Brita pemati Isa de kayu saleb
2
Kebala menyadeꞌ ku te seiman, jalai ku nusoi pengamoꞌ Tuhan Allah te bedau deketauꞌ dunia ke kitaꞌ, ku nadai datai ngau cakap te nyamai detinga abaꞌ pemanai te luar des. 2 Nema ku udah mutos selamaꞌ ku abaꞌ kitaꞌ ku nadai kaꞌ ngetauꞌ te kebukai, bukai ari Isa Al Maseh abaꞌ pemati Ya de kayu saleb. 3 Jalai ku abaꞌ kitaꞌ, ku lemah abaꞌ begetar takot. 4 Brita te ku padah ke kitaꞌ nadai ku padah ke ngau pemanai ensia te nyuroh kitaꞌ yaken, uleh pengajar te ku padah ke nyaꞌ ari kuasa Roh Kudos. Nyaꞌ mah bukti enteꞌ pengajar ku nyaꞌ kenaꞌ. 5 Ku mulah piyaꞌ isaꞌ iman kitaꞌ nadai begantong ke pemanai ensia, uleh begantong ke kuasa Tuhan Allah.Pemanai te ari Tuhan Allah
6 Uleh amat piyaꞌ, enteꞌ abaꞌ urang te nyau tuai secara rohani kami madah pengajar te panai. Uleh pemanai kami nadai ari dunia toꞌ, abaꞌ nadai ari kebala penguasa dunia toꞌ te kaꞌ depunas. 7 Te kami ajar ke nyaꞌ pemanai Tuhan Allah. Pemanai nyaꞌ pengamoꞌ Tuhan Allah te bedau depadah ke dunia, uleh lamaꞌ udah deageh Ya ke kita sebedau dunia toꞌ depulah, isaꞌ kita dejunyong tingeꞌ abaꞌ Isa Al Maseh. 8 Niseꞌ kebala penguasa dunia toꞌ te nyarok ke pemanai nyaꞌ, nema enteꞌ sidaꞌ nyarok, pesti mah sidaꞌ nadai nyaleb Tuhan kita te patot dejunyong tingeꞌ. 9 Uleh upa te detules alam Kitab Suci,
“Apa te nadai kalaꞌ depedaꞌ mata, te nadai kalaꞌ detinga peneng,
abaꞌ te nadai kalaꞌ timol alam ati ensia,
ugaꞌ nyaꞌ deageh Tuhan Allah
ngau sidaꞌ te ngaseh Ya.”a
10 Uleh Tuhan Allah nganyaꞌ ugaꞌ nyaꞌ ke kita ari Roh Kudos. Roh Kudos nyaꞌ mah te mresa ugaꞌ utai, datai ke kebala pengamoꞌ Tuhan Allah te detapok Ya. 11 Niseꞌ urang te tauꞌ badaꞌ pemiker kita bukai ari roh kita, upa piyaꞌ gaꞌ niseꞌ urang te tauꞌ badaꞌ pemiker Tuhan Allah bukai ari Roh Ya kedireꞌ. 12 Kita nadai bepiker ngau cara ensia, uleh kita debereꞌ Roh Tuhan Allah, isaꞌ kita tauꞌ badaꞌ, ugaꞌ te debereꞌ Tuhan Allah ke kita nyaꞌ tegal pemayek ati Ya.
13 Kebaꞌ nyaꞌ, enteꞌ kami nyelas apa te kami trimaꞌ ke ari Roh Kudos ke kebala urang te adai Roh Kudos, kami nadai ngajar nunaꞌ pemanai ensia, uleh nunaꞌ pengajar Roh Kudos. 14 Urang te niseꞌ Roh Tuhan Allah, nitauꞌ nerimaꞌ apa te depadah Roh nyaꞌ, nema sidaꞌ ngangap kebala utai te rohani toꞌ budu. Kebala urang nyaꞌ nadai nyarok utai te rohani, nema urang peroꞌ tauꞌ nyarok ke utai nyaꞌ enteꞌ Roh Kudos nulong sidaꞌ. 15 Urang te adai Roh Kudos tauꞌ nilai ugaꞌ utai, uleh urang te niseꞌ Roh Kudos nitauꞌ nilai ya. 16 Upa te detules alam Kitab Suci,
“Niseꞌ urang te tauꞌ badaꞌ pemiker Tuhan.
Niseꞌ urang te tauꞌ ngajar Ya.”b
Uleh kita empu pemiker te sama abaꞌ Al Maseh.