Tuhan Allah te nyidang urang
4
Kitaꞌ alah ngangap kami pelayan Al Maseh. Kami detugas madah kebala pengamoꞌ Tuhan Allah te kaꞌ nyelamat urang, abaꞌ pengamoꞌ nyaꞌ bedau naꞌ deketauꞌ dunia. 2 Te penteng ari pelayan te debereꞌ tugas nyaꞌ, sidaꞌ tauꞌ depecayaꞌ. 3 Bagi ku, nadai penteng enteꞌ kitaꞌ abaꞌ sapa jaꞌ te nilai ku. Ku nadai nilai direꞌ kenaꞌ ke nadai. 4 Ku ngasa niseꞌ mulah penyalah, uleh nyaꞌ nadai breti ku tauꞌ depadah kenaꞌ. Peroꞌ Tuhan mah te tauꞌ nilai kenaꞌ salah ku. 5 Kebaꞌ nyaꞌ nang kitaꞌ beburoh arah nilai urang, nema nyaꞌ bedau naꞌ senta. Senta nyaꞌ lah enteꞌ Tuhan datai. Pas nyaꞌ mah, Ya kaꞌ nyuroh ugaꞌ utai te detapok de teban te petang kaꞌ pedaꞌ ugaꞌ. Ya kaꞌ nganyaꞌ ugaꞌ te deamoꞌ ngenap urang alam ati sidaꞌ. Baroꞌ Tuhan Allah kaꞌ muji ngenap urang te patot Ya puji.Nang ngepah-ngemah direꞌ
6 Kebala menyadeꞌ, ku nules direꞌ abaꞌ Apulos nyaꞌ ngau cuntoh ke kitaꞌ. Ku mulah piyaꞌ isaꞌ kitaꞌ belajar apa reti utai toꞌ, “Patoh ke apa te detules alam Kitab Suci.” Nang adai de entara kitaꞌ te ngepah-ngemah pemimpen te sikoꞌ abaꞌ menadai pemimpen te kebukai. 7 Sapa piyaꞌ te ngangap kitaꞌ lebeh ari urang bukai? Nadai piyaꞌ ugaꞌ utai kitaꞌ trimaꞌ ke ari Tuhan Allah? Ngapa kitaꞌ kaꞌ ngepah-ngemah direꞌ alap-alap te adai de kitaꞌ nyaꞌ nadai ari Tuhan Allah? 8 Kitaꞌ miker kitaꞌ udah kenyang, kitaꞌ udah kaya, abaꞌ udah jadi raja! Uleh kami nadai. Ma mah ku gaga enteꞌ kitaꞌ bamat-amat nyau jadi raja, isaꞌ kami tauꞌ mrintah abaꞌ kitaꞌ! 9 Ku madah pitoꞌ nema ku ngasa Tuhan Allah mereꞌ teban te paleng baroh ke kami kebala rasol. Kami upa kebala urang te detangkap pas perang abaꞌ daukom mati de mua urang banyau. Kami detunton ugaꞌ dunia, ensia abaꞌ mlikat. 10 Kami deangap budu nema kami pecayaꞌ ke Al Maseh, uleh kitaꞌ miker kitaꞌ pintar nema pecayaꞌ ke Al Maseh! Kami lemah, uleh kitaꞌ kuat! Kami depejah, uleh kitaꞌ dejunyong tingeꞌ. 11 Datai ke entoꞌ kami gah lapar abaꞌ awos, selawar baju kami nyau mes carek, kami gah depangkong-paloꞌ abaꞌ niseꞌ teban te jalai diyau. 12 Kami kreja banteng tulang ngigaꞌ te dapakai. Enteꞌ urang ngutok kami, kami mintaꞌ Tuhan Allah mereꞌ tuah ke sidaꞌ. Enteꞌ kami deprisa, kami sabar nadai malas sidaꞌ. 13 Enteꞌ urang mejaiꞌ kami, kami tetap mah ritak abaꞌ sidaꞌ. Datai ke entoꞌ kami deangap ensia de dunia toꞌ uras abaꞌ taiꞌ.
14 Ku nules utai toꞌ ke kitaꞌ nadai ngau ku ngemalu kitaꞌ, uleh ngau ku ngajar kitaꞌ nema ku ngangap kitaꞌ upa medaꞌ anak ku kedireꞌ. 15 Amat mah bribu-ribu urang te ngajar Al Maseh ke kitaꞌ, uleh nadai mayoh apai kitaꞌ. Peroꞌ ku mah te upa apai kitaꞌ, nema ku te udah madah Brita Bayek ke kitaꞌ te ngasoh kitaꞌ pecayaꞌ ke Isa Al Maseh. 16 Kebaꞌ nyaꞌ ku mintaꞌ bamat-amat ke kitaꞌ, tunaꞌ ke cuntoh idop ku. 17 Nyaꞌ nyuroh ku udah ngutos Timutios ke kitaꞌ. Timutios nyaꞌ upa anak ku kedireꞌ te ku kaseh abaꞌ te setia ke Tuhan. Ya kaꞌ ngingat ke kitaꞌ kati gaya idop ku nyau ku pecayaꞌ ke Isa Al Maseh, upa te udah ku ajar ke ugaꞌ jemat.
18 Uleh adai dua tiga ikoꞌ urang de entera kitaꞌ te nyau sumong, nema sidaꞌ miker ku nadai datai ngusong kitaꞌ. 19 Uleh enteꞌ Tuhan nyadi, nadai lamaꞌ ageꞌ lah ku datai ngunyong kitaꞌ. Ku kaꞌ medaꞌ amat nadai sidaꞌ te sumong nyaꞌ empu kuasa Tuhan Allah sekaleꞌ ke peroꞌ cakap gena. 20 Nema enteꞌ Tuhan Allah mrintah idop kita, nyaꞌ tauꞌ pedaꞌ nadai peroꞌ ari apa te kita padah, uleh ari apa te kita pulah tegal kuasa Ya. 21 Kitaꞌ kaꞌ apa enteꞌ ku datai ngunyong kitaꞌ? Kitaꞌ kaꞌ ku nyimat kitaꞌ, sekaleꞌ ke kita kaꞌ ku datai ngau kaseh abaꞌ bayek-bayek ke kitaꞌ?