Pengajar ke urang te belaki abaꞌ bebini
7
Entoꞌ ku kaꞌ becakap ke surat te detules kitaꞌ ke ku te madah, “Lebeh bayek enteꞌ urang laki nadai bebini.” 2 Uleh nema mayoh urang gah baraꞌ, kebaꞌ lebeh bayek enteꞌ ngenap laki adai bini abaꞌ ngenap inoꞌ adai laki. 3 Laki toꞌ alah bekamoh tinok abaꞌ bini ya, piyaꞌ gaꞌ bini alah bekamoh tinok abaꞌ laki ya. 4 Tuboh bini nadai peroꞌ empu direꞌ kedireꞌ uleh empu laki ya gaꞌ, piyaꞌ gaꞌ tuboh laki nadai peroꞌ empu direꞌ kedireꞌ uleh empu bini ya gaꞌ. 5 Nang kitaꞌ ngai tinok kamoh abaꞌ laki bini direꞌ, uleh enteꞌ senikoꞌ udah bepekat nadai bekamoh tinok dua tiga ari nema senikoꞌ kaꞌ ngameꞌ waktu kusos ngau bradua, nyaꞌ tauꞌ mah. Udah nyaꞌ senikoꞌ alah bekamoh ageꞌ, isaꞌ Ibles nadai encuba kitaꞌ nema kitaꞌ nadai talah ngetat direꞌ. 6 Te ku padah ke nyaꞌ teh ukai printah, uleh ku nyadi enteꞌ kitaꞌ mulah piyaꞌ. 7 Tunaꞌ des ku gaga enteꞌ kitaꞌ nadai bebini upa ku, uleh ku tauꞌ badaꞌ ngenap urang nerimaꞌ krunia te kusos ari Tuhan Allah. Te sikoꞌ debereꞌ krunia toꞌ te kebukai debereꞌ krunia nyaꞌ.8 Uleh enteꞌ jakoꞌ ku, kitaꞌ te bedau belaki bedau bebini abaꞌ te nyau balu lebeh bayek kitaꞌ idop kedireꞌ upa ku. 9 Uleh enteꞌ kitaꞌ nadai talah ngetat direꞌ, lebeh bayek kitaꞌ belaki abaꞌ bebini ari pada kitaꞌ mati-mati ngetat napsu kitaꞌ te kuat nyaꞌ.
10 Ke urang te udah belaki bebini, ku mereꞌ printah toꞌ, tunaꞌ des ukai ari ku uleh ari Tuhan: Bini nitauꞌ nyuwayak laki direꞌ. 11 Uleh enteꞌ bini udah nyuwayak laki ya, ya nitauꞌ belaki ageꞌ, uleh enteꞌ ya kaꞌ pulai ageꞌ ke laki ya nyaꞌ tauꞌ. Upa piyaꞌ gaꞌ laki nitauꞌ nyuwayak bini.
12 Abaꞌ entoꞌ ku kaꞌ ngajar sidaꞌ te kebukai. Pengajar toꞌ ari ku kedireꞌ mah, ukai ari Tuhan: Enteꞌ adai menyadeꞌ seiman te empu bini bedau pecayaꞌ ke Tuhan Isa, uleh bini ya nyaꞌ ageꞌ tubah kaꞌ idop kamoh abaꞌ laki ya, nang nyuwayak ya. 13 Piyaꞌ gaꞌ bini, enteꞌ empu laki te bedau pecayaꞌ ke Tuhan Isa, uleh tubah kaꞌ idop kamoh abaꞌ bini ya nang nyuwayak ya. 14 Nema laki te nadai pecayaꞌ dekudos bini te nyau pecayaꞌ. Upa piyaꞌ gaꞌ bini te nadai pecayaꞌ dekudos laki te nyau pecayaꞌ. Enteꞌ nadai piyaꞌ anak sidaꞌ deangap Tuhan Allah anak te nadai kudos. Uleh entoꞌ sidaꞌ jadi anak te kudos.
15 Uleh enteꞌ urang te nadai pecayaꞌ nyaꞌ kaꞌ suwayak, isaꞌ mah ya suwayak. Kitaꞌ nadai depukong diyau abaꞌ urang nyaꞌ. Uleh Tuhan Allah ngumai kitaꞌ isaꞌ idop damai. 16 Nema kitaꞌ kebala bini bedau tauꞌ badaꞌ apa te kaꞌ tejadi. Sapa tauꞌ badaꞌ kitaꞌ tauꞌ ngemaiꞌ laki kitaꞌ isaꞌ sidaꞌ deselamat. Piyaꞌ gaꞌ kitaꞌ kebala laki sapa tauꞌ badaꞌ kitaꞌ tauꞌ ngemaiꞌ bini kitaꞌ isaꞌ sidaꞌ deselamat.
Idop upa semaru Tuhan Allah ngumai kitaꞌ
17 Ngenap kitaꞌ alah idop nunaꞌ te deatoh Tuhan ke kitaꞌ abaꞌ idop upa semaru Tuhan Allah ngumai kitaꞌ pecayaꞌ ke Ya. Nyaꞌ mah printah te ku bereꞌ ke ugaꞌ jemat. 18 Enteꞌ Tuhan Allah ngumai kitaꞌ pas kitaꞌ udah desunat, nang berusaha ngelenyau tana sunat nyaꞌ. Upa piyaꞌ gaꞌ enteꞌ Tuhan Allah ngumai kitaꞌ pas kitaꞌ bedau desunat, nang rinah mintaꞌ sunat. 19 Nema desunat abaꞌ nadai, nyaꞌ nadai penteng. Te paleng penteng patoh ke printah Tuhan Allah. 20 Ngenap urang alah idop upa semaru Tuhan Allah ngumai sidaꞌ pecayaꞌ. 21 Enteꞌ Tuhan Allah ngumai kitaꞌ pas kitaꞌ ageꞌ jadi ulon, nyaꞌ niseꞌ masalah. Uleh enteꞌ kitaꞌ tauꞌ bibas, bibas jaꞌ kitaꞌ. 22 Nema ulon te dekumai Tuhan pecayaꞌ ke Ya, udah jadi urang te bibas abaꞌ empu Tuhan. Piyaꞌ gaꞌ urang te ukai ulon te dekumai Tuhan pecayaꞌ ke Ya, udah jadi ulon Al Maseh. 23 Tuhan Allah udah meli kitaꞌ abaꞌ udah lunas debayar. Kebaꞌ nyaꞌ nang kitaꞌ kaꞌ jadi ulon ensia. 24 Kebala menyadeꞌ, ngenap urang alah idop de mua Tuhan Allah upa semaru ya dekumai Tuhan Allah pecayaꞌ ke Ya.
25 Entoꞌ ku nules ke inoꞌ dara. Ku niseꞌ mah buleh printah ari Tuhan Allah kati sidaꞌ. Uleh tegal pemayek ati Tuhan Allah ke ku, ku tauꞌ depecayaꞌ, kebaꞌ nyaꞌ ku kaꞌ ngajar kitaꞌ. 26 Nema toꞌ waktu te pedeh, ku piker lebeh bayek enteꞌ kitaꞌ idop upa kitaꞌ entoꞌ. 27 Enteꞌ kitaꞌ nyau bebini, adu nyuwayak bini kitaꞌ. Enteꞌ kitaꞌ bedau bebini adu mah ngigaꞌ bini. 28 Uleh enteꞌ kitaꞌ bebini, nyaꞌ nadai dusa. Enteꞌ inoꞌ dara kaꞌ belaki, nyaꞌ nadai dusa. Uleh sidaꞌ te belaki abaꞌ bebini kaꞌ mayoh ngadap masalah idop abaꞌ ku kaꞌ ngenyawoh kitaꞌ ari masalah nyaꞌ.
29 Maksot ku pitoꞌ, kebala menyadeꞌ: Kita nadai ageꞌ mayoh waktu. Belaboh ari entoꞌ ngenap urang te udah bebini alah idop upa urang te bedau bebini. 30 Piyaꞌ gaꞌ kebala urang te nyabak, idop upa urang te nadai nyabak, urang te gaga, idop upa urang te nadai gaga, abaꞌ urang te adai utai te debeli, idop upa urang te nadai empu utai te debeli. 31 Urang te nguna barang dunia, nadai idop begantong ke kebala barang nyaꞌ. Upa piyaꞌ mah kitaꞌ alah idop, nema dunia te adai toꞌ kaꞌ lenyau.
32 Ku kaꞌ isaꞌ kitaꞌ idop nadai saban. Kebala urang laki te nadai bebini ya peroꞌ miker Tuhan, nema ya kaꞌ ngasoh ati Tuhan gaga. 33 Uleh kebala urang laki te bebini, mayoh miker utai te de dunia toꞌ, nema ya kaꞌ ngasoh bini ya gaga, 34 nyaꞌ te nyuroh pemiker ya tebagi. Kebala urang inoꞌ te ngai belaki ageꞌ abaꞌ inoꞌ dara peroꞌ miker Tuhan, isaꞌ sidaꞌ tauꞌ nyerah tuboh abaꞌ ati sidaꞌ peroꞌ ngau Tuhan. Uleh urang inoꞌ te belaki miker kebala utai te dedunia toꞌ, nema ya kaꞌ ngasoh laki ya gaga.
35 Ku madah ugaꞌ toꞌ ngau nulong kitaꞌ, nadai ngerot kitaꞌ mulah utai. Ku empala kaꞌ kitaꞌ mulah te bayek abaꞌ te patot, isaꞌ kitaꞌ tauꞌ ngelayan Tuhan ngau bayek niseꞌ te ngaru.
36 Enteꞌ urang laki miker direꞌ mulah utai te nadai bayek ke tunang ya abaꞌ ya nyau nadai talah ngetat direꞌ, abaꞌ ya miker lebeh bayek senikoꞌ bejadi, isaꞌ mah senikoꞌ bejadi. Utai nyaꞌ nadai dusa. 37 Uleh enteꞌ urang talah ngetat direꞌ abaꞌ ya udah mutos direꞌ balang bejadi abaꞌ tunang ya, abaꞌ te ya putos ke nyaꞌ nadai depaksa, te deputos ya nyaꞌ bayek. 38 Urang te laju bejadi abaꞌ tunang direꞌ nyaꞌ bayek, uleh urang te balang bejadi abaꞌ tunang direꞌ nyaꞌ lebeh bayek.
39 Urang inoꞌ te udah belaki terikat ke laki, selamaꞌ laki ya ageꞌ idop. Uleh enteꞌ laki ya nyau mati, ya tauꞌ belaki ageꞌ abaꞌ laki te dekedekaꞌ ya, te penteng laki nyaꞌ nyau pecayaꞌ ke Tuhan. 40 Uleh enteꞌ nunaꞌ pemiker ku, lebeh nyamai inoꞌ nyaꞌ enteꞌ ya nadai belaki ageꞌ, abaꞌ ku pecayaꞌ te ku padah ke toꞌ ari Roh Tuhan Allah.