SURAT PAULUS TE SEMARU KE JEMAT
KURINTOS
Kirem tabeꞌ
1
Surat toꞌ ari ku Paulos te depileh jadi rasol Isa Al Maseh nunaꞌ penekaꞌ Tuhan Allah. Kirem tabeꞌ ari ku Paulos abaꞌ Sostenes kawan seiman kita, 2 ke jemat Tuhan Allah te adai de Kurintos. Kitaꞌ jadi urang te kudos nema kitaꞌ suteꞌ abaꞌ Tuhan Isa Al Maseh. Kitaꞌ dekumai jadi urang te deempu Tuhan Allah. Piyaꞌ gaꞌ urang diyaꞌ-ditoꞌ te pecayaꞌ ke Tuhan kita Isa Al Maseh. Isa nyaꞌ Tuhan sidaꞌ abaꞌ Tuhan kita. 3 Kami bradua ke kitaꞌ, isaꞌ Tuhan Allah Apai kita abaꞌ Tuhan kita Isa Al Maseh nganyaꞌ pemayek ati ke kitaꞌ abaꞌ mereꞌ idop penoh damai ke kitaꞌ.Paulos besukor ke Tuhan Allah
4 Ku selareh besukor ke Tuhan Allah tegal kitaꞌ nema apa te udah Ya pulah ke kitaꞌ. Ya bayek amat ke kitaꞌ, abaꞌ mayoh mereꞌ tuah ke kitaꞌ, nema kitaꞌ suteꞌ abaꞌ Isa Al Maseh. 5 Nema kitaꞌ udah jadi empu Al Maseh, kebaꞌ Tuhan Allah mayoh amat mereꞌ kebala utai te bayek ke kitaꞌ. Toꞌ temasok pemanai kitaꞌ madah pesau Ya abaꞌ pemenauꞌ kitaꞌ ke ugaꞌ utai te rohani. 6 Abaꞌ utai toꞌ jadi bukti enteꞌ apa te ku padah tentang Isa Al Maseh nyaꞌ kenaꞌ. 7 Tegal nyaꞌ kitaꞌ nerimaꞌ ugaꞌ krunia ari Tuhan Allah, blumaꞌ kitaꞌ nungoꞌ Tuhan kita Isa Al Maseh datai abaꞌ depedaꞌ uleh ugaꞌ urang. 8 Isa Al Maseh kaꞌ mulah kitaꞌ betan datai ke pemadoꞌ, isaꞌ pas Ya datai lah Ya nemu kitaꞌ niseꞌ penyalah. 9 Tuhan Allah nyaꞌ setia ke danyi Ya. Ya te ngumai kitaꞌ isaꞌ kitaꞌ idop suteꞌ abaꞌ Anak Ya Isa Al Maseh, Tuhan kita.
Jemat Kurintos pecah belah
10 Kebala menyadeꞌ! Ngau kuasa nama Tuhan kita Isa Al Maseh, ku mintaꞌ isaꞌ kitaꞌ suteꞌ pemiker abaꞌ nadai pecah belah. Kitaꞌ alah sati abaꞌ suteꞌ pemansang. 11 Ku madah pitoꞌ nema adai dua tiga ikoꞌ urang ari keluarga Klui madah ke ku enteꞌ kitaꞌ belayaꞌ. 12 Maksot ku, adai de entara kitaꞌ te madah direꞌ, “Ku muret Paulos,” adai gaꞌ te madah “Ku muret Apulos,” adai te madah “Ku muret Petros,” abaꞌ adai gaꞌ te madah “Ku muret Al Maseh.” 13 Adai piyaꞌ kitaꞌ medaꞌ Al Maseh tebagi? Adai piyaꞌ kitaꞌ medaꞌ ku, Paulos desaleb ngau kitaꞌ? Adai piyaꞌ kitaꞌ depaneꞌ alam nama ku?
14 Ku besukor niseꞌ kitaꞌ te ku paneꞌ, bukai ari Krispos abaꞌ Gayos, 15 kebaꞌ niseꞌ urang te tauꞌ madah direꞌ depaneꞌ alam nama ku. 16 (Ai auꞌ ni, baroꞌ ku ingat keluarga Stepanos gaꞌ ni te ku paneꞌ kah, bukai ari nyaꞌ sepengingat ku niseꞌ ageꞌ.) 17 Ku nadai mayoh maneꞌ urang nema ku deutos Al Maseh nusoi Brita Bayek ari Tuhan Allah nadai maneꞌ urang. Ku nusoi Brita Bayek nyaꞌ nadai ngau penganal ku becakap. Nyaꞌ ku pulah isaꞌ kuasa pemati Isa de kayu saleb nadai peracuma.
Pemanai Tuhan Allah abaꞌ pemanai ensia
18 Bagi urang te nadai pecayaꞌ te mansang ke neraka lah, brita saleb toꞌ brita te budu, uleh bagi kita te kaꞌ deselamat, brita nyaꞌ cara Tuhan Allah nganyaꞌ kuasa Ya. 19 Nema adai detules alam Kitab Suci upa pitoꞌ,
“Ku kaꞌ munas pemanai kebala urang panai
abaꞌ nyuroh pemintar kebala urang pintar niseꞌ guna.”a
20 Dini urang te panai? Dini urang te pintar? Dini urang te anal betengek? Tuhan Allah mulah apa te depadah dunia toꞌ bijak nyaꞌ jadi budu.
21 Alam pemanai Tuhan Allah, Ya udah nentu dunia nadai tauꞌ ngelala Ya ngau pemanai sidaꞌ kedireꞌ. Kebaꞌ Ya mileh nyelamat kebala urang te pecayaꞌ ke Ya ari brita te kami padah, te deangap kebala urang brita budu. 22 Kebala sidaꞌ Yahudi mintaꞌ tana te nyaroh abaꞌ sidaꞌ Yunani ngigaꞌ pemanai, 23 uleh kami nusoi Al Maseh te mati desaleb. Sidaꞌ Yahudi te ninga kami nusoi toꞌ tesingong, abaꞌ sidaꞌ te ari bansa bukai madah toꞌ utai te nadai masok akal. 24 Uleh kebala urang te udah depileh Tuhan Allah, bayek sidaꞌ Yahudi, bayek sidaꞌ ari bansa bukai, ngangap Al Maseh toꞌ cara Tuhan Allah nganyaꞌ kuasa abaꞌ pemanai Ya. 25 Nema kebala utai te deangap budu ari Tuhan Allah lebeh panai ari pemanai ensia, abaꞌ kebala utai te deangap lemah ari Tuhan Allah lebeh kuat ari penguat ensia.
26 Kebala menyadeꞌ, ingat jaꞌ kati peniyau kitaꞌ jalai Tuhan Allah ngumai kitaꞌ. Enteꞌ nunaꞌ ukor dunia toꞌ nadai mayoh kitaꞌ te panai, te bepengaroh, abaꞌ te adai ari keluarga te tepanang. 27 Uleh Tuhan Allah mileh apa te deangap dunia toꞌ budu ngau Ya ngemalu te deangap dunia toꞌ panai. Ya mileh apa te deangap dunia toꞌ lemah ngau Ya ngemalu te deangap dunia toꞌ kuat. 28 Abaꞌ Tuhan Allah mileh apa te deangap dunia nadai penteng, niseꞌ guna, abaꞌ te niseꞌ reti. Tuhan Allah mileh te upa nyaꞌ ngau Ya ngancor apa te deangap dunia toꞌ ma penteng. 29 Tuhan Allah mulah piyaꞌ isaꞌ niseꞌ urang te tauꞌ ngepah-ngemah direꞌ de mua Ya. 30 Tuhan Allah mah te udah nyuteꞌ kita abaꞌ Isa Al Maseh te jadi pon pemanai kita. Abaꞌ Al Maseh mah te udah mulah kita kenaꞌ de mua Tuhan Allah, Ya mah te udah ngudos kita abaꞌ ngelepas kita ari dusa. 31 Kebaꞌ nyaꞌ, upa te detules alam Kitab Suci, “Urang te kaꞌ ngepah-ngemah direꞌ alah ngepah-ngemah apa te udah Tuhan Allah pulah ke ya.”b