Nang mintaꞌ urang te nadai pecayaꞌ nguros pekara
6
Enteꞌ adai de entara kitaꞌ te seiman adai pelayaꞌ, ngapa piyaꞌ kitaꞌ rinah ngemaiꞌ sidaꞌ ke teban te ngau urang sidang, mintaꞌ uros kebala urang te nadai ngelala Tuhan Allah? Ngapa piyaꞌ kitaꞌ nadai mintaꞌ kebala jemat jaꞌ te nguros pekara nyaꞌ? 2 Nadai piyaꞌ kitaꞌ tauꞌ badaꞌ enteꞌ urang te deempu Tuhan Allah toꞌ kaꞌ nyidang dunia toꞌ? Enteꞌ dunia toꞌ jaꞌ kaꞌ kitaꞌ sidang kah, nadai kati mah kitaꞌ nadai talah nguros pekara te engkaꞌ met upa nyaꞌ? 3 Nadai piyaꞌ kitaꞌ tauꞌ badaꞌ kita kaꞌ nyidang kebala mlikat? Apa mah klageꞌ masalah idop te upa nyaꞌ! 4 Kebaꞌ enteꞌ adai pekara te upa nyaꞌ de entara kitaꞌ, nang kitaꞌ mintaꞌ uros kebala urang te de luar jemat. 5 Tunaꞌ des kitaꞌ alah malu! Niseꞌ piyaꞌ de entara kitaꞌ urang te bijak te tauꞌ nguros pekara kitaꞌ? 6 Uleh kitaꞌ te sama nyau pecayaꞌ adai pekara, abaꞌ kitaꞌ empala mintaꞌ urang te nadai pecayaꞌ te nguros pekara kitaꞌ.7 Nema adai pekara kitaꞌ te kitaꞌ suroh uros kebala urang te nadai ngelala Tuhan Allah, nyaꞌ bukti kitaꞌ salah. Lebeh bayek kitaꞌ ngengaꞌ menyadeꞌ seiman kitaꞌ mulah te nadai adel abaꞌ ngerugi kitaꞌ. 8 Uleh toꞌ empala kitaꞌ te nadai adel abaꞌ te ngerugi, abaꞌ nyaꞌ kitaꞌ pulah ke menyadeꞌ seiman kitaꞌ.
9 Kitaꞌ pesti tauꞌ badaꞌ, urang te jat niseꞌ buleh jatah alam Pemrintah Tuhan Allah. Nang nipu direꞌ! Kebala urang te baraꞌ, te nyemah berhala, te besinah, urang laki te kaꞌ ke sama direꞌ, 10 te encuri, te tamaꞌ, te gila mabok, te gah mejaiꞌ pangan abaꞌ te nipu, niseꞌ buleh jatah alam Pemrintah Tuhan Allah. 11 Meliyaꞌ teh dua tiga ikoꞌ de entara kitaꞌ sigeꞌ mulah piyaꞌ. Uleh entoꞌ kitaꞌ udah debreseh ari dusa, kitaꞌ udah dekudos, abaꞌ udah deangap kenaꞌ de mua Tuhan Allah, nema kitaꞌ pecayaꞌ ke Tuhan Isa Al Maseh abaꞌ tegal kuasa Roh Allah kitaꞌ.
Pengajar isaꞌ nadai baraꞌ
12 Adai de entara kitaꞌ te madah, “Ku tauꞌ mulah apa jaꞌ.” Nyaꞌ amat mah, uleh nadai ugaꞌ nyaꞌ bayek. “Ku tauꞌ mulah apa jaꞌ,” uleh ku ngai ngengaꞌ direꞌ jadi ulon kebala utai. 13 Adai gaꞌ urang te madah, “Pemakai toꞌ ngau ngiseꞌ perot abaꞌ perot toꞌ ngau nepoꞌ pemakai,”a uleh nyaꞌ sama depunas Tuhan Allah. Kebaꞌ nyaꞌ kita alah nyarok Tuhan Allah mulah tuboh kita nadai ngau baraꞌ, uleh ngau ngelayan Tuhan, abaꞌ Tuhan ngintu tuboh kita. 14 Abaꞌ Tuhan Allah kaꞌ ngidop kita ageꞌ ngau kuasa te ngau Ya ngidop Isa Al Maseh.
15 Kitaꞌ alah ingat enteꞌ tuboh kitaꞌ toꞌ angota tuboh Al Maseh. Patot nadai kita mulah angota tuboh Al Maseh jadi suteꞌ abaꞌ pelacor? Pesti nadai! 16 Tunaꞌ des kitaꞌ udah tauꞌ badaꞌ, enteꞌ urang tinok kamoh abaꞌ pelacor, nyaꞌ breti udah suteꞌ tuboh abaꞌ pelacor nyaꞌ. Alam Kitab Suci depadah, “Senikoꞌ nyaꞌ jadi suteꞌ.”b 17 Uleh urang te nyuteꞌ direꞌ abaꞌ Tuhan, roh ya abaꞌ Roh Kudos jadi suteꞌ.
18 Kebaꞌ nyaꞌ jaoh ke direꞌ kitaꞌ ari dusa baraꞌ. Ugaꞌ dusa te ke bukai te depulah urang tejadi de luar tuboh urang nyaꞌ. Uleh urang te baraꞌ mulah dusa ke tuboh ya kedireꞌ. 19 Kitaꞌ alah tauꞌ badaꞌ tuboh kitaꞌ teban Roh Kudos diyau. Roh Kudos te diyau de alam kitaꞌ nyaꞌ debereꞌ Tuhan Allah ke kitaꞌ. Kitaꞌ ukai empu kitaꞌ kedireꞌ uleh empu Tuhan Allah. 20 Tuhan Allah udah meli kitaꞌ abaꞌ udah lunas debayar. Kebaꞌ nyaꞌ junyong tingeꞌ ke Tuhan Allah ngau tuboh kitaꞌ.