitaꞌ nyemah berhala. 15 Ku madah kebala utai toꞌ ke kitaꞌ nema ku tauꞌ badaꞌ kitaꞌ toꞌ urang te bijak. Kitaꞌ mah te alah nilai upa kati pengajar te ku ajar. 16 Pas kita nginom aiꞌ angor de Perjamuan Tuhan, kita betrimaꞌ kaseh ke Tuhan Allah. Pas tengan nyaꞌ kita suteꞌ abaꞌ darah Al Maseh. Baroꞌ pas kita magi ruti abaꞌ makai ruti nyaꞌ, kita suteꞌ abaꞌ tuboh Al Maseh. 17 Amat mah kita mayoh, uleh kita toꞌ suteꞌ tuboh nema ruti te kita pakai brama nyaꞌ suteꞌ.
18 Cuntoh te kebukai, cuba kitaꞌ medaꞌ pas bansa Israel ngemaiꞌ jelu te depesemah ngau kurban ke Tuhan Allah. Pas sidaꞌ makai iseꞌ jelu nyaꞌ, ugaꞌ urang te abaꞌ makai jadi suteꞌ abaꞌ Tuhan Allah.i 19 Enteꞌ ku madah piyaꞌ, nang kitaꞌ miker berhala abaꞌ iseꞌ jelu te depesemah ke berhala nyaꞌ adai guna. 20 Kitaꞌ alah tauꞌ badaꞌ enteꞌ apa te depesemah ke berhala, nyaꞌ nadai ngau Tuhan Allah uleh ngau kebala roh jat. Abaꞌ ku ngai kitaꞌ suteꞌ abaꞌ roh jat.j 21 Kitaꞌ nitauꞌ nginom ari cawan Tuhan baroꞌ angkat nginom ari cawan te depesemah ke roh jat. Kitaꞌ nitauꞌ makai ari mija Perjamuan Tuhan baroꞌ angkat makai ari perjamuan kebala roh te jat. 22 Asa kitaꞌ mulah piyaꞌ, breti kitaꞌ kaꞌ nyuroh Tuhan ngemuru. Kati, kitaꞌ miker direꞌ kuat ari Ya?k
23 Adai de entara kitaꞌ te madah, “Ku tauꞌ mulah apa jaꞌ te ku kedekaꞌ.” Nyaꞌ amat mah! Uleh nadai ugaꞌ utai te dekedekaꞌ kita nyaꞌ beguna. “Ku tauꞌ mulah apa jaꞌ te ku kedekaꞌ.” Nyaꞌ amat mah! Uleh nadai ugaꞌ utai te dekedekaꞌ kita nyaꞌ mantoꞌ jemat betumoh alam Tuhan. 24 Nang kitaꞌ miker te bayek ngau direꞌ, uleh piker ke te bayek ngau urang bukai.
25 Kitaꞌ tauꞌ makai kebala jelu te dejual urang de pasar, abaꞌ nadai perlu nanyaꞌ jelu nyaꞌ udah depesemah ke berhala sekaleꞌ ke nadai. Enteꞌ kitaꞌ makai jelu nyaꞌ adu mah ngasa salah. 26 Nema alam Kitab Suci detules upa pitoꞌ, “Tuhan te empu bumi abaꞌ ugaꞌ utai te diyaꞌ.”l
27 Enteꞌ urang te nadai pecayaꞌ ngumai kitaꞌ makai abaꞌ kitaꞌ kaꞌ, pakai jaꞌ apa te deageh ke kitaꞌ. Kitaꞌ nadai alah nanyaꞌ arini sidaꞌ buleh pemakai nyaꞌ abaꞌ adu mah kitaꞌ ngasa salah enteꞌ kitaꞌ makai. 28 Uleh enteꞌ urang madah ke kitaꞌ, “Pemakai toꞌ udah depesemah ke berhala,” adu kitaꞌ makai pemakai nyaꞌ. Pulah ke nyaꞌ nema kitaꞌ miker urang te madah ke kitaꞌ isaꞌ sidaꞌ nadai ngasa salah.
29 Maksot ku ukai ati kitaꞌ te ngasa salah, uleh ati urang te madah ke kitaꞌ. De entara kitaꞌ amang ku adai te madah, “Ngapa piyaꞌ penekaꞌ ku alah deatoh urang bukai? 30 Enteꞌ ku udah besukor ke Tuhan Allah sebedau makai, urang bukai nitauꞌ nyalah ku nema ku udah ngucap sukor ke pemakai nyaꞌ.”
31 Ku nyawot: Enteꞌ kitaꞌ makai, nginom abaꞌ mulah ugaꞌ utai, pulah ke ugaꞌ nyaꞌ ngau muji Tuhan Allah. 32 Nang kitaꞌ mulah utai te tauꞌ nimol masalah alam ati urang, bayek sidaꞌ Yahudi, bayek urang ari bansa bukai abaꞌ jemat Tuhan Allah. 33 Ku sigeꞌ mulah piyaꞌ. Alam brena utai ku selareh berusaha nyuroh ati ugaꞌ urang gaga. Ku nadai miker te bayek ngau ku kedireꞌ, uleh ngau urang banyau isaꞌ sidaꞌ tauꞌ deselamat.