Pelayaꞌ alam jemat Kurintos
3
Kebala menyadeꞌ, meliyaꞌ teh ku nadai becakap ke kitaꞌ upa abaꞌ urang te depimpen Roh Kudos, uleh upa abaꞌ urang te idop nunaꞌ cara dunia, te ageꞌ miyak alam Al Maseh. 2 Meliyaꞌ teh aiꞌ tusu te ku bereꞌ ke kitaꞌ ukai pemakai te kereng, nema kitaꞌ bedau talah nelan pemakai te kereng. Datai ke entoꞌ mah kitaꞌ bedau talah nelan pemakai te kereng, 3 nema kitaꞌ ageꞌ idop nunaꞌ cara dunia. Nema enteꞌ de entara kitaꞌ ageꞌ adai te tubah iri ke pangan abaꞌ belayaꞌ abaꞌ pangan bukai, nadai piyaꞌ nyaꞌ bukti enteꞌ kitaꞌ ageꞌ tubah idop nunaꞌ cara dunia abaꞌ upa urang te bedau pecayaꞌ? 4 Enteꞌ adai te madah, “Ku muret Paulos,” abaꞌ adai te madah, “Ku muret Apulos,” nadai piyaꞌ nyaꞌ kelaiꞌ enteꞌ kitaꞌ ageꞌ tubah upa urang dunia?5 Tunaꞌ des, Apulos nadai penteng. Piyaꞌ gaꞌ ku Paulos nadai penteng. Kami toꞌ bayah pelayan Tuhan Allah te udah nulong kitaꞌ pecayaꞌ ke Al Maseh. Ngenap kami bayah ngreja tugas te depecayaꞌ Tuhan Allah ke kami. 6 Ku namak, Apulos nataꞌ, uleh Tuhan Allah te ngasoh tumoh. 7 Kebaꞌ nyaꞌ te penteng ukai te namak abaꞌ te nataꞌ, uleh Tuhan Allah te ngasoh tumoh. 8 Bayek te namak, bayek te nataꞌ, nyaꞌ sama mah; abaꞌ senikoꞌ nerimaꞌ upah nunaꞌ apa te dekreja senikoꞌ. 9 Kemua toꞌ sama bekreja ngelayan Tuhan Allah. Kitaꞌ upa uma Tuhan Allah abaꞌ upa rumah te dediri ngau Tuhan Allah.
Kita toꞌ Rumah Kudos Tuhan Allah
10 Nunaꞌ pemayek ati Tuhan Allah ke ku, ku jadi tukang te anal te ngeletak batu ngau dasar abaꞌ urang bukai nyamong mulah rumah de atau nyaꞌ. Uleh ngenap urang alah medaꞌ bamat-amat, kati sidaꞌ mulah rumah de atau dasar nyaꞌ. 11 Nema Tuhan Allah kedireꞌ udah nyuroh Isa Al Maseh ngau suteꞌ-uteꞌ dasar rumah nyaꞌ, kebaꞌ niseꞌ te tauꞌ mulah dasar te kebukai. 12 Adai urang te mulah rumah de atau dasar nyaꞌ ngau bahan te tan, upa mas, pirak, abaꞌ batu permata, uleh adai gaꞌ urang te ngau bahan te nadai tan, upa kayu, lalang, abaꞌ kebala daon te rangkai. 13 Apa te dekreja ngenap urang kaꞌ pedaꞌ senta Al Maseh datai ageꞌ. Tengan nyaꞌ api kaꞌ nguji kreja ngenap urang abaꞌ nyuroh te dekreja urang nyaꞌ pedaꞌ, bayek sekaleꞌ ke nadai. 14 Enteꞌ apa te dekreja urang nadai angos, urang nyaꞌ kaꞌ nerimaꞌ upah. 15 Uleh enteꞌ te dekreja urang nyaꞌ angos, urang nyaꞌ nadai nerimaꞌ upah. Urang nyaꞌ selamat mah, uleh upa urang te pansot ari alam api.
16 Nitauꞌ piyaꞌ kitaꞌ badaꞌ enteꞌ kitaꞌ toꞌ Rumah Kudos Tuhan Allah, abaꞌ Roh Allah diyau alam kitaꞌ? 17 Enteꞌ adai urang te ngerusak Rumah Kudos Tuhan Allah, Tuhan Allah sigeꞌ kaꞌ ngerusak urang nyaꞌ. Nema Rumah Kudos Tuhan Allah nyaꞌ kusos jalai Tuhan Allah diyau, abaꞌ Rumah Kudos Tuhan Allah nyaꞌ kitaꞌ.
18 Nang adai de entara kitaꞌ te ngemulaꞌ direꞌ. Enteꞌ adai de entara kitaꞌ te ngasa direꞌ bijak nunaꞌ ukor dunia toꞌ, alah jadi budu depedaꞌ dunia, isaꞌ kitaꞌ tauꞌ bamat-amat bijak de mua Tuhan Allah. 19 Ku madah pitoꞌ nema apa te deangap bijak uleh urang dunia, deangap budu uleh Tuhan Allah. Upa te udah depadah alam Kitab Suci, “Kebala urang te empu pemanai de prangkap Tuhan Allah ngau pemanai sidaꞌ kedireꞌ.”a 20 Kitab suci madah gaꞌ, “Tuhan Allah tauꞌ badaꞌ ugaꞌ pemiker urang bijak nyaꞌ niseꞌ guna.”b 21 Kebaꞌ nyaꞌ, nang ngepah-ngemah ensia, nema Tuhan Allah udah mereꞌ ugaꞌ utai ke kitaꞌ. 22 Bayek Paulos, Apulos, Petros, dunia, idop abaꞌ mati, waktu entoꞌ abaꞌ waktu te kaꞌ datai, ugaꞌ nyaꞌ empu kitaꞌ. 23 Uleh kitaꞌ toꞌ empu Al Maseh abaꞌ Al Maseh toꞌ empu Tuhan Allah.