Paulos nadai kaꞌ nguna hak ya
9
Tunaꞌ des ku toꞌ urang te bibas. Ku toꞌ rasol abaꞌ ku udah medaꞌ Isa Tuhan kita. Kitaꞌ pecayaꞌ, nyaꞌ tegal asel kreja ku te debereꞌ Tuhan. 2 Amat mah urang bukai nadai nerimaꞌ ku toꞌ rasol, uleh ku yaken kitaꞌ pesti nerimaꞌ ku toꞌ rasol. Kitaꞌ nyau pecayaꞌ ke Tuhan nyaꞌ bukti enteꞌ ku toꞌ rasol Tuhan.3 Enteꞌ urang mejaiꞌ ku, pitoꞌ ku nyawot sidaꞌ: 4 Kami adai hak buleh te depakai abaꞌ te deinom ari kitaꞌ nema kami udah kreja ngau kitaꞌ. 5 Empama kami adai bini te suteꞌ iman abaꞌ kami, kami adai gaꞌ hak angkat ngemaiꞌ bini kami, upa te depulah kebala rasol te kebukai temasok kebala menyadeꞌ Tuhan Isa abaꞌ Petros. 6 Upa kebala rasol te ke bukai, tunaꞌ des ku abaꞌ Barnabas adai gaꞌ hak nerimaꞌ kebala utai te debereꞌ jemat, isaꞌ kemua nadai alah bekerja ngau kemua idop ari-ari. 7 Adai piyaꞌ urang te abaꞌ perang ngau biaya direꞌ? Adai piyaꞌ urang te namak angor nadai makai buah angor? Abaꞌ adai piyaꞌ urang te ngintu dumba uleh nadai nginom aiꞌ tusu dumba nyaꞌ?
8 Apa te ku padah ke toꞌ ukai pemiker ensia gena. Nadai piyaꞌ alam Prator Tuhan Allah te detules Musa depadah piyaꞌ? 9 Alam Prator Musa depadah pitoꞌ, “Nang namet mulot sapi te tengan ngirek ganom.”a Sapi piyaꞌ te deprati Tuhan Allah ditoꞌ? 10 Sekaleꞌ ke kita te demaksot Ya? Tunaꞌ des Tuhan Allah becakap ngau kita. Nema urang te membajak abaꞌ te ngirek ganom nyaꞌ sama bekreja abaꞌ senikoꞌ sama ngagam asel te dekreja senikoꞌ. 11 Jalai kami madah Brita Bayek ke kitaꞌ, kami kebarat ke ngunsai beneh rohani de ati kitaꞌ. Blebeh gilaꞌ piyaꞌ enteꞌ kami ngagam ngetau ari kitaꞌ ngau kami idop ari-ari? 12 Enteꞌ kebala urang bukai jaꞌ adai hak buleh utai ari kitaꞌ, nadai piyaꞌ kami lebeh ageꞌ ari sidaꞌ?
Uleh amat piyaꞌ, kami nadai ngau hak kami nyaꞌ. Selamaꞌ toꞌ kami tan ngasa pemedeh abaꞌ selareh siap ngungkos direꞌ, isaꞌ nyaꞌ nadai nekol urang bukai nerimaꞌ Brita Bayek Isa Al Maseh. 13 Ku yaken kitaꞌ udah tauꞌ badaꞌ urang te ngelayan de Rumah Kudos Tuhan Allah buleh pemakai ari nyaꞌ. Kebala urang te ngelayan de mesbah, buleh pemakai ari kurban te depesemah diyaꞌ.b 14 Upa piyaꞌ mah gaꞌ Tuhan udah nentu kebala urang te madah Brita Bayek, buleh apa te deprelu ngau sidaꞌ idop ari-ari, ari kebala urang te ninga Brita Bayek te sidaꞌ padah.
15 Uleh ku sama sekaleꞌ nadai kalaꞌ nguna hak ku. Abaꞌ ku nules utai toꞌ nadai tegal ku kaꞌ mintaꞌ hak ku. Ku gaga nema ku nadai mintaꞌ kebala utai ari kitaꞌ. Lebeh bayek ku mati ari pada ku lenyau utai te tauꞌ nyuroh ku gaga. 16 Enteꞌ ku madah Brita Bayek, ku nadai tauꞌ ngepah-ngemah direꞌ nema nyaꞌ lamaꞌ udah tugas ku te alah ku pulah. Mati ku enteꞌ ku nadai madah Brita Bayek. 17 Enteꞌ ku madah Brita Bayek ari Tuhan Allah nunaꞌ penekaꞌ ku kedireꞌ, nyaꞌ patot ku nerimaꞌ upah. Uleh ku madah Brita Bayek nyaꞌ nadai nunaꞌ penekaꞌ ku kedireꞌ. Tuhan Allah te mereꞌ tugas nyaꞌ ke ku. 18 Enteꞌ piyaꞌ apa lah upah ku? Upah ku toꞌ, ku tauꞌ madah Brita Bayek nadai deupah, abaꞌ ku nadai nguna hak ku jalai ku madah Brita Bayek.
19 Amat mah ku toꞌ ukai ulon sapa jaꞌ, uleh ku mulah direꞌ jadi ulon ugaꞌ urang. Ku mulah piyaꞌ isaꞌ ku tauꞌ ngemaiꞌ urang lebeh mayoh ageꞌ pecayaꞌ ke Isa. 20 Enteꞌ pas tengan ku abaꞌ sidaꞌ Yahudi, ku idop nunaꞌ cara kami sidaꞌ Yahudi, isaꞌ ku tauꞌ ngemaiꞌ sidaꞌ pecayaꞌ ke Isa. Enteꞌ ku abaꞌ urang te idop nunaꞌ Prator Musa, ku upa urang te trikat ke Prator nyaꞌ, bataꞌ tunaꞌ des ku nadai trikat ke Prator nyaꞌ. Ku mulah piyaꞌ isaꞌ ku tauꞌ ngemaiꞌ sidaꞌ pecayaꞌ ke Isa. 21 Enteꞌ abaꞌ urang te ukai ari bansa Yahudi, ku idop upa urang te ukai ari bansa Yahudi, nadai idop nunaꞌ Prator Musa. Ku mulah piyaꞌ isaꞌ ku tauꞌ ngemaiꞌ sidaꞌ pecayaꞌ ke Al Maseh. Amat piyaꞌ nadai breti ku toꞌ nadai patoh ke Prator Tuhan Allah, uleh ku kaꞌ bamat-amat patoh ke Prator Al Maseh. 22 Enteꞌ ku de tengah urang te lemah, ku idop lemah upa sidaꞌ isaꞌ ku tauꞌ ngemaiꞌ sidaꞌ pecayaꞌ ke Isa. Ku udah upa ugaꞌ urang te ku layan, isaꞌ ku tauꞌ nyelamat sidaꞌ kedaꞌ. 23 Ugaꞌ toꞌ ku pulah isaꞌ Brita Bayek deketauꞌ ugaꞌ urang abaꞌ isaꞌ sidaꞌ abaꞌ ku sama buleh berkat ari Brita Bayek nyaꞌ.
24 Ku yaken kitaꞌ pesti tauꞌ badaꞌ urang te betaneng beguai, abaꞌ beguai ugaꞌ, uleh peroꞌ sikoꞌ mah te buleh hadiyah. Kebaꞌ nyaꞌ beguai bamat ke kitaꞌ isaꞌ kitaꞌ nerimaꞌ hadiyah. 25 Ngenap urang te betaneng alah belateh ngetat direꞌ alam brena utai. Sidaꞌ mulah piyaꞌ isaꞌ sidaꞌ tauꞌ buleh mahkuta te tauꞌ rusak. Uleh kita betaneng isaꞌ buleh mahkuta te nadai ngamoꞌ rusak. 26 Kebaꞌ nyaꞌ ku nadai sebarang beguai uleh adai pemansang. Ku ukai petinyu te sebarang gucoh. 27 Ku ngelateh tuboh ku isaꞌ ku tauꞌ betan abaꞌ ku ngetat penekaꞌ direꞌ. Ku mulah piyaꞌ, isaꞌ nang sampai udah ku madah Brita Bayek, Tuhan ngangap ku nadai patot nerimaꞌ mahkuta.