Pemakai te depesemah ke berhala
8
Entoꞌ ku kaꞌ becakap ke pemakai te udah depesemah ke berhala. Kitaꞌ madah, “Kita te pecayaꞌ mayoh tauꞌ badaꞌ pengajar te kenaꞌ.” Nyaꞌ amat mah, uleh nyaꞌ mah te gah nyuroh urang ngepah-ngemah direꞌ. Uleh kaseh toꞌ lebeh penteng ari pemenauꞌ nema kaseh mah te nguat ati urang. 2 Urang te ngangap direꞌ mayoh tauꞌ badaꞌ utai, ya bedau tauꞌ badaꞌ ugaꞌ utai te alah ya ketauꞌ. 3 Uleh urang te ngaseh Tuhan Allah, ya dekelala Tuhan Allah.4 Entoꞌ ku kaꞌ nyelas ke kitaꞌ pemakai te udah depesemah urang ke berhala. Kita tauꞌ badaꞌ berhala toꞌ niseꞌ leman de dunia toꞌ, abaꞌ kita tauꞌ badaꞌ peroꞌ sikoꞌ mah Tuhan Allah, niseꞌ te ke bukai. 5 Amat mah urang ngangap adai mayoh allah abaꞌ tuhan te ke bukai, bayek te adai de sruga bayek te adai de bumi, 6 uleh bagi kita, peroꞌ sikoꞌ mah Allah abaꞌ Ya Apai kita. Ugaꞌ utai ari Ya, abaꞌ kita idop ngau Ya. Abaꞌ peroꞌ sikoꞌ mah Tuhan, nyaꞌ mah Isa Al Maseh. Ugaꞌ utai depulah Ya ari Al Maseh abaꞌ kita idop tegal Al Maseh.
7 Amat piyaꞌ nadai ugaꞌ urang tauꞌ badaꞌ utai nyaꞌ. Adai urang te nyau pecayaꞌ, uleh nema meliyaꞌ teh gah nyemah berhala, tubah datai ke entoꞌ mah enteꞌ makai jelu te udah depesemah ke berhala sidaꞌ ngasa nyaꞌ sama mah abaꞌ sidaꞌ ageꞌ tubah nyemah berhala. Kebaꞌ enteꞌ sidaꞌ makai jelu nyaꞌ sidaꞌ ngasa direꞌ salah, nema sidaꞌ nitauꞌ badaꞌ ni te kenaꞌ abaꞌ te salah. 8 Tunaꞌ des pemakai nadai nyuroh kita lebeh semak abaꞌ Tuhan Allah. Enteꞌ kita makai kita nadai untong, abaꞌ enteꞌ kita nadai makai, kita nadai rugi.
9 Uleh ati-ati ke kitaꞌ, nang sampai urang bukai te lemah iman jadi dusa medaꞌ kitaꞌ bibas makai utai. 10 Kitaꞌ nyarok enteꞌ kitaꞌ tauꞌ makai apa jaꞌ, temasok te udah depesemah ke berhala niseꞌ masalah. Uleh enteꞌ adai menyadeꞌ seiman kita te ageꞌ lemah iman medaꞌ kitaꞌ tengan dudok makai de kuel berhala, nyaꞌ pesti mah ngansak sidaꞌ makai pemakai nyaꞌ gaꞌ. 11 Enteꞌ kitaꞌ ngepah-ngemah pemenauꞌ kitaꞌ nyaꞌ, kitaꞌ ngelaboh iman kebala urang te lemah iman. Tunaꞌ des sidaꞌ nyaꞌ menyadeꞌ seiman kitaꞌ abaꞌ Al Maseh udah mati ngau sidaꞌ. 12 Enteꞌ kitaꞌ mulah dusa ke kebala menyadeꞌ seiman kitaꞌ, abaꞌ nyuroh ati nurani sidaꞌ te lemah nyaꞌ empala lemah, kitaꞌ dusa ke Al Maseh. 13 Kebaꞌ nyaꞌ, enteꞌ tegal ku makai jelu, nyaꞌ tauꞌ nyuroh kebala menyadeꞌ seiman ku dusa, ku nadai ageꞌ kaꞌ makai jelu, isaꞌ ku nadai nyuroh sidaꞌ dusa.