Kebala utai te ma penteng alam Brita Bayek
15
Abaꞌ entoꞌ, kebala menyadeꞌ, ku kaꞌ ngingat kitaꞌ ke Brita Bayek te ku padah ke kitaꞌ. Kitaꞌ udah nerimaꞌ Brita Bayek nyaꞌ abaꞌ datai ke pitoꞌ tubah kitaꞌ pegai ke bamat-amat. 2 Brita bayek te kitaꞌ tinga ari ku nyaꞌ cara Tuhan Allah nyelamat kitaꞌ. Uleh kitaꞌ alah selareh pecayaꞌ ke Brita Bayek nyaꞌ. Enteꞌ nadai piyaꞌ peracuma mah kitaꞌ udah pecayaꞌ meliyaꞌ teh.3 Nema te ma penteng udah ku padah ke kitaꞌ, apa te udah ku trimaꞌ: Al Maseh udah mati tegal kebala dusa kita, nunaꞌ apa te depadah Kitab Suci,a 4 Ya udah dekubor, abaꞌ deidop ageꞌ ari ketiga, nunaꞌ apa te depadah Kitab Suci.b 5 Ya udah nganyaꞌ direꞌ ke Kepas,c baroꞌ ke kedua belas muret. 6 Udah nyaꞌ Ya nganyaꞌ direꞌ ke limaꞌ ratos lebeh urang pecayaꞌ te tengan begugoꞌ. Sidaꞌ nyaꞌ ageꞌ tubah idop datai ke entoꞌ, dua tiga ikoꞌ mah te nyau mati. 7 Udah nyaꞌ Ya nganyaꞌ direꞌ ke Yakubos, baroꞌ ke ugaꞌ rasol. 8 Abaꞌ te pemadoꞌ ya nganyaꞌ direꞌ ke ku, te upa miyak adai bedau naꞌ senta.
9 De entara kebala rasol, ku mah te paleng niseꞌ reti. Ku nadai patot depadah rasol nema ku udah mrisa jemat Tuhan Allah. 10 Uleh tegal pemayek ati Tuhan Allah ku tauꞌ upa pitoꞌ. Abaꞌ nadai peracuma Tuhan Allah nganyaꞌ pemayek ati Ya ke ku. Ku kreja banteng tulang lebeh ari kebala rasol te kebukai, nadai tegal penganal ku uleh tegal pemayek ati Tuhan Allah te nalau ku. 11 Kebaꞌ nyaꞌ nadai penteng ari sapa kitaꞌ nerimaꞌ Brita Bayek nyaꞌ. Bayek ari ku bayek ari kebala rasol te ke bukai nyaꞌ nadai penteng. Te penteng kami madah Brita Bayek nyaꞌ, abaꞌ kitaꞌ pecayaꞌ.
Udah mati kita kaꞌ deidop ageꞌ
12 Kami madah enteꞌ Tuhan Allah udah ngidop Al Maseh ari pemati, uleh ngapa adai de entara kitaꞌ te madah enteꞌ urang mati nadai deidop ageꞌ? 13 Enteꞌ urang mati nadai deidop ageꞌ, nyaꞌ breti Al Maseh nadai deidop ageꞌ. 14 Uleh enteꞌ Al Maseh nadai deidop ageꞌ, peracuma mah te depadah kami abaꞌ peracuma mah kitaꞌ pecayaꞌ. 15 Enteꞌ urang te mati nadai de idop ageꞌ, breti kami bulaꞌ nema kami ngajar utai te salah, nema selamaꞌ toꞌ kami madah Tuhan Allah udah ngidop Al Maseh. Uleh enteꞌ urang niseꞌ te deidop ageꞌ, breti Tuhan Allah nadai kalaꞌ ngidop Al Maseh. 16 Kebaꞌ enteꞌ amat urang mati nadai kalaꞌ deidop ageꞌ, breti Al Maseh sigeꞌ nadai kalaꞌ deidop ageꞌ. 17 Abaꞌ enteꞌ Al Maseh nadai deidop ageꞌ, peracuma mah kitaꞌ pecayaꞌ ke Ya, abaꞌ kitaꞌ ageꞌ tubah idop alam dusa kitaꞌ. 18 Enteꞌ Al Maseh nadai deidop ageꞌ, nyaꞌ breti kebala urang pecayaꞌ te nyau mati nadai selamat. 19 Enteꞌ kita peroꞌ ngagam Al Maseh ngau idop de dunia toꞌ jaꞌ, kaseh mah badaꞌ kita toꞌ nema kita toꞌ urang te paleng siyal.
20 Uleh te kenaꞌ, Al Maseh udah deidop ageꞌ ari pemati. Ya mah te semaru deidop Tuhan Allah ari ugaꞌ urang te kaꞌ deidop Ya. 21 Sama upa kebala urang mati tegal sikoꞌ urang, upa piyaꞌ gaꞌ urang te udah mati tauꞌ deidop ageꞌ tegal sikoꞌ urang te kebukai. 22 Maksot ku, tegal Adam ugaꞌ urang mati. Upa piyaꞌ gaꞌ, ugaꞌ urang te mati kaꞌ deidop ageꞌ tegal Al Maseh. 23 Uleh Tuhan Allah kaꞌ ngidop urang beganteꞌ: Semaru Tuhan Allah ngidop Al Maseh, udah nyaꞌ baroꞌ Tuhan Allah ngidop kebala urang te deempu Al Maseh pas Ya datai ageꞌ. 24 Udah nyaꞌ dunia toꞌ kaꞌ kiamat. Pas tengan nyaꞌ Al Maseh kaꞌ ngalah ugaꞌ urang te mrintah, te bekuasa, abaꞌ ngalah kebala kuasa roh jat. Udah nyaꞌ baroꞌ Ya nyerah kuasa Pemrintah Ya ke Tuhan Allah, Apai kita. 25 Al Maseh alah selareh mrintah datai ke Ya ngalah ugaꞌ munsoh Ya abaꞌ nepoꞌ sidaꞌ de baroh kaki Ya.d 26 Munsoh te pemadoꞌ te kaꞌ dekalah Al Maseh nyaꞌ pemati. 27 Alam Kitab Suci depadah pitoꞌ, “Tuhan Allah ngalah ugaꞌ utai de baroh kaki Ya.”e Nema depadah “ugaꞌ utai de baroh kaki Ya,” nyaꞌ jelas mah enteꞌ Tuhan Allah nadai temasok, nema Tuhan Allah te udah naroh ugaꞌ utai de baroh kaki Al Maseh. 28 Udah ugaꞌ utai detaroh de baroh kuasa Al Maseh, Anak Tuhan Allah nyaꞌ kaꞌ naroh Direꞌ de baroh Tuhan Allah. Ngau cara nyaꞌ, Tuhan Allah kaꞌ jadi penguasa penoh de ugaꞌ utai.
29 Enteꞌ Tuhan Allah nadai ngidop ageꞌ urang te mati, ngapa adai urang te kaꞌ depaneꞌ ngau urang te mati? Enteꞌ Tuhan Allah sama sekaleꞌ nadai ngidop ageꞌ urang mati, niseꞌ guna sidaꞌ depaneꞌ ngau urang te mati. 30 Piyaꞌ gaꞌ kami. Enteꞌ amat urang te mati nadai deidop ageꞌ, peracuma mah kami kaꞌ ngadap bahaya ngenap waktu. 31 Kebala menyadeꞌ, ngenap ari ku ngadap pemati. Te ku padah toꞌ amat mah, nadai ku bulaꞌ. Nyaꞌ sama mah abaꞌ ku nadai bulaꞌ, jalai ku madah ke kitaꞌ ku gaga medaꞌ kitaꞌ pecayaꞌ ke Isa Al Maseh Tuhan kita. 32 Enteꞌ peroꞌ nunaꞌ pemiker ensia, niseꞌ guna ku mati-mati ngelawan kebala jelu te ganas de kuta Episos. Enteꞌ amat urang te mati nadai deidop ageꞌ, lebeh bayek kita nunaꞌ pepatah toꞌ, “Boh kita makai nginom abaꞌ gaga sengabot, nema pagi kita sigeꞌ mati.”f
33 Nang kitaꞌ tesat, “Urang te bayek jadi jat enteꞌ bekawan abaꞌ urang te jat.” 34 Kitaꞌ alah bamat-amat sadar abaꞌ nang mulah dusa ageꞌ. Tunaꞌ des kitaꞌ alah malu nema adai de entara kitaꞌ te nadai ngelala Tuhan Allah.
Tuboh ensia te udah deidop age
35 Uleh amang adai te nanyaꞌ, “Kati urang mati tauꞌ deidop ageꞌ? Abaꞌ tuboh te upa kati te kaꞌ debereꞌ ke sidaꞌ enteꞌ sidaꞌ deidop ageꞌ?” 36 Eh urang budu! Igeꞌ utai te kitaꞌ unsai nadai kaꞌ tumoh abaꞌ idop enteꞌ ya nadai mati dulau. 37 Abaꞌ te kitaꞌ unsai nyaꞌ ukai batang uleh igeꞌ ya, empama teh igeꞌ ganom abaꞌ igeꞌ te kebukai. 38 Tuhan Allah kaꞌ mereꞌ batang ke igeꞌ nyaꞌ nunaꞌ apa te Ya kedekaꞌ. Ngenap igeꞌ toꞌ adai batang ya kedireꞌ. 39 Ngenap tuboh toꞌ niseꞌ te sama. Tuboh ensia laen ari tuboh jelu, laen ari tuboh burong, abaꞌ laen ari tuboh ikan.
40 Upa piyaꞌ gaꞌ kebala utai te de langet laen ari utai te de bumi. Utai te de langet bayek kedireꞌ piyaꞌ gaꞌ utai te de bumi bayek kedireꞌ. 41 Pemayek mataari laen ari pemayek bulan, pemayek bulan laen ari pemayek kebala piyanau, abaꞌ pemayek piyanau te sigeꞌ laen ari pemayek piyanau te kebukai.
42 Upa piyaꞌ gaꞌ tuboh kita ensia nadai ageꞌ sama senta Tuhan Allah ngidop urang ageꞌ. Tuboh kita te dekubor nyaꞌ tuboh te tauꞌ buntau abaꞌ reraꞌ, uleh tuboh kita te deidop ageꞌ nyaꞌ tuboh te nitauꞌ reraꞌ. 43 Pas tuboh nyaꞌ dekubor, tuboh nyaꞌ jaiꞌ abaꞌ lemah; uleh pas tuboh nyaꞌ deidop ageꞌ, tuboh nyaꞌ jadi tuboh te lampar bayek abaꞌ kuat. 44 Tuboh te dekubor nyaꞌ tuboh te toꞌ. Uleh tuboh te deidop ageꞌ nyaꞌ tuboh rohani.
Enteꞌ adai tuboh te toꞌ, pesti mah adai gaꞌ tuboh rohani. 45 Alam Kitab Suci detules upa pitoꞌ, “Adam, ensia te semaru, udah jadi ensia te idop.”g Uleh Adam te pemadoꞌ, jadi Roh te mereꞌ idop. 46 Te semaru nyaꞌ ukai tuboh te rohani uleh tuboh te toꞌ, udah nyaꞌ baroꞌ tuboh te rohani. 47 Ensia te semaru depulah ari debu tanah. Ensia te kedua datai ari sruga. 48 Kebala urang te de dunia toꞌ upa ensia te semaru, depulah ari tanah. Uleh kebala urang te idop de sruga jemah lah, upa Ya te datai ari sruga. 49 Tuboh kita entoꞌ upa tuboh Adam te depulah ari debu tanah, upa piyaꞌ gaꞌ jemah lah tuboh kita kaꞌ upa tuboh Al Maseh te datai ari sruga.
50 Kebala menyadeꞌ, te demaksot ku toꞌ, tuboh abaꞌ darah niseꞌ buleh jatah alam Pemrintah Tuhan Allah, abaꞌ tuboh te tauꞌ mati nadai tauꞌ jong idop abaꞌ Tuhan Allah. 51 Dinga! Entoꞌ ku kaꞌ madah ke kitaꞌ te selamaꞌ toꞌ detapok: Nadai ugaꞌ kita mati, uleh ugaꞌ kita kaꞌ debaleꞌ. 52 Utai toꞌ tejadi alam sekejap mata, jalai trumpet te pemadoꞌ nyaꞌ desepu. Pas trumpet nyaꞌ begoꞌ, kebala urang te mati kaꞌ deidop ageꞌ ngau tuboh te nitauꞌ mati. Abaꞌ ugaꞌ kita te ageꞌ idop tengan nyaꞌ kaꞌ lansong debaleꞌ upa sidaꞌ. 53 Tuboh kita te tauꞌ punas alah deganti ngau tuboh te nitauꞌ punas abaꞌ tuboh kita te tauꞌ mati toꞌ alah deganti ngau tuboh te nitauꞌ mati. 54 Nema pas tuboh kita te tauꞌ mati toꞌ deganti ngau tuboh te nitauꞌ mati, temoꞌ mah apa te depadah alam Kitab Suci,
“Kuasa pemati udah kalah, abaꞌ kita udah menang!”h
55 “O pemati, direꞌ nyau kalah!
O pemati, direꞌ niseꞌ ageꞌ pemisa!”i
56 Pemati buleh pemisa ari dusa abaꞌ dusa buleh kuasa ari Prator Musa. 57 Uleh kita besukor ke Tuhan Allah te nyuroh kita menang, nema apa te Tuhan kita Isa Al Maseh pulah ke kita!
58 Kebaꞌ nyaꞌ kebala menyadeꞌ ku te ku kaseh, kitaꞌ alah selareh pecayaꞌ sengabot. Nang ngengaꞌ adai te ngaru kitaꞌ sampai kitaꞌ gamaꞌ ke te kitaꞌ pecayaꞌ ke nyaꞌ. Kitaꞌ alah bamat-amat kreja ngau Tuhan! Nema kitaꞌ tauꞌ badaꞌ, ugaꞌ te kitaꞌ kreja ngau Tuhan nadai peracuma.